越界的姐弟戀（甜）: 第一部-第十章：約會（二）之初吻

婉婷見我成個人定晒係到，雙眼望到佢實一實，又無反應，所以「喂」咗我一聲，再拍一拍我膊頭。回返神既我，都知道自己失晒態，我尷尬咁應返婉婷：「Hi......我頭先諗嘢諗得太入神，唔好意思呀」。

我再望一望婉婷全身，心諗：「點解無拎袋既？d書呢？」我開口問：「婉婷你啲嘢呢？」婉婷臉上滿露疑惑：「我啲咩嘢呀？」

今次真係黑人問號啦：「Notes同書呀，唔係去溫書咩？！」

婉婷：「邊個同你講溫書架？」

我：「約係圖書館唔係溫書，咁係咩......？」



婉婷：「約係圖書館樓下等就代表係去溫書架咩？」

我：「咁......我地出黎做咩呀？」

婉婷：「你等陣就知」

過咗無一陣，有個斯斯文文、高高大大既男仔行過黎。婉婷一見到個男仔行過黎，即刻橋住我隻手。呢一刻，師傅，我明白了，原黎婉婷係搵我做工具人。第一次面對住咁既情況，我都有些少措手不及，唔知道應該點去處理。婉婷捏一捏我手臂，好淡定咁講：「阿明你唔洗講啲咩嘢，等我講得架啦」

個男仔一行到黎，婉婷即刻講：「呢個就係我男朋友，你而家肯死心啦！？」個男仔都算醒，佢見我成碌木咁，可能都察覺到啲嘢：「呢條友係你男朋友？我就唔信啦！」



跟著落黎呢件事情，完完全全係出乎我意料之外。婉婷轉身面向住我，雙手抱著我頭往下拉，再踮起腳尖，然後親吻我嘴唇。我既初吻......人生第一次唇與唇之間既接觸，呢一種感覺好微妙，有股觸電既感覺。雖然呢一吻只是維持數秒，但婉婷雙唇碰到我雙唇時，時間係呢一刻彷佛停止了，周邊空氣亦好似凝固咗。

婉婷放開我，對住果個男仔講：「而家你信啦？」

個男仔初時個面容係好淡定、好有自信，而且帶一點囂張，但睇到相吻呢一幕既發生後，個男仔臉上轉化成驚訝。個男仔愕然咗幾秒後，然後講咗「你好嘢」三隻字後就轉身走人。而當下既我仲發緊呆，係到回味緊婉婷那柔軟既嘴唇。唔知係咪我錯覺，我竟然更嘗到有少少甜味......

婉婷提高咗少少語調：「唔好發佝瞀啦！」被婉婷叫一叫，我三魂七魄即刻歸晒位。婉婷繼續講：「岩先係情急之下，我先......我先錫你一啖架炸......阿明你唔好當真呀！」唔理係咪真都好啦，作為毒L既我，都已經賺咗。

之後婉婷同我解釋返，頭先果個男仔係第二間中學既學生，由上個月開始就一直纏住婉婷，窮追不捨。呢個行為令到婉婷覺得好煩，為咗令到個男仔知難而退，婉婷就編咗個藉口，而個藉口就係有男朋友。而婉婷根本就無拍拖，何來有男朋友呢。綜觀周圍後，身邊最熟既男仔都係得我一個，所以就搵咗我黎過橋。