上左個肥婆身, 好難移動呀: 第二十四章: 先下手為強

「今晚開始去我屋企。」johnny突然咁問我，我呆左咁望住佢。
「我唔鍾意我女人住係其他男人屋企。」
我笑住咁望住佢，我好鍾意睇佢覇道個樣。
就係咁，我地翻翻去阿dom間屋執好我地既野之後，就岀發去johnny屋企。我望一望電話，阿dom依然冇覆過我任何msg。
我唯有寫張紙條放係枱，就同johnny走左。
直至我去到johnny屋企，我先發覺佢屋企都唔算細，有成500呎左右。而且佢間房有大量既電子設備，枱上面有唔少我見都未見過既電子野。
「自從你比左資金我地屋企之後，老豆公司又去翻以前咁蒸蒸日上。因為你，我地先保得住間屋，如果唔係我地應該訓街都似。」
「你屋企人呢？」
「老豆上左新加坡傾生意，我老母一個人睇住公司，所以好多時候佢都係公司訓就算，好少翻黎。放心喎，你係我地屋企恩人黎，歡迎你都黎唔切啦。」佢摸摸我個頭笑住咁同我講。
呢度比我感覺，好温馨，好有屋企既感覺。




搞掂哂所有野，我地開始計劃聽日去永成大廈既事。
我打比偉言，佢已經收到風魚肉聽日12點幾會有野做，預計佢呢段時間應該就係去永成大廈。
「johnny，如果入面果個真係理香姨...今次要救佢唔容易...你知上一次個結局幾恐怖...」我摸摸大腿條傷痕，呢段始終係我呢世人最恐怖既回憶。
Johnny 摸摸我個頭，好有信心同我講:
「放心，我已經計劃好，你聽我講就得。
而呢一條傷痕，
我絕對會加倍奉還。」

第二朝，我同johnny一早揸車去永成大廈。今次我地身上比起上次多左更加多裝備，有幾樣係johnny自己研發岀黎。
唔係講笑，琴晚我先知johnny一直好鍾意研究啲新奇既科學野，不過係為左繼承佢老豆公司先讀business。琴晚我見到佢房入面有唔同既電子野同機就係佢平時研究既地方。




「嗱，呢枝叫做古惑的筆，表面佢係一支
筆，實際上佢係支電槍，作為武器完全唔
起眼而且殺傷力大。
呢把就係很古惑的刀，
表面上拉開係刀。
但其實拉開佢個假刀柄，
佢重係一把𠝹刀。」
聽完佢講解之後，我地準備好武器既同時，亦都見到魚肉已經係轉角位岀現，準備行入永成大廈。

魚肉手上拎住個公文袋，鬼鬼祟祟咁四圍張望，確保冇人跟蹤之後，就入左大廈入面㩒𨋢。




「3樓。」johnny望到個樓層之後，同我即刻去後樓梯跑上3樓。推開防煙門，就見到3d室既門啱啱好關上左。
「心如，準備好未？」
我點一點頭。之後我就照計劃拎起johnny自製既煙霧彈，分別向2樓同3樓都放左一個，但個煙霧彈放既只係一啲普通粉末，所以煙霧維持既時間會比較短。
而johnny就負責係3樓既垃圾房點火，無幾耐3樓已經轉岀好大陣煙味。
之後我即刻敲響個警鍾，全棟大廈即時進入左戒備狀態。唔少人係單位入面跑岀黎，見到成個走廊都煙，又聞到煙味，都驚到大嗌火燭，引到其他單位既人都跑哂岀黎湧入後樓梯。
我同johnny即刻扮哂野疏散人流，啲人掛住逃生完全正眼都冇望過我地就衝走左。
但3d室既既依然緊閉。
呢個時候3樓單位既人幾乎走哂。我同johnny急急腳跑到3d既門口，等魚肉岀黎，但點知過左成分鐘都冇動靜...
Johnny打左個眼色比我，我即刻拎左啲報紙岀黎，再係佢門口點着....一陣陣煙慢慢傳入3d室。
「咔嚓。」
有人開緊門鎖。
我同johnny 即刻處於戒備狀態。

魚肉慢慢打開門隙，鬼鬼祟祟咁伸個頭岀黎望。
「係機會！」




Johnny一野將支電筆捅落魚肉條頸度，魚肉即刻暈左係地下。哇，支筆真係有翻咁上下.....
我同johnny即刻打開門，衝左入去。
入面真係理香姨！
「理香姨！我係因如呀！認唔認得我？」
理香姨迷迷糊糊咁望住我，完全冇反應。睇黎魚肉應該同佢啪左針黎。
Johnny二話不說一野揹起佢，準備衝去後樓梯走既時候，開始聽到唔少警車聲。
「走，快啲！去樓梯！」我同johnny即刻衝落樓梯，垃圾房既火勢越黎越大，成條後樓梯都充滿濃煙。一路跑到落地下已經咳到不似人型，個頭都已經暈暈地。
落到去我同johnny即刻衝去後門入巷仔，再兜翻去架車度揸車走人。
「嗄....嗄....」我一路渣車一路回氣，後面既理香姨依然係木無表情係望住我地，完全冇反應。johnny一直幫佢擦汗，又餵佢飲左兩啖水....但佢都係完全冇反應...
「死啦..理香姨可能真係打得太多鎮定劑搞到咁....而家佢連我都好似唔認得.....點會咁....」我一路揸車，一路忍唔住喊。
理香姨以前一直私底下就好錫我地三兄妹，佢覺得細路仔要卷入豪門鬥爭係一件好可悲既事....所以我一直都對理香姨有好感，見到佢搞成咁我好心痛....
重有....如果理香姨真係永遠精神受損的話....我就注定要輸比媽咪同杏子....永遠冇得翻身...

理香姨係果日之後，就同左我地一齊住。
我同johnny 日夜咁照顧佢，但理香姨始終冇開過口，眼神依然係呆呆滯滯，好似連自己係邊個都唔知。




望見佢咁...我已經就黎失去希望.....理香既身份已經死左，帶佢去醫院都冇用...只會令佢處境更危險....
「鈴鈴...」我部電話突然響，震到我個人醒一醒。
望一望.....係阿dom打比我。
「心如，我有樣好重要既事同你講。我係山頂間屋等你。」
「dom....我而家真係冇心情.......」我諗起理香姨...成個人絕望到一啲心情都冇...
「我知你煩緊理香件事，我可以幫你。」
吓...？
係喎！佢屋企係醫學世家！點解我會唔記得！但係...點解佢會知理香件事...
「但係我想你過黎先，有啲野，我覺得你有必要知道，係關於johnny既。」
關於johnny?有啲咩關於佢既野係我仲唔知嫁？
於是我應承左阿dom，3點鍾過去山頂間屋揾佢。