越界的姐弟戀（甜）: 第一部-第十一章：約會（三）

其實比婉婷借過橋，我自己本身就唔多介意，就當係幫下朋友姐。而家個男仔都走咗，姐係代表我已經可以功成身退：「件事都搞掂咗，而且我地又唔係溫書，咁我走先啦」。

婉婷唔知係咪覺得唔好意思：「雖然唔係溫書姐，但既然都出到黎，不如我地索性出去行陣街。而且有場戲我想去睇，你當陪我睇？」

橫掂返到屋企都係無咩嘢做，更何況婉婷開口邀請，都無理由拒絕既。就咁樣，我同婉婷就出咗去旺角行街睇戲。其實我同婉婷本身無咩話題，係學校每次傾計都係傾功課，所以全程地鐵，我同佢完全都係無咩講到嘢。

出到旺角後，我地就先去戲院，而套戲正好10分鐘後就有一場，所以我地就簡咗呢場黎睇。而要睇既戲夾岩就係我琴晚同家姐睇果套Avengers 3。本身其實我係想開口同婉婷講我已經睇咗，但見到佢副滿懷期待既樣子，我又唔好意思講。不過算啦，作為忠實Marvel影迷既我，其實睇多次都係無仿。

買咗汽水爆谷後，我地兩個就入場坐底。婉婷坐底後，格仔短裙露出對修長白皙同性感無比既大脾。而且係戲院暗啞既螢幕光線照射下，雙腿更顯得更誘人。咁當然啦，我唔會名目張膽咁睇，都只係間唔中昅一昅。



睇完戲後，婉婷不斷同我傾岩先電影既內容。傾一傾後，我先發覺，原黎婉婷都係Marvel電影迷。婉婷同我一樣都係，只係逢Marvel系列既電影就必定會睇，而且佢對啲角色完全熟悉。離開咗戲院後，我地搵咗間cafe坐底飲杯嘢，之後我地兩個繼續圍繞著Marvel呢個話題傾個不停。

由於無注意到時間同手機，直到傾傾下，婉婷見肚餓，拎起部手機望一望時間，我地先知道原來已經夜晚7點鍾。雖然婉婷叫我同佢一齊食晚飯，但我應承咗家姐返去食，所以就拒絕咗：「今晚我唔得呀，我應承咗家姐返去同佢一齊食夜晚飯」。

婉婷：「咁好啦，不過下次Marvel有新戲，我地一齊去睇！」

我：「無問題呀，難得搵到個同我一樣係Marvel既忠實fans，哈哈」

今次同婉婷出去，可以算係我人生第一次同家姐以外既女仔單獨出街睇戲。而經過今次後，我對婉婷既好感度大大提升。一方面發覺原黎出街衣著既婉婷係可以靚到dum一聲，我今日真係完全被婉婷吸引住。另一方面，女仔會鍾意睇Marvel 已經好出奇，而婉婷竟然仲要係Marvel迷，對啲情節同角色十分熟悉。