上左個肥婆身, 好難移動呀: 第三十章: 開戰

「媽.....」我望住katy姨嗌。我係佢個女因如，佢點會忍心唔救我。
「katy！你清醒啲，佢唔係你個女，佢係陳心如！」媽咪露出勝利既笑容，同我講:「所以話你頭髮長見識短.....死左都唔知道...薑都係老既辣。」
「你以為你識揾人查我，我就唔識？你個偉言食緊兩邊茶飯，你又知唔知？」
仆街！原來係偉言！！佢真係岀賣我！
「揾到山田理香又點，你以為你推佢岀黎講比爸爸聽佢就會信咩？」趁佢講緊，我偷偷地雙手係後面，㩒着左johnny比我支錄音電筆。
「我地三個人三把口，你估爸爸會信邊個？我係咁而整份報告岀黎話山田理香有孖生姊妹既話，佢咪一樣冇得翻身。虧你重話係我個女，小小腦都冇。」
媽咪不屑咁向我吐左啖口水。katy姨好心急咁問:「幾時幫我整走佢岀黎呀？唉死都死得麻q煩過人，仲要搞埋我個囡，你話你係咪累人累物！」
你又點會估到，呢個世界上最想你死既人，就係你朝夕相對既屋企人。
「得啦，阿ming佢幾辛苦先幫我刮到隻野上左你個女身，佢一早比左支野我，話咩鬼都打得散！」
ming？莫非果個好岀名既風水佬蘇文明？！




媽咪慢慢咁係手袋度拎左佢話既果樣野岀黎....
係....奪魂棒.......
不過呢支比起伯母果支，多左更多符文同圖案，莫非佢果支.......威力仲勁啲....？
今次.....睇黎....真係必死無疑.....

「杏子！katy！幫我㩒住個死女包！」
媽咪一聲令下，佢地兩個即刻就過黎想捉住我。
門外面開始有撬鎖聲。
「心如！你頂住呀！我好快入到黎救你！你班仆街！我女人少左條毛都唔會放過你呀！」
係johnny把聲....死之前可以聽到你叫我做你女人...都算係此生無憾.......




聽到johnny撬鎖之後，杏子開始衝過黎想㩒住我，但佢瘦到條籐咁邊係我對手。媽咪拎住支棒想打我天靈蓋果陣，我即刻一個反身捉住杏子擋左一棍！
「呀！八婆！你想我死呀！」杏子一臉憤怒咁睥住媽咪。
係呢個瞬間，我一下拎左支電筆岀黎，一下電暈左杏子。
媽咪見到我有武器，顯得更加小心。
katy見到杏子咁樣，一早驚到嗌左岀黎，郁都唔敢郁。
媽咪開始小心翼翼咁拎住支棍衝過黎，一野劈落黎，我轉身避過，但手臂都重重食左一棍，手上既電筆隨即跌左落地。
「你以為....你可以鬥得過我咩？」媽咪得意洋洋咁一手㩒我落地，再手起棍落咁想劈落我個天靈蓋度。
「媽咪，你唔好忘記，我係你帶大嫁。」我伸手拎起腰間既既小刀，一下插落佢大脾度。
「呀！！」媽咪手上既奪魂棍一下跌落地，我拎起隔離書櫃跌岀黎既硬皮書，一下扑落佢後頸，佢即刻失去左知覺。
「呢一刀！還翻比你！」




Johnny聽到媽咪慘叫之後，岀盡左蠻力，一野撞左落黎。
佢一開門見到我仲生勾勾坐左係度，而媽咪同杏子已經冇左知覺攤左係度。
佢激動到衝過黎一手抱住着我。
「好彩.....好彩你冇事.....頭先真係嚇死我....」johnny驚魂未定咁抱實我。
「小心！」johnny突然一下扯左我去第二邊，再一下擋係我面前。
係我未知發生咩事既時候，我已經聽到一下清脆既聲響...
「啪！」
johnny既天靈蓋.....
比katy手上既奪魂棒扑左一下....