在IG上重遇你: 18

第十八章

Anthony：「威仔，咁啱嘅，係到做咩呀？」

我：「冇呀，諗住入誠品睇下書。你呢，你啱啱收工呀？」

Anthony：「啱啱係附近見完客姐」佢著住成套西裝，手上攞住杯咖啡，不愧係社會上打滾嘅人。

我：「你依家做緊啲咩，你好似畢業之後冇讀大學？」





Anthony：「係呀，我跟左我親戚做保險，做左差唔多兩年幾。你有冇嘢做先，冇嘅我地搵個地方坐低慢慢傾啦？」

反正今日冇嘢做，我同Anthony搵左間餐廳食晚飯，開頭都係講返大家嘅近況，不過傾傾下，Anthony竟然問我係咪有嘢煩緊

Anthony：「阿威，成晚你都悶悶不樂咁，係咪有嘢煩緊？」

我：「咁你都睇得出！」

Anthony：「你個額頭寫住『我有嘢煩緊』五個字，盲嘅都睇到！講唔講得比我聽先？」





我：「如果…我話如果，你個好朋友叫你幫佢追一個女仔，但你對個女仔有好感，你會唔會幫？」

Anthony：「呢個問題你唔係自己經歷過一次咩？友情同愛情，你自己想揀邊條路？」

佢飲左啖啤酒，再講：「你記唔記得你中四個年，我地班嘅女班長，好似叫Miko，你唔係同佢好熟咩？」

我：「我記得，我仲幫Vincent追到佢添，做咩提返起？」

Anthony：「你個時真心想佢地一齊咩？」我呆左呆，仲唔敢直視佢，因為佢講中左我最唔想提嘅事，一個白痴親手將自己最愛嘅女仔雙手送左比自己嘅好友。





我仲好記得個日嘅事。有一日，Vincent同我講，佢諗係情人節向Miko表白時，我個心同依家一樣非常痛，但我唔敢同佢講。為左等Miko有心理準備，我事先同佢講Vincent想表白嘅事。

我：「你好快會搵到男朋友，以後唔洗聽到你話冇仔生存唔到」

Miko：「你又知我好快有男朋友？唔通……唔通你想向我示愛？」

我：「唔係我，係Vincent。佢暗戀左你好耐，今次鼓起勇氣同你表白，你記得唔好拒絕人呀！」

我見Miko好似冇咩反應，就繼續講：「Vincent係好男仔，讀書又唔差，運動又好，同你好登對呀！」

Miko：「咁你呢？你鐘唔鐘意我呀？」我比Miko問嘅問題嚇親

我：「我…我點可能鐘意你呢！你又粗魯，又唔靚女，依家有人要同你表白，你記得仆去應承」

Miko：「馬國威，我問多你一次，你究竟鐘唔鐘意我？」





我望住Miko對眼已經紅晒，我唔敢望住佢講，淨係敢望住個地下，跟住話：「就算我鐘意你，我都配你唔起，我又唔係讀書叻，運動又麻麻，我唔想…唔想…你揀個差嘅一齊，所以…………」

Miko：「點解你永遠淨係話自己差，人地好？明明你比佢好，你真係要我應承佢？你只要話係，我就即刻應承；只要話唔係，我就同你一齊，你自己揀！」

我：「對…唔…住，我比唔到幸福你，你揀Vincent啦」涙水已經忍唔住流出黎，我已經唔敢抬頭望Miko

Miko：「你認為Vincent就可以比到幸福我咩？既然係咁，我就同Vincent一齊，但我地…但我地…以後都唔好再有交流！你唔好後悔你今日做嘅決定！」

望住Miko走左，係嗰一刻，我好後悔冇拉住佢就放左佢走。我憎死自己係一個咁自卑嘅人，親手傷害左自己最愛嘅女仔，親手送左佢出去。結果，我地去到畢業個日，都冇再講過一句話。

我：「如果我有得再揀，我唔會比佢走。我會捉實佢，同佢講『做我女朋友』」

Anthony：「你自己應該搵到你想要嘅答案！唔好再比自己後悔」