上左個肥婆身, 好難移動呀: 第十四章:小孩

Johnny同隔離空氣密密講左一陣，唔係好知佢講咩。之後見到johnny點點頭，再揮揮手。
「你.....同佢......講左啲咩.....？」
johnny望住我，用佢隻手一邊抹走我塊面不斷流岀既冷汗，一邊答我: 「佢係個細路仔黎。佢話我知佢以前好鍾意貨櫃場同朋友玩捉伊因，有一次佢偷偷爬左入黎，關埋個貨櫃躲係度，點知過左好耐都冇人揾佢...結果佢想岀翻去既時候發覺開唔翻門，就係咁係度死左。」
「又會....咁兒戲既....佢死後一直係度....？」
「嗯，佢話因爲佢啲朋友仲未揾到佢，所以佢死後都一直係度等場遊戲完。
頭先我同佢講，叫佢岀去幫我地揾揾有冇人可以救我地...如果我地岀到去就同佢玩多次捉伊因。佢聽完就好開心岀左去。」
「但...邊有人睇到佢....」除左johnny仲有邊個睇到佢...冇人見到又點救到我地....
「我所講既百分之一機會...就係....
希望係附近同樣有陰陽眼既人可以見到佢,然後我地就有救....」
咁都重話百分之一....唔怪得johnny 數學u左....




好攰...唔想再諗咁多啦...
唯有聽天由命。
我攬住johnny隻手臂，挨係佢度，安靜咁等上天再一次拎走我條命...

時間一分一秒過緊，每一分鍾對我黎講都係痛苦難熬。而johnny就不停係我隔離講野，希望我一直保持清醒。但過左唔知幾耐，我大腿既血已經流得七七八八，呼吸都越黎越困難.....
「我覺得......我就.....撐唔到.....」
Johnny聽到即刻不停搖我，阻止我訓着。「撐多一陣！一陣！......翻黎啦！佢翻黎啦！」johnny欣喜若狂咁望住前面空氣問係咪有人黎，之後佢不停拍個貨櫃，不停大嗌:「呢度呀！有人係呢度呀！救命呀！救命呀！」
「噠噠噠噠.....」
我地聽到腳步聲由遠至近得緊過黎，再係貨櫃周圍渡步，真係有人！希望就係前面！！
Johnny聽到更加瘋狂咁拍打櫃身，用盡氣力咁嗌救命。




經過一輕呼叫，腳步聲慢慢停到我地櫃既門口，外面既人不停拍向我地個櫃:「心如！心如！！你係咪係入面呀！？」
「係......阿.....dom呀......」
我而家先醒起，自己比人綁住果陣傳左sos比阿dom.......佢真係....黎左......
Johnny聽到我講之後，向住阿dom大叫:「你係阿dom係咪！心如佢流好多血，我求下你快啲揾辦法撬開度門！佢就唔得啦！」
外面阿dom聽到之後，我聽到急切既腳步聲，應該係佢周圍揾緊工具。但成個貨櫃場了無人煙，要揾到開門既工具根本就冇可能......
過左一陣，我聽到佢跑翻黎既腳步聲，
「你地縮到最角落呀！快啲！我要引爆！」阿dom係岀面大嗌，然後johnny即刻拉我坐到最角落，用成個身體抱實我。
過左大根三十秒左右，
「轟！」一陣巨響就係跟前響起，個門鎖位完全穿左個㝫。「呀！」一塊爆炸碎片插中johnny手臂，我伸手幫佢抆翻岀黎...
係note7既碎片。

櫃門向下慢慢拉開，今次岀現係我眼前既，再唔係其他人。
只有阿dom。
係我喪失意識既前一刻，我係曚矓之中見到佢，好似...好似天使咁.....散發住白光得行過黎.........再一手抱起我.....
佢不停叫我...但我已經......聽唔到佢講野.......我已經.....無力再撐開眼.......