上左個肥婆身, 好難移動呀: 第五章: 合作
我行上前一手捂住佢把口，佢完全震到唔識反抗。我係佢耳邊細細聲講:「你收聲，唔想我夜晚揾你就跟我黎，唔係我拉埋你落地獄...」白光毒撚聽完猛咁點頭，我就拉住佢行左去a core一個角落位，貪呢度冇咩人夠靜，唔講真係以為同佢偷情屌。
我係書包揾，好彩有鏡係入面，雖然唔知我想法正唔正確，不過搏一搏，單車都變摩托啦屌！
我將塊鏡照向自己，見到既係因如。
望翻個白光毒撚，屌條撚樣冇膽到重眯埋眼震緊，真係把鬼火係咪男人黎！我一野拍落佢個頭度:「喂！mak大你隻屎眼望下塊鏡先啦，男人老狗驚鬼驚成咁。」
白光毒撚見到我拎住塊鏡，呆左呆問:「咩鬼點解會掂到我既？仲拎到塊鏡？」
佢望向塊鏡，一野嗌左岀黎。
「哇屌！欣宜呀？！我隻眼呀！」
佢個樣重驚過頭先。
原來肥婆重恐怖過鬼。
不過我果然冇估錯，佢睇到我靈魂，要其他野映射先見到我肉身。
「點...點解會咁既？你究竟人定鬼？」
白光毒撚終於震定翻啲咁問我。
「不如你答左我先，點解你識我陳心如？」我望住佢個樣，輪廓硬係好似某個人，一個被我老早就遺忘左既人。
「我識你係因為..」呀...fuck...又係呢種感覺....好暈呀......
我張開眼，發現自己係醫院，katy姨（因如老母）係隔離一味問醫生呢樣果樣。「醫生，我個女呀，我問佢前2日既事佢話完全冇印象呀，係咪個腦有啲咩事呀？佢前日話我知上上下堂恰眼訓，醒翻發現唔記得發生左咩事喎....」
咦...佢咁講係咩意思？
我即刻望下個電話:5月4日。
見到白光毒撚已經係5月2日1點幾既事，同之前一樣，暈左醒翻就冇左幾日...唔通...有人取代左我用因如個身？
諗通問題之前，首先係要離開醫院問翻白光毒撚先，仲有果日果2個八婆gigi同mandy都可能有線索。
「媽咪呀，其實我同你講笑咖咋...我冇唔記得嫁，前日你着墨綠色有花件上衣，下身着黑色棉褲我都重記得。我想試下你關唔關心我咋嘛。」我望向katy姨，先發現佢個外圈係黑色，同醫生既淺藍色外圈對比相差甚遠。不過我通常都係見最多人係五顏六色咁，淨黑同白暫時得白光毒撚同katy姨係咁。雖然我仲未知顏色化表咩。
katy姨聽完鬧左我一陣就信我放左我走。我第一時間衝去上堂，睇下可唔可以揾翻白光毒撚問翻果日之後既事。
以防我個肉身再比人搶，我覺得要同佢溝通下先。
我係自己手掌寫左行字:「我叫心如。你係邊個？我想話你知你冇左既記憶係我用緊你肉身既時候。希望你下次岀現可以寫底比我知你係邊個。」
入左lec rm，我又好輕易係人群之中散發住白光既佢。隔離有個深紫色圈既女仔，望落幾純成笑起黎成個陳瀅咁，一直係咁問白光毒撚野，兩個有講有笑，我見到白光毒撚面都紅哂，哦....明白哂
睇黎用得着紫光陳瀅。
我行埋佢坐係白光毒撚隔離，佢望見我個樣又係嚇左嚇，但當住咁多人佢都唔敢太大反應。
陳瀅望望我，又望望白光毒撚:「咦，你個fd呀？」
白光毒撚唯有笑笑口話係，之後陳瀅都好大方得體咁向我示好:「hello,我叫fafa呀，都係阿dom個fd，大家之後pj一組好冇？」哇，fafa充滿善意個天使樣，真係連身為女人既我都心動左，怪唔得白光毒撚沉船。
咦，未住。
佢話佢叫阿dom？阿dom...阿當？阿當？！
