前度: may3.3

有晚，公司有同事生日，約左我去唱K飲酒，以我平時既行為，我係飲幾啖，然後專注唱歌，但個晚，我走到間房其中一個角落，自己一個飲住以往覺得好苦既啤酒。

以前我飲啤酒，都係一杯起兩杯止，但個晚，我唔知自己飲左幾多，我只係不停咁往自己個肚不停倒，不停倒。啤酒既苦，對比人生既苦，都唔算好苦姐。

D同事知道我唔妥，只係走黎安慰我幾句，我有聽到佢地講既嘢，只不過扮到好似無留意佢地講咩。
「chris發生咩事阿？平時唔飲既喔。」
「可能係失戀啊！」
「係啊，之前有個女仔經常接佢放工，依家無啦。」
「我聽chris講係朋友黎姐，個女仔依家拍咁拖啦。」



個晚，我帶住醉意離開。
「Chris！洗唔洗送你返屋企啊？」

「唔洗，我自己識坐的士。」

我同D同事揮一揮手就上左車。車窗外係油尖旺燈火璀璨既夜生活，街上既人嘻嘻哈哈，反而車上既我，顯得更加孤獨落寞。由於的士開得好快，我有D想嘔既感覺，我忍住依種感覺，直到屋企樓下。

：嘔⋯⋯

我將成晚食過飲過既嘢，完完全全嘔係條街度，蹲坐係路邊。我唔知自己嘔左幾耐，我只知道自己無守到過去一個誓言。我曾經係第二次戀愛失敗，就同自己講。



「chris，你以後唔可以再為女仔喊。」
我守住依個誓言，過左幾次戀愛。

但今日，酒精過後，不安既情緒圍繞住全身，估唔到誓言幾年後，我會破戒，會再嚎哭一次。坐係屋企樓下，吹住大風。如果個刻有人係旁邊經過，可能會以為我係傻仔，可能會俾人拍片擺上網。

依一次，我唸我喊左應該有半個鐘以上，依一次既喊，我無講到俾任何人聽，如果bobby知道我曾經係街度痛哭無講俾佢聽，應該想鬧X死我。

我相信，今次，應該係最後一次，最後一次為女而喊。喊又喊完，嘔又嘔完，人點都要放低，點都要繼續生活。



幾個月後，bobby個死仔終於再次拍拖，經歷上一次bobby既極品極品極品港女後，佢終於搵到個真係真心真意全心全意對待佢既人，我都好替bobby開心。

係Bobby未拍拖追咁女仔既時候，我又做左bobby既愛情分析師（D人真係好鐘意搵單身狗黎分析）幫bobby瞭解佢女女既情況，每晚傾兩三個鐘，我依個做兄弟既，算係咁啦。

Bobby係instagram顯示拍拖個一晚，我收到個久違既whatsapp，已經無覆好耐既whatsapp再一次跳動。

May：12:10 Bobby都拍拖啦，你呢？

我望一望手機螢幕既顯示，然後放低手機係檯上，靜靜咁行返入間房。




完