上左個肥婆身, 好難移動呀: 第二十八章: 真相
「伯母，你記得幫我保守秘密。唔好話比johnny知我冇左一魄既事。仲有，千其唔好比佢知阿dom用奪魂棒打過我。我驚佢唔知會做啲咩事岀黎。」
「心如....好....我都想我個仔好既...」伯母鼻酸酸咁索左兩下鼻，哽咽住咁答應我。
之後我用伯母電話打比johnny，佢電話入面聽到我把聲異常激動，不停哽咽住咁問我呢三個星期去左邊。
我知電話另一邊既呢三個星期受左唔少苦....聽到佢竭嘶底里既聲...我個鼻好酸。
我係電話入面對佢講，我搞掂完所有野會再翻黎揾佢，以後都唔會再離開佢。
佢先安靜左落黎，肯乖乖收線。
伯母聽到我個大話，一臉憂愁咁問:「心如.....你一個星期後就走....你咁呃住佢，我驚個衰仔到時接受唔到......」
放心啦伯母....我心入面早就盤算好，你個仔一定會冇事。
話咁快，伯母就揸左架車去阿dom屋企門口。阿dom屋企係一棟單棟式別墅，市值非凡。我同伯母停左架車之後，就行左去佢屋企㩒門鍾。
岀黎開門比我既....唔係阿dom....係fafa.....
「咦..因如你黎揾阿dom呀？dom仔我趕住去補習走先啦！你地慢慢！」
阿dom見到係我同伯母，即刻大為失色咁過左黎解釋:「心如...你而家係心如...？好彩冇事...頭先fafa上黎.....同我傾project咋....」
伯母一臉憤怒咁望住呀dom:「我支奪魂棒！拎翻岀黎！」
阿dom理虧咁望住伯母，之後咬咬唇慢慢係褲後袋拎左支棒岀黎.....
就係佢.....令到我冇左一魄......
伯母一手搶過支棒，之後雙眼通紅歇斯底里咁鬧阿dom。「你知唔知亂用我手上呢支野後果有幾嚴重！佢可以奪走世間上任何野既七魂六魄！點解你要偷！點解你要咁做！你知唔知心如佢」
我捉實伯母，示意佢唔好再講落去。
伯母一諗起我既遭遇，行埋一邊又忍唔住喊起上黎。
阿dm一臉茫然咁企左係度。
我過去拉埋佢行開一邊。佢好緊張咁問我:「我從來都.....冇見過伯母咁樣......我知呀.........我知果支野威力好大.........所以我都好輕手啦........」阿dom一邊講，一邊哽咽起上黎。
「我唔咁樣做..........我留得住你咩........？我唔想見到你去揾佢........唔想你再走多次.........我先岀此下策.......我先揾人查佢，再cut過段錄音想你對johnny死心........對唔住呀.......好彩你最後都冇事.....」
我一路拍佢膊頭，一邊安慰佢。
「dom，我冇事啦而就係翻度，冇人怪你唔洗驚....
點解你唔直接同我講....係都要諗埋呢啲對策攻擊人？明明以前你唔會咁....」
「係...fafa教我咁做....佢話，如果你真係愛一個人，就要盡你能力，不擇手段咁得到佢。果時係成個腦都諗唔到野，我就照佢說話做...」
我見到佢咁痛苦既樣....我冇嬲佢.....反而係好難過.......
佢因爲我比痛苦一直深纏，先會搞到自己泥足深陷。
我温柔咁摸摸佢個頭:「似翻個男人，唔好再喊。今次就算啦，下次我真係嬲你嫁。」阿dom聽到我咁講，終於好似釋放左咁破涕為笑。但係佢永遠唔知道...
已經唔會再有下一次。
平伏完心情，阿dom帶左我去一間好隱密既房，㩒左幾下密碼就帶左我入去。
「因如......」
「理香姨.......」
入面坐係病床既理香姨已經回覆翻精神，認到我係因如。我地即刻攬埋一齊，激動到喊起上黎。
理香姨慢慢放開我，開始問翻我屋企情況，重問起心如，姐係我點樣。
「心如佢....已經死左。」
理香姨聽到之後，痛心疾首咁喊起上黎。
「都係我........都係我冇用.....最後都阻止唔到呢個結局....」
「理香姨...你可唔可以話我知，你係咪知心如點死？」
理香姨一邊喊住，一邊斷斷續續咁話我聽:
「心如佢........其實唔係阿媚親生。你老豆係娶阿媚之前，本來重有個大婆，但生完心如之後就難產死左。
你老豆好愛個大婆嫁，所以唔想你一岀世就冇媽咪，就將你比左佢第二個老婆阿媚湊。
邊有女人鍾意第二個女人生既女...所以佢一直好唔願意咁湊大你....而佢自己偏偏就蛋都生唔到粒..」
原來.....我媽咪真係唔係親生....唔怪得由細到大都冇攬過我，亦都好少理我。
「後來我同katy入左黎，都各自生左杏子同你。但你爸爸永遠都最着緊心如，偏心寵佢一個，重有打算將公司交比佢....」
係既....爸爸一直都特別寵我。可能想補償翻我岀世冇親生媽咪既遺憾。
「杏子佢一路都好不滿....佢開始會成日過黎同我抱怨，爸爸點唔重視佢....又會埋怨我係屋企冇地位，先會搞到佢唔比人重視.......作為一個媽咪，聽到個仔咁講，個種心情真係好複雜。
直到有一次，我見到我個仔同阿媚入左房。我覺得好奇怪....阿媚幾時同我個仔咁熟...結果我偷聽到......佢地既計劃....」
「計劃？....關於心如？」
「係....佢地當時已經密謀緊.....點樣殺心如....杏子果時同阿媚做左交易，只要杏子上到位接手公司 ，將來你老豆死左，佢會轉讓40%既股份比佢......
點知我聽到一時受驚，一唔小心撞到隊門......結果就比佢地屈我死左，一直收埋我。」之後理香一直攬住我喊....
估唔到佢兩個....原來係咁早之前已繼計劃好唒....
「理香姨....放心啦，我一定會還你一個公道。」
果晚之後，我比理香姨好好休息一晚，再同伯母商量下一步點做。
「伯母，不如我地揾johnny商量下先...始終人多好辦事。」伯母都表示贊成。
我地交代阿dom好好照顧住理香姨，就揸車翻翻去伯母屋企。
一入到門口，我已經見到johnny坐左係梳化等我。
佢成個人真係....憔悴左好多好多....個人起碼瘦左個圈，雙頰凹陷，黑眼圈大到好似幾日冇訓覺咁....塊面既鬚已經生到一個長度冇整理過，頭髮都係亂糟糟....
枱面上全部都係啲垃圾速食既包裝....
成個人人唔似人，鬼唔似鬼....
呢個月.....佢究竟.....係過住點既生活.....
佢望見我，忍住激動既心情行左過黎。
我以為，佢會好似係電話入面咁，狠狠咁鬧我。
但佢冇岀聲，只係緊緊咁抿住嘴唇邊咁震....然後輕輕咁攬住我...
「翻黎就好。」