在IG上重遇你: 19

第十九章

同Anthony傾完之後，我即刻輕鬆晒，不過我仲未諗到點同阿輝講呢件事。

我：「Anthony，今次真係好多謝你，唔係我都唔知自己要煩幾耐！」

Anthony：「唔洗多謝我，你要多謝自己先啱，係你自己諗通左」

我送Anthony搭完船之後，我慢慢由尖沙咀行返旺角，途中我諗緊用咩方法同阿輝講清楚，呢個時候我收到Queenie嘅whatsapp





Queenie：「Steven，你聽日得唔得閒，我想搵你去睇戲？」
我：「可以呀！你想睇咩戲？」
Queenie：「我諗住睇侏羅紀世界」
我：「👌👌」
Queenie：「咁我地去黃埔睇，睇2:45個場」
我：「咁不如一齊食埋晏啦？」
Queenie：「好呀，咁我地十二點半係黃埔站C出口等😊😊」
我：「ok」

話説點解Queenie會突然搵我睇戲，我都唔係好明，可能佢當我係佢啲兵仔掛？結果我冇再諗阿輝個件事，反而比Queenie件事打亂左我。返到屋企已經十一點，本來諗住睇陣Youtube先訓，但我費事聽日唔夠精神，最後沖完涼就訓左。





第二日十點左右，我就醒左。阿媽煲左粥做早餐，我食左半碗就算，費事一陣太飽。同隻貓咪玩左半個鐘，我就換衫準備出去，始終第一次同女神去街就唔好遲到。我大約五十分就到左，見到Queenie已經企左係到等我，佢今日著白色Tee配牛仔裙，對美腿睇到我眼都唔眨，Queenie望到我，就向我揮手。

我：「我以為我已經夠早，點知都係遲過你」

Queenie：「我唔鐘意太遲先出門口，結果咪早到左，不過你都唔係遲到」

我：「你買左飛未？未買我地就上去買左先，之後先去食嘢？」

Queenie：「好呀！我知附近有間新開嘅餐廳，我地一陣去試下」





我地買完飛之後，Queenie就帶左我去個間新餐廳食飯。食食下飯，佢突然問我上次唱K早走嘅事。

Queenie：「上次唱K，你同阿輝做咩咁早走？」

我：「上次？個日有個fd飲醉左，我要去接佢走。咁啱阿輝有揸車，咪叫佢車埋我去」

Queenie：「睇黎你個fd都好彩有你呢啲朋友，有事即刻去幫」

我：「我都唔忍心由得佢訓係人地間Bar」

Queenie：「佢對你一定好重要」

唔知係咪我諗多左，我發覺Queenie好似對「我個fd」充滿左敵意，我都唔知點解我會有咁嘅諗法。食完午餐，我見仲有少少時間，就同Queenie行左陣商場，先走返去戲院睇戲。臨入場嘅時候，我除左自己件褸，遞左比Queenie。





我：「費事你一陣話凍，我比你著住先」

Queenie：「唔該晒，暖男」

睇完套電影，Queenie不停同我講返啲劇情，望住佢同個細路女無分別。佢行行下，先醒起佢仲著住我件褸。

Queenie：「比返件褸你，頭先好彩你借左件褸比我，唔係我凍死」

我：「你次次都唔帶褸，都唔知係咪特登？」

Queenie：「你估我好想著你件褸咩！好大陣男人味」

我：「咁我下次唔借比你」

Queenie：「你咪試下囉！」





因為我晏啲要幫堂妹佢地補習，所以我自己走先，而Queenie話想行陣黃埔先走，我就同佢分開走。