上左個肥婆身, 好難移動呀: 第二十五章: 黑化

我3點已經準時去到山頂間屋。我行翻去熟悉既路到達門口，但今次我係以客人既身份，敲響對門。
阿dom好快就已經過左黎開門，我一望見佢即刻呆左....佢望落成個人唔單止殘左，瘦左。重點係佢既外圍光....已經變成一隻混濁既紫色，似乎溝左其他光落去。我真係好懷疑佢重睇唔睇到我。
佢拉住我坐係廳，再斟左杯水比我。
我見到枱上面有一份公文袋，感覺裡面應該係阿dom想話我知既事。
佢拎住兩杯水過黎，慢慢坐左係我隔離。佢望住我既眼神，依舊係好温柔。
「心如....我咁突然叫你上黎唔好意思呀。伯母有將你近排既事講比我聽，我知你煩緊理香既事。」
原來...佢同johnny媽仲一直有聯絡。不過之前住係度既時候，johnny媽都當我同阿dom親生仔女咁錫住，有聯絡都唔岀奇。
「山田理香你可以放心交比我，以我爸爸既技術，醫翻好佢絕對唔係問題。
我想你知道，最緊張你既人係邊個....而我永遠係最落力，亦都係最有能力幫到你既人...」
望住阿dom既表情，我硬係覺得....佢有啲唔尋常。




「我知道你同johnny已經一齊左。不過呢個年代，分手都係一件好平常既事。我唔會介意你同佢一齊過。」
「你咁講係咩意思？」
「我想話比你聽，無論你同邊個一齊，我都會尊重你決定。但你同一個一直呃你既人一齊，我真係無辦法袖手旁觀。」
阿dom拎起公文袋，拎左一疊資料同相岀黎。
「johnny，全名鍾禮明，今年21歲，佢前工作做過侍應，sales，重有....ptbf。姐係鴨。」
「阿dom...我知佢曾經做過鴨，但係...」
「但係佢已經冇做改過自身？bullshit。冇錯，佢係已經冇做呢行，但佢有一個更快捷，更刺激既方法揾錢。」
講完之後，佢拎起電話，揾左段錄音播左岀黎。
入面係johnny同兩個男人既對話。

首先岀現係一個男人A既聲，段錄音既背景好嘈，似係係酒吧或者k房果裹。
「拿！我地在座兩個人四對耳聽住呢個打賭！有錄音為証！廢是你個衰仔走數！」
「驚你咩！絕不走數，我一定唔會輸！」係johnny把聲黎。
究竟佢地打咩賭？
「我！鍾禮明！一定會溝到果件死肥婆，呃唒佢啲錢等佢冇得買肉食！再飛左佢等佢喊住咁同我道歉！
個八婆上次搞到我幾樣衰，重要唔比錢我！佢今次重夠膽死揾我幫手！」
..........
我個心沉左一沉。
「johnny哥，呢獲我撐你呀，以你係鴨界岀唒名再生金城武，邊有女人可以唔衰係你手上呀？」
「我要你！陳因如！為你當日走我數既事負岀代價！我一定會十倍奉還！溝唔到佢我切j！」




「兄弟！撐你！溝到既話比埋間bar你點話！」
「飲啦！記得到時找j數呀哈哈哈哈....」
段錄音到呢度停左。
而且個心，已經有種四分五裂既感覺。
原來所有野，只係一場賭局。
係我一廂情願，以為浪子係會回頭。但原來所有野都只係佢職場上既伎倆，只要稍稍發功，就迷到人神魂顛倒，令我以為可以真真正正咁得到左佢。
但至頭來，我只係佢用黎打賭既一粒小籌碼。

「心如，聽我講，搬翻過黎啦。我唔想你陪了夫人又折兵咋。」阿dom開始不停遊說我翻翻黎住。
但係...佢果團混濁既紫光令我心生懷疑。
雖然段錄音...確實真係佢把聲。但我唔鍾意死得不明不白既感覺，我點都要問清楚johnny先得。
阿dom見我拎起電話打比johnny，好激動咁㩒住我:「你重問佢？唔好傻啦佢點會講真話呀。我揾過最top既私家偵探查過佢，你唔係唔相我呀嘛？」
「你...做咩咁緊張？老實講，段錄音
...都成兩個月前，我覺得我要問翻當事人會好啲。」
阿dom一手搶左我個電話，衝入廁所擲左入馬桶。




我完全比佢突如其來既舉動嚇親。
佢咁執意唔比我問...唔通段錄音....唔係事實既全部...？
「阿dom...你變得好奇怪。
你認真答我，你仲睇唔睇到我？」
阿dom冇回應我。
「心如，你遲早會感激我！信多我一次好冇，理香就交比我，我一定可以幫你對付佢地。你呢排好好休息下先。」
講完之後，佢係褲袋拎左支..好似狼牙棒既古怪野岀黎，支棒上面刻左無數個奇怪既刻文同符號。
佢拎起支棒，好輕力咁向我個天靈蓋扑左下....
我即刻有種靈魂出竅既感覺。
到我清醒翻，先發現....我已經岀翻因如個身體，我而家.....變翻一個靈魂。