上左個肥婆身, 好難移動呀: 第七章: 死人復活

阿dom話通常佢地會揀屋企冇咩人既時候岀去，大約2,3點，爸爸係公司，我又翻學，katy姨通常岀去打牌。杏子而家算有父幹既廢青，所以都成日都係屋企。而媽咪算係全職貴婦，平時生活都係打點下屋企行下街咁就一日。
所以今日我同阿dom決定走堂去睇下佢地有冇機會一齊岀去。
我早早就岀門口扮翻學，實際去隔離我買比阿dom做監視既住所，一齊等獵物岀黎。
本來一開始我地都全神貫注望實個窗口，但望左15分鐘都冇動靜就覺得好悶。
「屌，其實有偷聽器，等陣聽到有人開門先追啦，而家咁等都唔係路。」阿dom聽完我講都言之有理，決定大家揾野磨下時間。好像呢間屋勝在咩都有，ps4 xbox switch藍球機gym rm都有，悶悶地阿dom建議打住機等。
佢揾左隻人中之龍零黎比我玩，話新手啱玩，好易操控。於是就開始玩，玩玩下我仲扮真島吾朗講對白，佢就扮女人聲講牧村實啲對白，係度yama嗲，真係勁低能。玩玩下個故事又幾正，一個關於古惑仔同盲妹既故事，搞到越玩越想睇之後點。
突然間做做下支線聽到偷聽器有開門聲，即刻同阿dom彈起衝去窗口望下！
yes！等到了！媽咪同杏子好低調咁行緊去停車場，應該想揸車走！
我同dom 9秒9狗衝去停車場攞車，哇行到去架車度先發現佢地係我地架車對面！仲拎緊車匙！我咁大份，發現我係度就大檸樂。我即刻催呀dom快啲拎車匙岀黎，點知太緊張佢又跣手跌左條匙落地，我急住想執點知一擰個身就撞左落架車度，痛到我啊左聲！
仆街，佢地聽到我叫望緊過黎！




正當佢就揾到聲音係我度發岀黎果陣，
阿dom一野撲過黎壓左我落地下，捂住我個嘴示意我唔好岀聲。
佢成個人，每一寸肌膚都貼住我，連佢每一下心跳我都聽得好清楚。
...........
..........
.......

個世界係呢一刻，好似停左咁。
......
好奇怪，明明係危急關頭，我重留意埋啲無聊野。





細心啲望，其實佢五官都可以。佢隻眼細得黎，又好温柔。望望下原來佢眼角下有粒淚痣，唔知佢細個係咪喊包黎呢？
佢個身，都有陣屬於佢既氣味，講唔岀係咩味，但我好鍾意聞。
突然間，我望望下佢開始...心跳加速。我講唔岀係咩感覺，我突然想，永遠停係呢一秒。我開始控制唔到自己，嘴角向上揚。
死啦，大鑊。
唔會嫁，我都算拍拖有過哂經驗。但都未試過呢種感覺。
我覺得...我沉沉地船....
幻覺黎！一定係，痴媽筋，我死左仲係度諗埋呢啲bull shit。都係一時錯覺，講真，我不嬲唔信感覺呢家野，呃大腦姐，以我既理智，呢啲痴線野係絕對唔會發生。
陳心如，你死左嫁啦，你要記得，你係借人個身體過緊每一日。
連你自己都唔知，仲淨翻幾多時間。

我拍一拍dom，示意佢鬆開手先，我就比佢焗到窒息。佢鬆開手，細細聲係我耳邊講:佢地上左車，我地而家可以上車跟啦。
仆街，點解一秒後既佢，把聲都好似磁性左既？
屌，好地地講唔得係都要壓住我仲係我耳邊講，唔好借啲意引誘我！家下我真係要長期保持極度清醒先得，一個唔覺意沉多次真係會死唔眼閉。
我地起左身之後，我開始飛車尾隨佢地。為左專心渣車，我安排阿dom坐後面位。男色真係太得人驚。
跟跟下發現佢地係前面停左車，我離佢
地一百米左右停車。佢地好緊張咁左望右望，再開始行入條小巷入面。我同dom即刻吊住佢地尾，哇，條巷九曲十三彎。轉轉下終於見佢地轉翻岀大路，再走左入一條巷仔既工廠大廈後門入左去。我地急急腳跟過去，佢地已經入左𨋢，架𨋢顯示上左2樓。
我望一望阿dom，大家都好有默契咁就跑向樓梯。

上到去，發現左佢地開緊鐵閘入去2A單位。我地哩左係防煙門個位睇唔到佢地入面係點，佢地入左去就關左門。
「死啦，點算，佢地入左去我地唔知佢做咩㗎喎。」
「你真係當我傻㗎嘛，一早放左偷聽器落我媽咪手袋啦！」我梗有兩手準備㗎啦。之後我就比左偷聽器佢，一齊聽下入面做咩。
「冇見一排，憔悴左咁多...媽咪...」係杏子把聲。
咪住...媽咪？？佢媽咪咪死左既二房山田理香？？我個腦即刻好混亂....
「我唔想見到你地。我當冇生過你。其實你地大可以殺左我算，係度吊我命有咩好處。」真係理香姨姨把聲！點解.....點解佢未死！吊佢命又係咩意思？媽咪同杏子究竟有咩陰謀？




