在IG上重遇你: 20

第二十章

我同堂妹佢地約左六點上我屋企補習，因為我知呢啲時間Starbuck，Pacific Coffee都一定冇位，加上屋企人去左唔知邊個親戚嘅婚禮，所以今晚屋企冇人，可以俾佢地上黎補習。

去到屋企門口，我已經聽到我兩個堂妹嘅嘈吵聲。一打開門，就見到佢兩個同我兩隻貓咪玩到痴左線，但係我又唔見我阿媽老豆。

我：「你兩個爬窗入黎，做賊呀！」

芷穎：「你就爬窗入黎，係姨姨開門比我地，不過佢地五點幾就出左去」





我：「佢地去啲親戚嘅婚禮姐。好啦，唔好玩貓住，同你地補埋今日，我就功成身退」

芷欣：「係變無業遊民姐」

補習嘅時間過得特別漫長，同中學生補習更加燒腦。補左三個幾鐘，終於將佢地唔明嘅嘢解釋得一清二楚，依家佢地係到複習一次，而我就係到碌IG睇下相。咁啱碌到Bobo嘅個幅畫，我又諗返起個日嘅事。係我諗到入晒神嘅時候，我兩個堂妹又煩我。

芷穎：「堂哥，你個樣好猥瑣，你唔會係到諗埋啲變態嘢？」

芷欣：「死啦，係咪堂哥冇拖拍，唔會連我地都唔放過！」





我：「你地嘅想像力太過豐富，不如用返係溫習上啦」

芷穎：「話説堂哥個日同Bobo姐姐去畫展，冇冇發生咩事？」

芷欣：「係囉，唔見堂哥提起嘅？唔通堂哥又拒絕左人，搞到人地失望加傷心？」

我：「係咪我要報告返比你地聽，我同佢去畫展發生咩事？」

跟住佢兩姐妹不停話我情商低、愛情白痴，仲咒我成世做單身狗。我心諗佢兩個真係好惡毒，竟然想我做單身狗。講講下就已經十點，我即刻送佢地返屋企，費時一陣又比佢地批鬥。臨送到佢地屋企嘅時候，芷欣突然話想去沙灘玩。





芷欣：「堂哥，不如我地星期六去沙灘玩呀！」

我：「如果大伯俾你地去，我咪同你地去囉」

芷穎：「咁不如叫多啲人去啦，順便可以燒嘢食。堂哥，你記住要請Bobo姐姐。」

我：「咁我問下佢得唔得閒先。不過你地記住聽日仲要考試，唔好分心諗住玩」

穎&欣：「知道啦！」

返屋企途中，我係到諗Bobo著泳衣會係點，諗諗下我就撞左落條柱到，搞到我頭頂腫起左，返到屋企仲要比我阿媽老豆笑左好耐，都係咸濕累事！