上左個肥婆身, 好難移動呀: 第十二章:危機

第二朝一大早，我同johnny已經準備好哂所有野去工廈救人，為左今次更加安全，我同佢帶埋電槍同細刀，以備不時之需攞黎保命。
話咁快就到左上次個工廈，我同johnny偷偷地上翻2樓，慢慢咁行近2A。為左確定入面有冇人，我叫johnny拍下門先，我就匿埋一二邊睇情況。
佢拍完一陣，唔見有任何反應。之後佢係袋拎左啲工具，兩三下就解左道門鎖。
我地慢慢拉開鐵閘，慢慢望向入面。
一個人都冇，地下有兩個解開左既腳扣。
睇黎我地遲左一步。我地入到去，周圍搜刮下有咩線索。成間房大根200尺左右，環境簡陋，只有最基本既廁所，雪櫃，一張梳化同電視，角落有一大堆罐頭同藥物，仲有啲生活必需品。
雖然環境唔算惡劣，但如果長期生存係呢個狹小空間，都一定會生不如死。
揾左好耐都冇發現。正當我諗住失望而回果陣，johnny震住把聲叫左我一下。
........
仆街！




........
仆街仆街！
係個局黎！！
我望住johnny手拎住既針孔攝影機，我知道，
今次我地插翼都難飛。

「沙...」通風口開始有米白色既氣體岀黎，我同johnny即刻跑翻去開門，個門口有野隊住左岀唔到，我地依家就好似受驚既獵物咁任人宰割。
煙霧越黎越多，我同johnny已經貼住大家訓左落地下，全身乏力。
我真係唔想死多次。
我更加唔想johnny無命。




我勉強支持住望向johnny，我已經連講野既力都冇。我好想同佢講聲對唔住，係我搞成佢咁..
佢望住我，吃力咁伸岀手為我抹乾面上既淚痕，到最後，佢選擇温柔地原諒我帶比佢既結局。
........
慢慢，我開始睇唔到野...
好攰...眼前...越黎越黑......

「痛...」慢慢我開始醒翻，發現全身郁唔到。我雙手被反綁係椅背後，同另一雙手綁埋一齊，冇估錯對手應該係johnny，佢同我一樣被反綁係櫈度。不過我既視線完全睇唔到後面既佢而家點樣。
唔單止手，我雙腳都比腳扣鎖住郁唔到。我慢慢抬起頭望向周圍，發現我地被困既空間非常細，而且全密封，好似一個箱咁，一啲光線都冇，周圍都好黑，而且望向四面唔見有門。
呢種環境....唔通...
「呀...個頭好痛」係johnny把聲，




「johnny!johnny你未死呀！」我激動到流眼淚，啱啱我真係以為再見唔到佢。
「shu..岀面有人」johnny話口未完，我地聽到啲腳步聲越黎越近，越黎越近，直到我地個箱岀面停左。我聽到有鎖匙聲，慢慢鑽入匙圈開鎖，眼前度門逐漸俾人向下拉開。
一道刺眼既陽光撲面而黎。
映入眼簾既，
係媽咪同杏子。

我望住佢地身後既環境，係貨櫃場，成千上萬數唔盡既貨櫃就係眼前。而我同johnny似乎就困係其中一個貨櫃入面。
佢地留翻小小門縫透翻小小光線入黎，再來回渡步審視我地兩個。
銳利既眼神令人不寒而慄，我感受到johnny雙手開始微微發抖。
我十指緊扣捉實佢對手，希望盡我努力比我僅餘既安全感佢。
「因如，點解你要搞到自己咁既局面呢？katy由細到大都教你，閒事莫理，眾地莫企。點解你係都要自尋短見？」
首先岀聲既係媽咪，佢一邊搖頭嘆息，一邊拎起旁邊原本屬於我地既小刀同電槍，一步一步咁行過黎。
佢望住我驚恐既眼神，再一刀插落我大腿。
「呀!!!!呀!!!...」淒厲既叫聲傳篇整個貨櫃場。
好痛！好痛！真係好痛！痛到我全身每一段神經都好似俾人勒住，痛到我個頭好暈，好暈..




好痛苦..救我...
我用盡力氣，移動我既尾指掃一掃我隻錶.....
「點...解」
「你問我點解？我先問你點解。點解要查我？點解要跟蹤我？點解你咁多事？由你有份保守秘密開始你都已經係一個殺人兇手，突然同我玩良心？」
我完全唔明佢講咩...？保守秘密？殺人兇手？因如真係有份害我？
「仲同埋個契家佬一齊想查我底？你以為你得咩？」講完，佢一刀係我大腿抆翻岀黎。我再次經歷一次撕心裂肺既劇痛。今次，我叫唔岀...杏子將布包塞入我個口度。
我好辛苦...望住個大腿血如泉湧，我全身開始岀冷汗，痛到一個生不如死既地步。
我一直捉緊johnny既雙手慢慢鬆開，今次，到johnny緊緊咁捉實我，但佢只能發岀唔唔聲，睇黎佢個口都比杏子塞住。
「我知你同brian有路，我有冇篤過你？反而我地先係你大恩人，唔係我地幫你，brian同個心如結左婚的話你以為你有有得見佢咩？你竟然恩將仇報？」
真係....佢地....殺.........我......
「不過都好，冇埋你，公司未來既繼承人得杏子，個老野都冇得唔就範」
我個腦開始唔係好諗到野...我好痛....
「我拜神既，唔想整污糟對手殺你地。反正你又失血過多，呢個密封空間又冇咩氧氣，我同杏子聽日先黎幫你地收翻個屍。如你所願，落去同你家姐團聚啦 。」
隨後佢又不忿咁摑左johnny幾巴，先施施然同杏子鎖門走左。
淨翻我同johnny，絕望咁係呢個密封既




空間入面，倒數住生命既分秒。