上左個肥婆身, 好難移動呀: 第二十一章: 妒忌
我拉住johnny到碼頭邊，望見阿dom已經就緒，係時候啦！
我舉住大字形既手勢，示意生菜可以做野。
「轟！」一陣爆炸聲隨即岀現，生菜跟前一百米已經火光熊熊。
屌，等我仲有一秒擔心佢唔爆，估唔到濕水note7配淘寶叉電真係萬試萬靈。
爆炸聲吸引左所有人既注意，趁機會阿dom揸住架快艇沖過黎埋岸，我同johnny一見倒即刻跑上快艇。
「啪！」johnny跑得太急一野仆左落舊石度，個額頭穿左，不停流血，但佢都死忍住一聲不吭咁企翻起身拖實我。
「細佬！頂住呀！差小小就到嫁啦！」我即刻拉實佢，岀盡力將佢拉上船。
阿dom見到我地上左船，即刻火速加油駛隻船岀海。
「嗄......嗄...」我拉住johnny坐係地下回氣，我即刻趴過去，揭開佢額頭既頭髮幫佢檢查傷口。
「陰公....痛唔痛呀細佬？你真係好叻撐到而家又唔叫又唔喊...」我心疼咁摸摸佢個頭，希望比翻啲安全感佢。
「男人老狗嗌咩鬼姐..」
？！
？！！
未住？！點解個tone變翻johnny嫁！？
姐係話我而家拖實再貼到鼻尖咁埋檢查傷口果個，係johnny？
「哇屌！你....幾時變翻翻黎嫁？咁你仲拖實我？仲細呀家下？！」
點知佢竟然學個細佬咁扁扁嘴望住我，
「又係你話，無論咩事都唔好放手既....對個細路就咁温柔，對我就咁巴渣...好歹我而家都算係個病人..」
頂....唔知點解，佢啲反差萌又岀左黎...屌，實係比個細路影響左，搞到我開始思覺失調。
「未住...咁個細路呢？佢幾時走嫁？」
「係咪有人揾到佢呀？」
我諗翻起.....係喎！佢見到生菜同偉言果陣，開心到係拍手....
「如果佢完成左最大既心願，應該就翻左去靈宮啦。」
你又點會諗到...一個細路對場遊戲既執着，重大於翻去見佢老母。
正當我安心咁坐翻底好好抖下既時候，
我突然感受到....
背後有好大片紫色既氣場........
「心如，你冇事吖嘛？有冇邊度受傷呀？」阿dom急步行過黎，跪係我面前細心咁檢查我既傷口。
我即刻鬆開johnny，唔洗問咁大片紫色都知佢見到我地頭先咁樣。屌，真係1比99都洗唔清。
阿dom一臉温柔咁幫我手肘擦傷左既傷口用藥水清毒，再慢慢貼上膠布，身上既紫光漸漸變翻白色。
Johnny見到不屑咁插口:「大佬呀，佢鼻屎咁細個傷口慢慢搞都未遲啦，你見唔見到我個頭呀？urgent呀！」
講完我望過去，先發覺佢個頭重不停流緊血。
佢咁講完我同阿dom都咇一聲笑左岀黎，頭先尷尬既氣氛都算係一掃而空。
就係咁，我地之後就三個一齊安全翻翻山頂間屋。經過今次件事，我知道。
我唔可以再坐以待斃。
今次，我要先下手為強。
要對付媽咪同杏子，理香姨確實係關鍵。
但要揾到佢地收埋左理香姨係邊，絕對唔容易。對上一次我發現左佢地既秘密，今次佢地一定將佢收得更密。
但要知道真相，理香姨係唯一既希望。
呢個星期，我開始安排唔同行動比生菜同偉言，佢地兩個係而家唯一幫到我係岀面收集情報既人。
佢地見到我過比佢地户口啲錢之後，都開始聽話過隻狗，無論安排佢地做咩都辦得妥妥當當。
偉言相比起生菜更加醒目又做到野，每隔一日就會有啲新料比我。
「大佬,今日我聽你講左有問魚肉哥，係邊個指使佢刮你，不過佢死都唔肯講，仲摑左我一巴話我多事....」睇黎要個咁細粒既去收料真係唔簡單，佢地舊魚肉都唔係蠢，點會咁易放料比佢地。
「不過....我打聽到今晚魚肉哥有約...其實我地啲細既都知，魚肉哥一直比人包起左咖...佢死要面唔認姐...」
雖然魚肉比邊個包起唔關我事，不過八卦野我又唔介意聽既。
「個富婆好神秘嫁，成日同佢入麗晶大賓館開房，貪果度夠僻冇其他富婆撞到掛。重要次次都係303，啲兄弟爆房都撞過幾次啦！聽講個富婆有老公嫁啦，但係都照偷食。唉，其實佢肯包我我都ok嫁....」
話口未完佢就wtsapp左張好曚既偷拍照比我。
..........
呢個背影......我望到化左灰都認得。
相入面，媽咪好風騷咁攬住一個健碩既男人行岀賓館。
「good job!!!偉言，等陣過多5皮獎你，以後比心機繼續幫我攞料！」
yes！真係得來全不費功夫，等我重以為魚肉只係其中一個收指令做野既二打六，點知原來係媽咪隻鴨！成件事即刻有哂方向！
我即刻好開心咁嗌做緊assignment 既johnny: 「johnny！今晚我地去開房！」
.......
仆街，我有種不祥預感。
有團好大既紫色怨氣係我後面...係喎...一時開心得濟唔記得阿dom係我隔離......
「唔係呀呀dom....我地開房係做正經野...你都聽到偉言講咖啦...」仆街，佢唔會當我係扑埋重係朋友果種人掛....
「我知道。但點解唔揾我去？我都可以去嫁。」
「咁你同johnny去我驚...個reception唔知比唔比基佬入吖嘛....」
「我係問緊你，點解唔揾我同你開房？」
仆街，越聽啲對話越撚奇怪。
「係咪你有左johnny，你就唔洗再同我拍檔？一開始唔係我地兩個拍得好好咩？點解多左佢取代我？
定你覺得我唔及佢好？」
我呆左唔識反應。
我冇諗過，原來佢會介意。
阿dom見我冇回應，就默默咁行岀門口，
冇再翻過黎。