上左個肥婆身, 好難移動呀: 第十八章: 再次上身

「死啦，佢唔會岀事掛？」我望向johnny，大家都面面相覷，冇咩主意。
但一舊靈體岀事既機會又好細，話哂個細路都係度遊蕩左好耐下。
「咁依家點好？等落去都唔係辦法喎」無奈之下，我地決定揾翻個細佬先算。
結果一行又行左成個幾鍾。
「I can’t see shit呀captain，咁大個場點搞呀大佬，個天就黑啦」我同johnny都束手無策。
「一係咁啦，我地上貨櫃頂揾，易啲望哂個場」之後johnny踩住我膊頭爬上櫃頂望左陣，「我見到佢啦，係我地正前方，穿過兩個貨櫃就到啦」
之後我地即刻穿過貨櫃，終於，見到佢係其中一個貨櫃邊左望右望。
「細路！過左咁耐都揾唔到我地，今場哥哥贏左喎。」個細路望見我地之後，好唔忿氣咁扁嘴，我即刻摸下佢個頭問:「拿，遊戲我地陪你玩左，你要乖乖地翻去你要去既地方啦。」
「姐姐...但係我媽咪重等緊我翻去食飯...」個細路扁住嘴咁問我:「我好想...可以食多次媽咪煮既飯...我好掛住媽咪...」講完佢就蹲左係度喊。見到佢可憐兮兮咁，我同johnny都唔知點處理好。
「哥哥....你幫下我好冇？我好想...見多次我媽咪....一次我就滿足啦.....想聽見佢鬧我玩到咁遲翻黎...再笑住咁叫我洗手食飯...」見到一個七歲細路係自己面前喊到咁，johnny作為一個有血有肉既人，忍唔住答應左佢。




「多謝你呀哥哥！」
話口未完，個細路就消失左。
去左邊？
「姐姐。」我望向隔離，即刻打左個突。
johnny天真爛漫咁露岀興奮既笑容，再拖實我隻手，「姐姐！再唔快啲翻去媽咪會鬧人嫁啦！」哇屌！個細路都冇話會上身既，今次麻煩啦。
我唔可以太拋頭露面，重要帶咁大個johnny周圍行，佢而家啲行為係外人黎睇似咁似智障，實好惹人留意嫁喎。
「姐姐....我想問你呢...」johnny細細聲係我耳邊講:「果邊停左好多車呀....佢地黎做咩㗎？」
我聽到個心沉左一沉...唔會真係咁易奶野掛...我踮高腳踭望望貨櫃碼頭外圍，見到比較遠既既高地真係停左幾架車，同大概10幾個人同時間落車行緊過黎。
仆街！頭先就唔應該放走個毒撚！九成係過黎捉我再拎錢既人。
死啦，johnny而家又咁樣，變相咪得翻我一個？佢地行過黎都唔洗廿分鐘，如果刮到我就真係必死無疑。




我即刻wtsapp阿dom叫佢過黎，雖然佢過黎應該都成個鍾......死啦.....呢一個鍾入面，應該哩係邊....
我個腦混亂到諗唔到野，我諗起上一次既經歷...我真係唔想試多次....
「姐姐....你做咩咁驚？」johnny搖住我隻手問。
「johnny.....呀唔係，弟弟，我地同佢地玩多場捉伊因好冇？你帶我去哩埋先，贏左我再帶你去揾媽咪！」
Johnny好開心咁點頭，然後拉住我隻手開始行。
今次....靠你啦，永遠冇人揾到你既細路。
johnny拉住我一直行，一直行，佢越行得耐我就越焦急...
「你想帶我去邊呀？」
果頭講完，佢就停低左係一個表面沾有小小紅色油漆既貨櫃前面。之後佢神神祕祕咁踮高腳拉開個鎖，竟然拉左度門落黎！
「我以前係度玩果陣，傑傑同我講話呢個紅色油漆既貨櫃個鎖係壞嫁，我地成日騎膊馬上去開左佢哩入去！秘密基地黎！唔準同人講呀！」johnny神神祕祕咁笑住係我耳邊講完，再拉住我爬入去。




雖然我唔知邊撚個係傑傑，不過我都好感激佢，真係要嗌佢一聲傑哥。
人仔細細但對個貨櫃場比大人重要熟，幾千個貨櫃都可以記得呢個貨櫃係邊。
之後我地就關埋貨櫃門，捱住啲貨坐左係度。johnny望住啲貨好奇咁問我:「
姐姐，呢啲紅色罐罐咩黎嫁？」問完就好調皮咁攤左係我大脾度望住我。
我笑住咁摸摸佢柔軟既頭髮，同佢講:「呢啲呢就叫做嘉頓雜餅，五餅二魚既奇跡就係呢個罐度發生嫁啦..」
佢聽完好興奮咁要我講關於五餅二魚既故仔，見佢咁得意，我就慢慢細細聲咁講比佢聽.....
「就係咁，呢罐雜餅足足填飽左五萬人既肚....」講完我就發現，johnny已經係我大脾度好安心咁訓着左。
從來都未試過咁近望佢訓着個樣，其實佢乖乖地咁好似小朋友既樣，真係有種反差萌，幾可愛。
而家佢乖乖地訓着，只要靜靜等阿dom黎，或者我地可以安全岀翻去。