<<坐上前往尖沙咀的天星小輪，迷失在維多利亞港>>: <<迷失十二>>

「李樂彤佢問咗你咩問題？」我緊張地問。

「佢問我：『我係咪一個好失敗嘅人？』」周博士淡淡地說出這番說話。

「你......你識佢？！」我為周博士的說感到既驚訝，難道從一開始，我們這些人之中，就是有某種關聯。

「唔係，我唔識佢。」周博士的回答，卻令我十分失望。

「唔好信佢呀，如果佢哋唔識，李樂彤又點會問一個陌生人自己係咪好失敗？佢一定係扮嘢。」阿萍還真的沒有放過任何一個能針對周博士的機會，只是，這次她說的，也未嘗沒有道理。





「我信佢。」明叔聽到阿萍的說話後，反而肯定了周博士的說話。

「我都信佢。」想不到，阿華亦贊同了明叔的意見。

不過，只要冷靜下來想想，周博士的這番說話，的確比之前所說的任何一句都還要可信。

「你哋係咪傻咗呀？佢之前點對我你哋唔記得啦？佢為咗目的可以不擇手段㗎！
」阿萍仍不死心。

「周博士嘅說話聽起嚟好無稽，不過，正正因為咁樣，我先信周博士講嘅嘢。」我也附和了明叔和阿華的說法。





「雖然周博士之前嘅做法我不敢苟同，但佢之前都提到，如果今次嘅情況係一個實驗，佢絕對唔會將自己放入嚟。試問一個咁理性，又聰明同顧及自己嘅人，點會特登講一啲咁無稽嘅說話嚟引人懷疑。」為了令餘下的人都能夠認同周博士的話，我只好充當中間人進行解畫。

「哈，你太抬舉我啦，如果我真係咁理性，我就唔會受到佢嘅說話影響。不過，亦都係因為佢嘅說話，先令我意識到，到底點解會出現老化。」周博士伸出了右手，雖然不明顯，但明顯能看到老化正在蠶食著她的右手。

「周博士？！」我們都吃了一驚，當中最為震驚的，卻是阿萍。

「明叔你講得啱，我發現咗老化嘅規律，不過唔係因為李樂彤，而係因為我自己。」周博士語帶嘲諷地說。

「點解......」阿萍驚訝得說不出半點話來。





「我都估唔到，竟然會因為你一兩句說話，而令到我變成咁，係你贏咗啦。」周博士語氣十分平靜地對阿萍說。

「我......我......」阿萍看來還無法從震驚的心情中回復過來，不過這也能理解，畢竟她可是間接地令周博士變成這副模樣。

「你唔駛咁驚訝喎，我只係回歸去我應該去嘅地方啫。而且，你哋好快都會變到同我一樣。」周博士不帶半點情感地說出這番說話，反而令人感到話裡的真實性，她是真心認為，我們都會變得跟她一樣。

「我知錯啦！我唔想死，我唔想變到好似佢哋咁！我仲有屋企人要照顧，我仲要返去陪佢哋，求下你放過我啦！」阿萍激動得跪在周博士前痛哭起來。

「我諗你搞錯啦，唔係我要你哋死，我亦都做唔到啲咩。你哋之所以會喺度出現，都係你哋自己選擇......應該咁講，係你哋放棄咗自己，先會嚟咗呢度。」周博士扶起了阿萍，言語間不帶有任何感情，就像......陳述一件理所當然的事情一般。

「我無......我無放棄自己......我無......」阿萍哭著說。

「算啦，有無放棄自己，相信你哋心知肚明。不過我都無資格講啲咩，因為我自己都一直扮無事，扮到一個地步，我以為自己已經拋開咗過去，點知......原來我一直都無忘記過。」周博士說話的同時，我們都注意到，她的老化正在加劇。





「周博士，既然你已經知曉一切，我想知究竟係咩原因令我哋老化，同埋有無咩方法避免？」我內心其實還有很多疑問，不過眼下只能爭取時間去問最重要的部份。

「呢層......我唔可以講。」周博士欲言又止，竟說出了一個令眾人不能接受的答案。

「你係咪痴線㗎！又話咩知道咗規律，又話我哋會死，到頭嚟問你你話唔想講？」阿康激動地說。

「唔係唔想講，係唔可以講。」周博士向上指了一下。

「你係指......有人唔畀你講？」我問。

「嗯，真相，只有開始步入死亡嘅人先能夠知道，而知道一切之後，我係無辨法講任何嘢。如果我講出嚟，就會好似李樂彤咁，加速老化而死。我諗，你哋應該有好多嘢想問我，都唔想我咁快死啩？」周博士笑了笑，然後我們都注意到，原本正在老化的她，竟然停止了老化。

「你......老化有辨法停落嚟？」我們驚訝地問。

「呢個？只係暫時性，只要我哋一日搵唔到方向，最終都只會老化而死。依家我只係暫時有咗目標，老化先會停低。」周博士跟李樂彤都有提到，我們都是失去了方向的人，看來這是我們解決這事件的關鍵。





「我想知道，你有啲咩係可以同我哋交代。」既然無法知道她能說出哪些事情，倒不如反過來讓她把能夠說的都說出來吧。

「哈，好古惑嘅問法，不過我鍾意，但係......事情都好複雜，我應該由邊度講起好？」周博士低頭沉思了一會，然後又抬起了頭。

「就由呢個神話講起啦。」周博士指著船柱上的圖案，臉上露出奇怪的笑容。

到底，這神話跟我們現況有甚麼關聯呢？