荒島日記（新手、後宮甜）（不定期更新）: 二人.二
在叢林裡穿梭的三人。
「我地要去邊？」
辣椒妹見達叔同四眼妹行咗咁耐都無講嘢，便問到。
「我地去執返東哥啲武器。」
達叔繼續向前行。
四眼妹一路行一路睇沿途樹上嘅記號。
「應該係依個方向嘅喇。」
「你地行慢啲得唔得⋯我就嚟跟唔上你地⋯」
最後面嘅辣椒妹慢慢吞吞咁跟著，達叔唔敢得罪辣椒妹，唯有放慢腳步。
係樹海裡尋找咗十幾分鐘後，達叔終於係不遠處嘅地上見到反光個物品。
「嘿嘿，終於搵到喇！」
達叔雙眼發光，然後佢飛奔過去，執起尋日跌係到嘅開山刀。
辣椒妹見到達叔高舉嘅物品係開山刀後，便二話不說坐係地上休息。
「可以唞吓喇⋯終於可以唞吓喇⋯」
「大陸仔仲有把刀仔，應該都係跌係依附近。」
四眼妹講完，便環顧四週，尋找瑞士軍刀嘅蹤影。
達叔點一點頭，好認真咁睇清楚周圍每一寸土地。
辣椒妹坐係棵大樹下，大樹幫佢遮擋太陽，不時有涼風吹過，令疲倦嘅辣椒妹開始感到睡意。
慢慢地，慢慢地，辣椒妹就合埋雙眼。
嗖嗖嗖～嗖嗖嗖～
草叢俾涼風吹到發出聲音。
之後嘅幾陣涼風，吹到辣椒妹手臂痕癢，於是佢不斷咁摸自己手臂，內心感覺好似有啲嘢，令佢渾身不自在。
「唔知點解，我覺得好似俾咩監視咁我地，搵到就快啲走。」
「你唔會係俾個癲婆嚇親啊嘛？」
四眼妹口中所講嘅癲婆，就係係營地成日講鬼怪陰謀論嘅蓬頭散髮嘅女仔，我地依家大部分人都叫佢神婆。
話説尋晚神婆靠近隻熊嘅時候，突然話見到有個白光從熊嘅嘴裡飛出，然後圍住眾人飛了幾圈，再飛返入嘴裡面。
「陰魂不散啊！陰魂不散啊！佢唔肯離開依到啊⋯以後會搵我地報仇㗎⋯⋯」
神婆指著黑熊不斷大嗌。
「超！我先唔會俾佢啲鬼故嚇親。」
辣椒妹不屑地回答。
「把刀仔搵到喇！四眼妹！」
達叔執起把瑞士軍刀，然後用嘴吹走軍刀上嘅塵埃。
「我地可以返去嚕！」
四眼妹同達叔異口同聲，達叔收埋把軍刀後，似個細路咁跑跑跳跳咁返嚟。
原本笑容滿面嘅四眼妹突然恐懼地不斷退後，而辣椒妹見到後亦瞪大雙眼。
「咩⋯咩嚟⋯」
達叔見辣椒妹同四眼妹驚恐萬分嘅樣，便立即打咗個冷震，佢慢慢回頭，望去兩人聚焦嘅方向。
「嘩啊⋯⋯」
達叔俾眼前嚇到腳軟跌倒。
附近草叢裡企咗一個人，而那個人面上戴著鮮紅色嘅魔鬼面具，視線一直望住佢地三個，令佢地三個感到十分不安。
「你⋯你係邊個！」
四眼妹走上前扶起跌倒嘅達叔。
戴魔鬼面具嘅人無回答四眼妹嘅問題，一直默默咁望住佢地三人。
「人地問你你唔應人，你咁無禮貌嘅？」
辣椒妹叉著腰罵到，但戴面具嘅人仍然無開口說話。
「哎呀呀！日光日白出嚟嚇我！我問你嘢又唔睬我，我依家好好咁教訓吓佢！」
說罷，辣椒妹便扭動肩膀，行向戴惡魔面具嘅人到。
那個戴魔鬼面具嘅人見辣椒妹行咁過嚟，見佢不斷係到揮舞咁手臂，似乎係想過嚟對付佢，不過佢並無害怕辣椒妹，從草叢裡走出嚟。
依個戴魔鬼面具嘅人，上身著嘅係白色恤衫，外面套住件西裝背心，下半身著住條吊腳西褲，再搭配一對皮鞋。
「係個女仔嚟？」
雖然面具人著住整齊一套男性西裝，但佢長髮披肩，似乎係個女仔嚟。
「小姐，你叫乜名？」
達叔見係女仔便放下警惕。
面具人依然無回答達叔，四眼妹望清楚面具人後，立即拉住上前嘅辣椒妹。
「辣椒妹，咪亂走上去。」
「佢連米六都無，你覺得我會打唔贏佢？」
辣椒妹想fing甩四眼妹隻手，四眼妹直接成個人攬住辣椒妹，拖住辣椒妹唔俾佢上前。
「唔好去啊⋯個女仔有武器㗎⋯」
四眼妹坐在地上，緊緊攬實辣椒妹雙腿。
達叔同辣椒妹立即掃視面具人，發現面具人手上有一條好長嘅物件，再望清楚啲，係把日本刀嚟。
達叔緊張地吞了一啖口水，見面具人不斷靠近，於是佢提起把開山刀。
「咪再靠近啊⋯唔係就唔好怪我啊⋯」
面具人見達叔慌張咁提刀，於是向著達叔伸出五指。
「ちょっと待って！」
原本仲驚慌咁嘅達叔，聽到面具人講日文後，便望向四眼妹同辣椒妹。
「雀多嗎⋯哎？日文嚟？佢係日本人！」
四眼妹鬆開辣椒妹雙腿，然後起身拍屁股上嘅塵埃。
「唔怪得唔答我地喇，原來係雞同鴨講，根本聽唔明我地講咩。」
面具人除下面具，然後得低頭彎下腰，雙手緊貼著褲邊。
「こんにちは。」
「哥呢支蛙。」
達叔亦對著佢鞠躬，四眼妹同辣椒妹見達叔鞠躬後，亦在旁跟著鞠躬。
四眼妹聽完面具人把聲後就感到有些疑惑。
面具人挺直返成個人，佢撥一撥秀髮，終於可以睇清楚佢嘅樣。
佢雖然長髮披肩，但佢係一個男仔嚟！樣貌十分秀氣，雙眼明亮有神，猶如寶石般閃閃發光。
依個樣貌再加上長髮，真係好容易令人誤會佢係女仔。
「真係生得好精緻。」
四眼妹依個從來唔讚人樣貌嘅人，對住長髮少年，佢都情不自禁地讚美。
達叔點頭贊同四眼妹說話。
「如果我生到佢咁樣，我中學就溝死女喇⋯只可以用美少年嚟形容。」
辣椒妹翹起雙手，看著前面嘅長髮美少年。
「可惜，佢生得有啲矮。」
「噓！咁樣當面話人身高都有嘅？佢仲係個𡃁仔嚟，咁後生，大把時間俾佢發育長高。」
上一秒四眼妹個樣仲惡狠咁對住辣椒妹，下一秒便擰轉面溫柔咁問長髮美少年。
「what is your name？」
「進一！雷門進一！」
說罷，長髮美少年再一次對佢地三人鞠躬。
待續