上左個肥婆身, 好難移動呀: 第十六章: 外圍光
「呢個可能會有少少複雜，我記得我死鬼阿爸話我知，每個人岀生既時候都係白光，代表純潔無暇。但隨住佢地成長，每個人開始犯唔同既罪，所以慢慢佢地會開始有屬於自己既光。
七種顏色既光分別代表住七宗罪。順顏色排序分別係 傲慢（紅), 暴怒(橙), 貪婪(黃), 懶惰(綠), 貪食(青), 色慾(藍)同妒忌(紫）。但你睇到既顏色又未必代表佢得一宗罪，因為顏色會重疊，就好似果個人係綠光可通係犯左色慾加貪婪咁。
至於白光同黑光，有住白光既人少之有少，因為先天白光既人，佢地心境純潔，冇受人世間任何誘惑影響
到自己犯錯，先可以發岀潔白無暇既光。而呢種人同時都大機會睇到靈體。另外一種就係我呢種先天陰陽眼，可以話個上天選中既人去處理靈體同人間既事，所以都會有白光。
至於黑光....只有集齊六宗以上既罪，佢地既光先會溝到咁混濁咁黑，呢種人唔少都係罪犯同好易受誘惑而犯錯既人。」
所以....果日阿dom見到我揹住johnny而漸漸變紫既光....代表佢妒忌...？聽完我會心微笑左一下。冇野比起知道呢件事更加好心情。
我攬住伯母，笑住咁多謝佢話呢件事比我知。佢真係果種勁媽媽既人，比佢和藹可親咁攬住就覺得好母愛既感覺。我而家先諗翻起，岀世咁耐都冇比我媽咪咁攬過，點解我親生阿媽竟然係會想殺我。諗起佢個樣，突然間不寒而慄。
「係呢，而家呢度邊度黎，呢個月發生咩事。頭先我先見到阿dom同johnny嗌交...」johnny媽就好似我既人肉google咁，有問必答。
「呢度係阿dom係山頂買既一間房，貪佢夠偏僻得黎又適合養病，最重要係加左好多cctv同感應器係岀面，屋岀面又有大閘圍住，有陌生人如果偷偷潛入100米範圍內都會係呢間屋入面響。
你訓左唔知咋，你阿媽同細佬係咁揾人私底下查你。我隊靈魂幫你查過，佢地私底下揾哂黑白兩道刮你，包括黑幫，黑警 仲有靈媒都有，可能想發散哂人同鬼去揾你，聽講懸賞有5000萬。前提係生要見人，死要見屍。」
原來伯母仲有自己既靈魂team？！
不過今次死裏逃生，我知佢一定唔會放過我，如果比佢刮到我唔會再咁好彩。我老豆又從來都唔係好理因如，佢連因如幾歲都唔知，所以去左邊佢應該都唔係好理。佢最關心既，只有佢公司。
如果揾唔到証據，單憑我一把口根本徒勞無功。
「所而呢個月都係我個仔同阿dom輪流翻學，輪流睇住你照顧你。不過為左方便夜晚都有人照顧你我個仔就索性住埋係度囉，萬一夜晚有咩事都有人通知聲嘛。」
照顧一個無活動能力既我一個月.....一定唔簡單。仲要佢地又兼顧我又兼顧埋學業，實好辛苦。諗落都唔好意思.....
我行去電腦枱，發現一份打左一半既individuals ，一睇啲英文咁爛都估到係johnny。見到成枱lec note又圈又寫哂中文解釋都打到咁，wikipedia都夠膽死落reference....
就送個a+當報答左佢先啦。
就係咁，我打左一個下午，打到咁上下，伯母打點哂所有野就走左，仲話下個星期會再黎睇我。如果佢係我阿媽就好.....
直到6點幾，又有人翻黎。我打打下文聽到鎖匙開門聲。
門口打開，岀面企住既係阿dom，佢見到我竟然醒翻坐左係度望住佢，嚇到手上盒飲都跌埋落地。哈哈，正傻瓜，次次佢啲反應都睇到我覺得好可愛。
「心如...你終於醒啦！做咩咁早落床呀！...」佢欣喜若狂咁砰埋門就跑左過黎，點知係衝去房入面先。
「做咩呀你？！」睇到佢啲反應真係笑到氣咳！
「咩呀！我驚我見到你係鬼黎，可能入面你重訓係度吖嘛」阿dom面都紅哂係度死撐，之後突然又衝左過黎係我面前，
一手攬住左我，好實，好實。
「好彩.....真係你.....」
個傻仔無啦啦係度喊......
「喂！好地地喊咩鬼呀？男人老狗」我都比佢嚇左嚇，無啦啦成個細佬仔咁攬實我喊。
「對唔住呀....我....太開心咋......你知唔知我果日幾驚......一路望住個sos一路揸車黎貨櫃碼頭，我發左狂係貨櫃場到跑，好無助.....真係好無助.......
直到有個細路帶左我去揾你...再之後我見到你成身都係血.....好恐怖......我以為你會死......真係好驚....你明唔明
我成世人都未試過咁恐懼。
到而家你竟然醒翻就係我面前，好似以前咁同我講野........」
話口未完佢又係度喊，喊到收唔到聲，見到佢咁我個心情真係...
我知佢呢個月一定受左唔少折磨。就係咁，我一路攬住佢，一路摸住佢個頭，當佢細路仔咁靜靜安慰佢，比佢將所有痛苦，難過一次過發洩哂岀黎。過左成半個鍾佢先收左聲，但係已經成個地下都紙巾，唔講以為打完飛機黎。
安撫完佢心情之後，佢慢慢扶翻我去梳化，自己去洗個面。不過，我硬係覺得我有啲野未做。
係咩呢....頭先阿dom話.....
呀！個細路！係個細路！唔知佢會唔會重係個貨櫃場到等緊我同johnny翻去揾佢玩，死啦，都過左成個月，唔知佢會唔會嬲鬼我....
唔得，我一定要快啲去揾翻佢先。最衰我又睇唔到佢啦，一定要帶埋johnny去。
隔左一陣johnny都翻左黎，見到我醒左反而唔係咁驚訝，若無其事咁行入屋。搞錯.....唔係應該比啲反應黎嫁咩...？
雖然...我本來就冇期待啲咩。
「我老母頭先話左比我知啦，醒左就好。你呢幾日要快啲開始復健，我地仲有個承諾未兌現嫁。」johnny一邊行入廚房一邊同我講，原來佢都記得個細路。
相反，阿dom完全聽唔明，係咁追住johnny問我地講緊咩，白光又慢慢變翻紫色，點知johnny係都要衰衰格格同佢講:「你幫我做左份individual我咪話你知囉！」
「幫你做左啦柒頭！」
阿dom不解咁望住我，仆街，連johnny都不解咁望住我....
「做咩幫我/佢做？」兩條友異口同聲咁問我。
仆街，做咩幫佢做，點知姐，今次真係難拆過c4。
「點....咩解姐！點咩解呀大佬！唔記得左重點咩解呀？大笨象點解去打仗，打完仗重要食辣椒醬？
小皮球點解會係香蕉油呀？個波搽左油可以變猛虎射球咩？
依個世界上好多野都無得解嫁！」
講完我就嬲住咁行翻入房，好彩首歌真係work，留底佢兩個on99係度。
屌，拜得洪卓立多自然得洪庇佑，聽日真係要燒多兩張金銀衣紙比佢。