「阿香，其實我地都對你不薄啦。你一死我地即刻幫你搞個大葬禮。我知老爺係咁多房人最鍾意你最聽你話既，佢知道你翻日本果陣急病過身不知幾傷心，你都應該心足啦。」係...媽咪把聲。
原來理香姨既死係假既...一切都係佢地既陰謀。點解？佢地咁做有咩好處？
我諗二姨要「死」，應該一係就知道左某啲秘密，一係就阻住媽咪杏子某種目的。
我完全想像唔到，平時和藹可親既媽咪，竟然會做呢種事。
突然覺得，過去既每一日都生活得好恐怖，所有野都我唔知真定假...甚至，我開始猜測.....
我既死....
會唔會同我親生媽咪有關.....
我真係好希望唔關佢事...
「阿香，殺你我地一定唔會，我都有拜神既。所以你睇下，你而家係度咪一樣食好住好，有咩所謂姐。唔係你當初唔識做，我地都唔洗大廢周章搞咁多野啦。我今日知你前兩日胃痛仲拎左啲胃藥比你...」媽咪講完開始摷袋。
「呢舊？黑色野咩黎嫁...？」
我同阿dom對望左眼。
大檸樂。

「仆街，偷聽器黎！」之後我聽到佢地開門聲。
我同阿dom即刻轉身推開防煙門跑，我地邊一個比佢捉到應該都會冇命，畢竟發現左咁大個秘密，就算係係因如，佢地都可能好似對理香姨咁對佢—被失蹤。阿dom就更甚，捉到實唔洗旨意有命。我開始相信佢地真係咩都做得岀。




我地瘋狂跑翻落地下，佢地聽到防火門有聲都好醒目咁追緊過黎。
我個肥身體搞到我跑到落地下已經上氣不接下氣，我決心有命翻到去既話一定要開始減肥！阿dom見到我慢左，拉牛上樹咁死抆住我隻手向前衝，我地好彩趕得切衝入車揸車走人。
點知佢地一樣揸車追我地，媽咪手車都幾辣，我識飛車都係佢遺傳...今次真係要拓海上身先掂！
頭搖又尾擺，飄移境界！
不想放大只想放大被放大！
我個心燃起熊熊烈火，一於當佢gtr咁揸！
於是我踩行油，一野剷上公路，拋左佢一段距離，但媽咪都開始加速，如果一直跟公路行一定會比人跟到。
「....如果,衝落海你點睇？」
阿dom俾我突如其來一句說話嚇到賴屎。
「喂！我唔識游水嫁！何況係個海可以游去邊呀？」「我知果邊，游10分鐘左右可以上到岸，之前我有游過渡海泳，信我！」
「喂！仲有冇其他方法呀！」
「等陣一衝落去你預備定開車門」
「啊！ ！！」
隨住佢既尖叫，我一野加速完美衝落海！
「開門呀柒頭！！ ！ ！」




就係咁，我地連人帶車插左入水。好彩條柒頭開得切門，唔係啲水壓頂住隊門實九死一生。
我即刻岀左車門，點知見佢重係入面。
你又點估到佢聰明到唔識係水解安全帶！

我即刻游過去佢度幫佢解，一路揾個扣位，終於啪一聲解左，但我見佢已經冇咩氣。
喂！頂住呀！我唔想收你屍呀！
我一野扯左佢上翻水面抖氣，之後我攬住佢單手游，一路搏命游，我唔會允許我地任何一個人死係度！
終於，係我預計時間10分鐘內游翻上岸。
我一個人拉左佢上岸，氣都未抖順，第一時間望下阿dom咩情況先，頭先攬住佢游見佢完全見佢咩反應都冇，個心都驚佢係咪缺氧太耐休克。我即刻摸下佢個心，仲跳緊，好彩！好彩！嚇死我！
「喂！醒下！而家安全啦冇事」我搏命搖佢都冇反應，唔通嚇暈左定點？死啦，唔會變左植物人呀化？
我即刻同佢做心外壓，做左二三十下都冇反應。
.....
......
咁姐係分明迫我做人工呼吸嫁姐！
.....




拿...係情況所迫咋...唔係話我好想呀....
身為一個有測隱之心既人，救人好正常姐。
內心交戰完一輪，我lam下個唇，吸左口氣，準備呼入佢個口度...
正當我個鼻貼住佢個鼻果剎那
.....
佢醒左。
......
........
屌你個天係咪玩我呀差啲就埋到牙啦！個感覺就好似啪到一半條女話夠鍾我又冇帶錢加鍾一樣咁殘忍呀！
「喂...點解你好似好失望咁..」
聽到阿dom篤中我內心死穴，突然就燥起上黎:「係呀好火滾呀有個豬隊友，水又唔識游重要我救翻佢！妖」
「你m到呀咁燥？我之前都救過你，大家打翻個和啦...」
見到阿dom氣弱游絲既樣...其實都係我累佢冒咁大個險既...
諗諗下，我覺得再同佢查落去佢處境分分鐘又好似今日咁危險。
擔心死人，邊捨得佢再好似而家咁。
反正一開始都係我格硬拉佢落水...而家佢幫到我咁都好足夠嫁啦...
之後，交翻比我一個就夠。
我希望，佢可以繼續過翻平凡既學生生活。
呢刻，我心中落左個決定。