記起啦，吳敢當！中學我成日叫佢做功課果個吳敢當。事關我中學最鍾意叫毒撚幫我做功課，貪佢地聽話又穩陣。不過我有每個月比翻錢佢當人工嫁，計起上黎都算係佢老闆。不過由於大家都只係各取所需，，離開左中學就冇再聯絡過。
不過比起中學，佢而家轉左黑框眼鏡，剪左個飛機頭，校服變左u記毒撚制服，真係要望多兩望先認到。
落堂之後我地一齊食飯，睇黎阿dom已經適應左我個鬼樣，不過我諗我個鬼樣應該好過睇住200磅肥婆食飯既。
餐飯fafa對住阿dom有講有笑，重好細心咁拎紙巾幫阿dom抹嘴:「污糟哂啦傻瓜！」哇，做到咁唔通已經係女朋友？不過見到阿dom笑到咁甜都祝福佢地既，條女人靚聲甜又好人。我諗紫色圈可能代表住善良既人都唔定。
之後fafa走之前我突登要左佢wtsapp，方便我日後計劃進行。
食完飯我就同阿dom繼續行，又行翻去a core個偷情位。終於可以問翻當時發生咩事啦！
「頭先果個你女朋友？勁喎咁都食到！」我拍左下佢膊頭，點知佢細細聲咁話:「未係...」
下，咁親密抹埋嘴都唔係呀？睇黎而家呢個世代，真係扑埋都仲係朋友。
「阿dom，我想你幫我。放心，我會比好處你，大家各取所需，好似當年中學咁。得唔得？」
我知錢阿dom唔係冇，畢竟中學我都係讀上流既國際學校。佢冇既，又想要既，應該係一段刻骨銘心既初戀。
「陳心如，幫你唔係問題呀。但你可唔可以解釋下你發生咩事先，i mean成個來龍去脈，你要一五一十講左比我知先。」
對住佢我都冇咩好掩飾，於是我一五一十將所有野同呢幾日全部經歷話哂比佢知。
「我明啦，姐係你入左因如肉身，但得我一個睇到你既靈魂。其實上次我都覺得怪嫁啦，果日你問完我點識你果陣，你突然間暈一暈，醒翻之後，我見到你個身同樣慢慢變型變翻之前鏡入面個肥婆。佢望住我mak大個口，之後唔知做咩野同我講唔好意思就衝走左。然後第二日見到既都係佢個樣。係今日上堂我先再見到你。」阿dom講完，我有啲頭緒....
句唔好意思係因如口頭禪黎....
如果冇估錯...
.....
「我而家得一個推論，應該而家我同因如share緊一個身體輪流用，但大家都冇得控制用到幾時。」
係咁就麻煩啦，我要諗方法比因如唔好阻住我既計劃。
「dom，我需要你幫我查岀面個係兇手。重點係証據，一定要拎到手。如果你幫到我，我應承你我會幫你追到fafa，比翻段初戀你。」
阿dom聽完似乎有啲尷尬，可能係提起fafa。
「deal」
yes！爽快！而家我有助攻，場仗終於冇咁難打。
「個計劃好簡單，放心。第一樣係監視。
我已經買左我屋企隔離棟豪宅，你呢排要搬入去住，一得閒就幫我睇下果兩房人有咩動靜。我今晚會放偷聽器係全部人間房度，你果邊可以同時進行偷聽既動作。」
「哇，竊聽風雲呀家下？聽落都好剌激咁。」
「重有一樣，等間同我去買一對智能手錶。我唔知幾時我會變翻因如，佢岀黎既話好大機會破壞我既計劃。到時我覺得就黎暈我就會發sos比你，等你知我已經唔係度。」
「哇...拍韓劇咩而家...」阿dom聽完微微笑左下，先發現原來佢有隻小虎牙。
「好認真，我諗上天比我呢個翻生機會唔係冇原因既。等陣幫我拍條片，之後有用。重有，提我買埋對講機，方便我地行動時用。」我好嚴肅咁望住佢隻眼講，feel到佢唔係好自在，佢即刻望開左。
「咁一切聽你指示。今晚就即刻行動。」