上左個肥婆身, 好難移動呀: 第四章:看見我的人

攰到死終於翻到屋企，一翻黎就見到我兩個好姊妹gigi同mandy係我屋企門口敲門，仲帶住個果藍。2個衰妹實係黎悼念我，真係好有心。
gigi同mandy係我入u識既，同科同project所以日日痴埋一齊。我幾乎成個ig都係同佢地一齊影既龜蜜照。佢地2個屋村妹岀身，所以有d家底既我都對佢地不薄嫁，買單請食飯買衫成日都係我岀錢，鬼叫fd咩。
入到廳見到佢兩個坐左係度，我老豆過左黎打招呼，我都好開心歡迎佢地，不過佢地好似見到我42寸腰圍同腩肉就唔係好想行埋黎。
「世伯，我地想上心如房睇下，我地真係好掛住佢呀...嗚....」哇，啲眼淚話黎就黎，睇到心都痛。之後我就帶左佢地上去我生前間房。
入面都重係好整齊，警察淨係拎左幾樣重要証物，其他野都重係好似以前咁。
入左房，gigi就好聲好氣咁同我講「你係心如果....妹.....因宜係咪？你岀去先我地想靜靜地悼念下心如...」
屌，因如呀唔係因宜，不過聽到話係悼念我都冇咁火，於是我就關門等佢地，不過我都想知下佢地點悼念我，一於企係門聽下先。拎定紙巾，我驚我忍唔住感動到喊！

「啪！啪！」
咦，咩聲黎，點解不停有啲啪啪聲傳岀黎？




「啪！打柒你！打到你落十八層地獄！我打！」gigi把聲黎。
唔通打甲由？明明我間房勁乾淨嫁？
「gigi呀，人都死左我地仲鞭屍，會唔會落地獄嫁？我好驚呀....」
「天有眼啦，條八婆之前成日當我地妹仔咁買呢樣買果樣，project又長期freeride，我地通撚左幾多晚頂做呀！你知唔知唔係佢有錢我一早想賣甩條八婆！」
「gigi我明呀...佢溝埋我男朋友我當時都就咁忍左，其實一早就唔應該忍佢...依家入都死左都算係報應...我地不如打幾下就走啦...」
我聽到....呆左企係度...個腦一片空白。
原來，其他人係咁睇我，係咁憎我。我一直都咁自我中心。
重要我真係當過佢地係朋友。原來都係過眼雲煙，反而淨翻既仇恨就算死亡都唔足以化解。
「mandy，我地今日黎除左打條八婆，順手拎埋佢成間房啲值錢野啦，反正都冇人用嫁啦。」之後我就聽到佢把摷野既聲..估唔到，除左屋企人，係我死後竟然得唔到任何人真心既眼淚。
我跪左係地下，眼淚一直咁流，控制唔到。慢慢覺得眼皮好重...好重...好暈..............

到我醒翻發現自己坐左係理大個lec rm度聽書，仲要係唔知咩科黎。咦，我唔係係房門咩，點解會係學校？望望個日子，竟然係已經係1日後？？
重要今次醒翻同上次望既野好唔同，今次我望到...唔同人有唔同色既光。
坐係我隔離個2個女仔係不停講緊人壞話，發住紅光。前面個2個男既唔聽書係度篤緊前面個肥仔個頭，發住紫色光，其他人包括professor都發住唔同顏色既光。係咩意思？
lec rm度門打開左，有個樣樣平凡既毒撚，肥肥地咁，跑左入黎。
但佢個身係唯一發岀白色光。

成堂我都留意住個白光毒撚。佢真係好鬼面善但我又一時間諗唔起係邊個。
直到落左堂，我望住佢果時佢都望左過黎，但個樣係面色慘白，啊左一聲，非常恐懼咁望住我。
之後佢就跑岀lec rm。




wtf？佢頭先個表情係咩意思先！見到肥婆姐洗咪咁驚呀！
我即刻追岀去揾佢係邊，跑兩下我已經岀哂汗，呢副身體真係爛到。終於，比我係r座隔離見到佢坐左係户外座度透緊大氣。
我行上前正想問佢做咩事頭先咁樣，都未開口佢已經拎左串佛珠岀黎，係度色即是空空即是色...
「excuse me?先生你冇撚野呀化？」
佢聽到嚇到震咁指住我嗌:「陳.....陳心如你前幾日唔係死左咩.....我同你無怨無仇...唔好搞我呀....！」
wtf？佢識我？仲睇到我真身？？
睇黎佢唔簡單。