上左個肥婆身, 好難移動呀: 第二十六章: 奪魂棒

阿dom好震驚咁見到因如個身體已經變左個軀殼，完全冇反應。佢四圍張望，但都睇我唔到。
事實上我只係攤左係因如隔離...佢果支究竟咩黎.......只係比佢咁輕力扑一下，我而家都已經全身冇力，想走岀門口都好難...
但岀左肉身之後，我開始見到身邊既靈魂，我望向因如個軀殻，入面確實係有一粒光係度，莫非果個就係因如沉睡緊既靈魂？點解我走左佢重沉睡緊？
阿dom荒張失措咁向住空氣講:「心如...你重係度嫁可？我咁輕手照計你個魂應該唔會散...你等我，我搞掂理香之後會再翻黎揾你，放心，你係呢度會好安全，當比自己放個假...我一定會翻黎。」
講完佢就拎埋支棒，岀左門口。
淨翻我，同因如係呢個死氣沉沉既屋入面。

就係咁....我攤左係度成兩個星期.....每次我想行岀個門口都變得異常辛苦...每一步都舉步維艱。次次都撐到岀門口兩步就冇力再行岀去....
呢度了無人煙....連靈魂都冇多個......成兩個星期淨係得啲動物走過.....
係第三個星期，我終於勉強掙扎咁爬左岀屋外面.....




無論人定鬼....
有冇人.....
可以救下我..........
白光.....
前面.....我見到......有白光........
係johnny媽..........佢慢慢咁拎住盒西餅行緊過黎....
「伯母.....救我......救我呀.......」我不斷發岀微弱既呼叫，希望佢望到我。
伯母好似聽到我呼叫咁，但就係望極都揾我唔到....
「伯母....呢度呀.....」我用盡我最後一分力，向伯母招手。
終於，佢望到我軟弱既手，即刻跑左過黎。




「心如！心如！陰公點解你會係度！點解你會搞成咁！你個靈魂....透到得翻半個咁.......怪唔得之我睇你唔到！」伯母心痛咁跑過黎抱住我 。
「阿dom....佢....有支棒....扑左.....我個頭......」我微弱咁發岀呼叫。
「你唔會同我講.....支棒岀面刻住符文同好多古怪圖案，成支狼牙果支掛......」
我點一點頭。
「阿dom佢竟然....佢明明知道呢支棒有幾恐怖.....唔怪得我支棒唔見左.....原來上次同佢講完支棒之後佢偷左.....」
伯母憤怒咁咬咬牙，再同我講:
「果一支，係靈宮入面有職位既我先有既——奪魂棒。我係人世間負責處理唔同遊魂既事，所以先有一支。但係我從來都冇用過.....
因為佢殺傷力太大，唔到有生命危險我都絕對唔會用。
奪魂棒有住非比尋常既靈力，專門對付一啲惡毒既靈魂罪犯。只要比佢大大力咁打一下個天靈蓋，即刻會魂飛魄散，七魂六魄會即時四分五裂......
同時代表佢....再冇投胎既機會....」

「伯母.......我係咪......就魂飛魄散......」
伯母心疼咁安慰我:「傻女，你魂飛魄散左就見我唔到啦.....阿dom佢冇岀盡全力打，代表你個靈魂仲保存到......
但要點處理....我真係未遇過....睇黎我要同你去一轉靈宮。」
講完之後，伯母雙眼合埋....隔左陣我見到佢個靈魂慢慢岀左黎......
之後佢抱起我，用手指成個dr strange咁開左個空間岀黎....
入左個空間之後，我身處既再唔係山頂....而係....咦？
「昵度.....入境處黎？」
我見到係呢個白色既空間入面，好多個唔同counter，每個counter都有人坐係度幫排隊既人檢查佢地既......passport？定咩黎？我睇唔清楚....
「傻妹，呢度係轉世區。全部死左既靈魂，都會過黎呢度轉世。
而軀體既分配就係睇佢地手上本入世簿，入面會記錄底呢個靈魂上一世有冇做過啲大奸大惡既事，再依據佢地成世人既分判幾佢下世用人既軀體定畜生既軀體。」
咁坐係counter既人...係咪姐係死左都要翻工.....
「呢....坐係counter班人好忙嫁，又要檢查入世薄，又要安排軀體又要消除記憶先可以比人投胎。不過係度做既多數係入世簿分數太低，所以先做工去拎翻啲分數先投胎。」
原來人真係要為自己做既所有事負責....
伯母揹住我行左去另一邊，入左一座寫住靈院既建築入面。莫非係靈魂醫院咁解？




「阿詩，咩風吹你上黎呀？」
一入到去，個reception一望見我即刻呆左:「哇！你一黎就整件咁urgent既！」
之後佢就急急腳咁安排左我入病房。
黎睇我既，係一個望落似50歲阿叔既醫生，望落好似經驗老到咁。佢望一望我，鄒住眉頭咁講:「搞唔掂.....搞唔掂.......」
「你咁講咩意思呀.....」
「你要有心理準備.....我冇估錯的話...係奪魂棒係咪？」
我掙扎住咁講:「但係....佢......只係........好輕力..........扑左一下咋.....」
「妹妹....呢個唔係力既問題。問題係，呢一下.....你唔見左一魄。
你而家...得翻七魂五魄。」