前度: may3.2

坐上的士返旺角既途中，May一直拖住我隻手，我依一刻覺得自己幾幸福，但我望返May，佢塊面反而有更多憂愁，更多嘢要唸，如果的士可以食煙，我相信May會毫不猶豫咁點枝藍莓8。

我落車，然後同May揮完手就走入返公司，我將個晚既事講左俾Bobby聽，Bobby係電話裡面發出羨慕既叫聲。

「X你，兄弟，你就正啦。」
「正咩啊？佢可能已經同個男仔拍拖啦。」
「下⋯咁你地都已經撲埋喔，唔係一齊左咩。」
「唔係啊⋯佢依排仲約個男仔啊。」
「唔掂喔兄弟，你唔甘心就快D追返阿May啦。」
「我有啊⋯我send左幾個whatsapp，佢到依家都係不讀不回啊⋯」


「咁就真係大鑊啦⋯」

望住whatsapp裡面自己打個幾句嘢，佢已經幾日都無睇，幾日都無覆⋯我唸，佢應該係拍拖啦，直到一月份⋯

佢係instagram祕密AC度po左張同男仔親吻既合照，我嬲到丟手機。我嬲唔係因為無選擇我，而係嬲佢最後無同個男仔一齊，反而同左一個我完全唔知既男仔一齊。

我第一時間打左俾Bobby。
「喂，兄弟，發生咩事啊？」
「May佢拍左拖啦⋯」
「我都估到既啦⋯」


「唉⋯」
「兄弟，你唔會係動左心啊嘛？」
「算係掛⋯我依家好唔開心。」
「X你個撲街，叫X左你唔好對佢用心啦，你又唔X聽，依家好啦，自己傷心死啦⋯」
「Bobby，陪我去老蘭好唔好？」
「兄弟，你終於肯陪我去老蘭啦？」
「係，我想去個度玩下。」

Bobby連續幾晚陪我傾計，慢慢咁樣開解我。



於是，我22歲仔，第一次走去老蘭，第一次走去同人跳舞，一入個場，兄弟Bobby就即刻講嘢。

「chris，個度有兩條女係咁望我地，你快D上啦，等你好消息。」
「唔好啦⋯我今日只想飲酒。」

我飲左半杯後，走左出去同Bobby係舞池跳舞，係燈光照射下，係吵嘈既音樂聲底下，係酒精麻醉下，我將不愉快既感覺忘記曬，不停係舞池度On99咁跳舞。

我真係想忘記依件事，好好咁醉一次，但今次我無醉到，我費事要Bobby送我返屋企。

「兄弟，多D出黎玩啦，你好快就會忘記May既啦。」

「嗯，我會忘記佢既啦⋯」

返到屋企，我望一望手機裡面既whatsapp，佢，終於睇左我之前搵佢既說話，不過係，由不讀不回轉變成已讀不回⋯



我睇到依度，深深咁嘆左一口氣。
（chris你個撲街，真係要忘記May啊你）

原本打算唔再理May既時候，May突然又再whatsapp我。
「chris，我想去台灣讀書，你覺得點啊？」

唔爭氣既我，最後我都係覆左May。
「無論你決定點，我都會支持你。」

於是同May又再傾左一陣，最後佢又再次無同我講句再見、晚安，選擇左已讀不回。

唉，真係要打自己兩巴先得。