荒島日記（新手、後宮甜）（不定期更新）: 二人.三

佢地四個相處咗一陣，達叔同四眼妹就帶咗雷門進一返嚟飛機殘骸。

我一開始以為自己眼花，達叔佢地三人出去走一圈，返嚟嘅時候無喇喇多咗個女仔。

辣椒妹直接衝到烤肉架個邊，對住烤架上嘅熊肉流曬口水。

而達叔搵到我嘅位置後，便同四眼妹一齊帶住個女仔走過嚟。
「東哥，同你介紹，依位係雷門進一。」

我望住依位個子矮小但十分俊俏嘅細路。


「吓？佢係男仔嚟，叫雷門進一？係個日本人嚟？」

佢竟然係男仔⋯

上天係如此的不公平⋯竟然賜了佢一副可以媲美美女嘅樣貌⋯

以前讀書見啲女同學睇個啲戀愛小說，佢就俊俏到似小說封面嘅男性角色。

達叔點點頭。
「係，佢係個日本人，今年十一歲。」



雷門進一好有禮貌咁鞠躬打招呼。
「こんにちは。」

「哥呢支娃。」
我點頭回應。

稀疏男注視著雷門進一成分鐘，然後便起身離開。
「er⋯我去訓一陣先⋯」



我見稀疏男要離開，便回頭問到。
「喂，你唔係要我介紹女俾你識咩？」

「介紹⋯遲啲識都唔怕⋯我去訓一陣先⋯尋晚實在訓得太少⋯好攰⋯」
於是稀疏男頭也不回地走入飛機殘骸內，搵處陰暗嘅位置就躺下。

「係呢，進一小朋友，你爸爸媽媽呢？」
看著依位日本小朋友，如果能夠在叢林生存咁耐，應該係有爸爸媽媽一直在身邊照顧吧。

雷門進一思考咗一輪我嘅說話，然後便得低頭細聲說到。
「お父さん⋯ 消えた⋯」

「你聽唔聽的明佢講咩？」
除咗爸爸之外，我就聽唔明咩意思。



達叔尷尬地R一R頭。
「我只係聽的明哦多散⋯」

我夠聽得明哦多散⋯

「又話經常去日本旅行。」
我不屑地望住達叔說到。

達叔緊張地連忙解釋到。
「我個居住係日本嘅表哥，同我溝通都係用中文⋯我根本就唔識日文⋯最多係識蠍魔知、押咩嗲、依沽⋯⋯」

我立即起身捉住達叔，然後用拳頭上嘅虎口不斷摩擦達叔個太陽穴，達叔立即求饒。
「啊⋯⋯東哥⋯對唔住⋯我知錯喇⋯放過我喇⋯啊⋯」

四眼妹滿面通紅，尷尬地分開了我地兩個，然後同我講。


「一開始我都以為佢係同爸爸媽媽走失，但佢一直都無引領我地去搵佢爸爸媽媽，似乎一直以嚟佢都係自己一個係叢林生存。」

「咁犀利？」
我驚訝地望向雷門進一。

雷門進一小朋友著住個套衫褲雖然已經污糟一片，有唔少位置都沾黏泥土，但卻無穿無爛。

佢真係郵輪出事之後就自己一個係依個佈滿野獸、危機處處嘅叢林到生活？會唔會太過厲害？我不敢相信。

我認認真真咁望住依位小朋友，佢出乎意料地無小朋友應有嘅稚氣，俾人感覺十分成熟。

「咦？佢有把刀。」
我下意識地伸手摸去佢把武士刀。

四眼妹見到我伸手，驚訝地立即衝到我面前阻擋我。


「唔好！！！」

我望住阻擋我嘅四眼妹，四眼妹搖一搖頭，我再望返去雷門進一。

雷門進一無咗剛才見面嘅和藹可親，佢個樣變得十分兇狠，雙眼緊盯著我嘅一舉一動，而雙手緊握著佢個把武士刀。

以佢嘅姿勢，如果我諗我隻手再伸前小小，佢應該就會拔刀斬過嚟⋯

四眼妹嘆了口氣，然後同我講。
「總之乜都好，唔好去掂佢把刀，唔係佢就會情緒失控，把刀仲重要過佢條命。」

達叔尷尬地笑住講。
「我唔記得同東哥你講唔好掂佢把刀，我一開始見到佢都差啲俾佢斬。」

「哦咩達西。」


我雙手合十，同雷門進一道歉，雷門進一才收返起兇狠嘅樣。

「ごめんなさい。」
雷門進一知道自己剛才嘅行為嚇親我，於是對住我鞠躬道歉。

真係個好有禮貌嘅小朋友。

「大陸仔，你啲裝備。」
四眼妹把開山刀同瑞士軍刀交到我面前。

我摸著跟咗我好耐嘅開山刀。
「多謝你地，原來你地出去就係為咗幫我搵返開山刀。」

達叔捽一捽個鼻。
「又唔算嘅，我地驚啲熊肉會食唔慣，所以走去打獵，順便幫你執返。」

雷門文太扭動著身軀，原來係要放下自己嘅小書包，佢嘅小書包係典型日本小學生必背十分耐用嘅牛皮書包。

佢打開個黑色小書包，書包裡面有幾個罐頭同就嚟爛嘅香蕉，佢仔細咁從書包裡返摷咗一陣，便拎出一本書出嚟。

一本泛黃到可以知道有段歷史嘅書，仲有股好濃郁嘅舊書味。

佢小心翼翼咁打開本書，好似驚自己會笨手笨腳整爛本書，將本舊書當寶物咁看待。

搵到裡面已經折起嘅一頁後便翻看，便好興奮咁指住裡面張相問我。
「この植物を見たことがありますか？」

「可唔可以俾我睇吓？」
我雙手遞上，雷門進一便把本書交到我手上。

「咦？依本係乜嘢嚟？」
四眼妹見我全神貫注咁睇本書，亦好奇咁走到我旁邊望。

四眼妹讀著書中照片下嘅內容。
「山烏龜，含多量瑟法丹質和輪黃藤寧，能清熱解毒、鎮靜、理氣止痛。多用於胃痛、潰瘍病、上呼吸道等感染、肺炎、敗血病⋯⋯」

我指著問到。
「你係要搵依棵植物？」

雷門進一點點頭，我將依本《野生草藥大全》交返佢手上，佢用水汪汪嘅大眼睛望住我，期待我能夠俾佢滿意嘅回答。

但我只能令佢失望，我搖一搖頭講。
「我無見過，你搵嚟做咩？你受咗傷？」

雷門進一見到我搖頭便感到失望，佢得低頭悶悶不樂咁將本書收返入小書包裡面，然後便咩起個小書包。

四眼妹見到雷門進一嘅動作後，便立即拉住佢隻手。
「你去邊？自己一個係叢林裡面會好危險。」

「佢應該係想搵依棵叫山烏龜嘅植物。」

「你自己一個搵實在危險喇，我地同你一齊搵啊？」
四眼妹緊緊拖實雷門進一唔放手。

我突然想起。
「係喇！藍醫生啱啱去咗搵山草藥，可能佢會清楚依隻藥，你唔好走，等藍醫生返嚟幫你。」

達叔知道雷門進一聽唔明我同四眼妹講咩，立即張開雙手擋著前路。
「雀多嗎嗲雀多嗎嗲。」

雷門進一疑惑咁望住我地三個。
「何？」



待續