上左個肥婆身, 好難移動呀: 第十一章: 新拍擋

「你同唔同到佢講野？我有好多野想問佢？」
「我做唔到，佢而家算係靈魂沈睡緊既狀態，我遺傳左小小陰影眼，點叫醒沈睡緊既靈魂...要問下我老母啦...」
話口未完，johnny突然間全身冇力訓左落地。「都話左...用好多能量嫁啦...陪你din左成日..我重未.....食...飯...嫁」然後就不省人事。
「喂喂！醒下呀！」屌...早知唔好咁心急叫佢開眼啦...估唔到用既能量會咁大。
男人老狗暈左係個公園度，我又唔知佢住邊。冇理由帶佢翻屋企咖....去開房我又唔夠錢，今日走得太急銀包都冇帶..
唯有拎johnny啲錢啦...
.....
......
屌你男人老狗帶得個5蚊岀街！有冇咁撚窮呀！5蚊兩個人坐巴士都唔夠喎！
....唉




當我還翻比你。
我慢慢將佢拉翻起身，再將佢拋上我背上。估唔到...佢都幾重下。條友食咩大食到咁窮都會有咁多肌肉嫁？？重死我啦屌...
而家唯有，將佢揹翻翻去之前我買比我dom監視間屋度啦...話說今日搭車過黎都用左個半鍾.....
真係前世欠左你。

我一路揹住johnny行，行到我都已經唔記得，過左幾多條馬路，穿過幾多條天橋。
有好幾次我差啲想揼底佢係街邊算，但始終都係我搞到佢咁樣...唯有放佢係地下，休息一陣，再繼續行。
慢慢我隻腳已經酸到冇知覺，手機無電又唔知行左幾耐....直至我就行到屋企附近，見到個天開始光...
我居然揹左佢成晚行翻黎。
佢居然成晚都訓到隻豬咁，但就係叫唔醒佢。屌，都唔知係咪特登既。




不過算啦，都已經到門口，有咩放底佢先再計。
我拎起褲袋條後備匙，「咔」一聲開左度門，曙光就係前面！我終於可以放底佢！！
「你翻黎啦！我想同你講」係阿dom把聲。
係阿dom把聲？！wtf？
我咪wtsapp左佢話任務完成叫佢唔洗再翻黎囉？點解佢會係度？
今次真係尷尬到震。
呢一秒，呢一個空間入面，我望見我鍾意既人，突然岀現係呢度，而佢正正望住我揹住第二個男人翻黎。呢個一直屬於我地兩個既空間，滲入左第三個人既空氣。
雖然，我一早冇預過會得到佢。但至少，冇人會想係鍾意既人面前破壞自己既形象。連我自己都唔識解釋我同johnny既關係，唔通話開房識嫁咩。
「其實呢我...」
「哈哈...冇呀我都係啱啱上黎。想話漏左啲野未拎，而家拎埋之後唔洗打攪你嘛。




仲有呀....多謝你比個咁正既場我，多得你，我先咁順利同fafa一齊。」
佢有啲....唔自然。
我見到佢既白光....開始慢慢泛紫色。
講完之後，佢就笑住咁走左。
呢間屋，淨翻我...同johnny。
再冇佢既痕跡。

Johnny之後都係一直昏睡緊冇醒過。
坦白講，我真係幾擔心，又唔知有咩幫到佢，直到中午我都一直睇實佢唔敢訓住。
到1點幾，我眼皮已經好重，好重，好想訓覺，差唔夠就恰着果陣，佢突然間捉住我隻手，慢慢張開雙眼。
「終於醒啦..」終於...我終於可以安心咁...好攰...我慢慢趴係佢度，好安心咁合埋眼，進入夢鄉...
唔知訓左幾耐，醒翻就聞到一陣杯麵味。johnny係我隔離玩住人中之龍零，一路睇住真島發左din咁單一匹馬踩場救牧村實既劇情，一路食麵。搞到我又諗起佢。
我望望我雙腳，每個水泡，擦損既位都用膠布貼好左，而且...我件衫唔同左，摸摸入面，連個bra都冇左。
「喂，點解我件衫唔同左？」
「唔通你件衫識變色咩，擺明我除㗎啦，你個身我邊忽未睇過呀。」johnny一邊救牧村實，一邊若無其事咁答我。




唉，是旦啦。我落床坐左係佢隔離同佢一齊食杯面，一路打機。其實我一直都好想知，真島同牧村實最後會點。
「那個人的樣子...好像很悲傷。」
牧村實最後，終於可以睇翻野。但同時，佢亦無辦法再見到，黑暗中一直帶領住佢既真島。
就好似，呢個人從來冇存在過一樣。
兩個本來唔同軌道既人，交會過後，最終都只會分開。真島，最後都忍痛，過住原本屬於自己既生活。
「因為佢地冇一齊到，牧村實先會成為佢一生最愛。」johnny講完就關左部ps4，我都由回憶入面抽翻身岀黎。
時間有限，幾難過都係時候要翻翻軌道。
「johnny，聽日我地要去多次之前同你講果棟工廈度，我驚理香姨已經比我媽咪同杏子帶走左，我地一定要快過佢帶走理香姨。」