荒島日記（新手、後宮甜）（不定期更新）: 尋仇.十五（6月18號更新）

「有無發覺隻熊好似瘦咗？」
我擰轉頭望講嘢嘅人，原來係嘉雯嚟，唔知佢係幾時走到我背後。

「佢唔係瘦咗，係佢成身濕曬，令到啲毛貼住佢啲肉。」
四眼妹解釋到。

黑熊果然好似上次咁，先去整濕自己再返嚟報仇，咁就唔怕我地啲火⋯

達叔見黑熊正在慢慢靠近，於是不斷咁揮舞自己手中嘅火把，黑熊並無因達叔揮舞火把而退後，反而不斷對著達叔發狠。



達叔見黑熊唔肯離開變得更加驚慌。
「東哥⋯點算啊⋯佢好似唔驚火⋯」

「係囉⋯大陸仔師弟⋯我地點算啊⋯隻熊已經開始靠近我地⋯」
肥豬劉亦跟著緊張地說到。

點算⋯依家點對付隻熊⋯我手傷咗⋯啲武器又唔係到⋯

我望一望身邊嘅人，達叔殺雞都無力，肥豬劉中看不中用，文健係個廢柴。



「哈哈～我會保護你地～」
光頭佬張開雙手，保護佢背後嘅稀疏男同藍醫生。

光頭佬係眾人裡面體魄最好，但今日對付隻熊已經消耗咗好多體力，而且係不斷防守個種，似乎唔識攻擊。

稀疏男就唔洗講，佢仲細膽過達叔。

「嘉雯，如果以後阿sir保護唔到你，咁就由我嚟保護你喇。」
肥豬劉擠到嘉雯身邊，然後伸出佢嘅鹹豬手到嘉雯條腰。



嘉雯推開肥豬劉隻手。
「唔洗，我自己識保護自己。」

「你咁柔弱，點可以保護到自己呢，你睇吓我，粗壯嘅臂彎！好有安全感！」
肥豬劉攬唔到嘉雯嘅蠻腰，便搭住嘉雯嘅膊頭，嘉雯鄙視咁望了佢一眼。

睇嚟肥豬劉想趁獅子狗瘋癲嘅時候，奪得這個大美人。

「哈哈哈！哈哈哈！」

「乜嘢料？」
我地眾人互相驚訝對望，然後一一回頭望背後聲音嘅方向⋯⋯飛機殘骸內。

「哈哈哈！哈哈哈！」
飛機殘骸內傳出獅子狗瘋癲般嘅笑聲。



「藍醫生，阿sir佢係唔係腦震盪⋯」

「唔確定，但有依個可能性。」
藍醫生冷淡地回答。

肥豬劉嚇了一跳，把原本搭在嘉雯膊頭上嘅手收返嚟。

獅子狗突然發瘋似的從飛機殘骸內跑出，我地眾人立即分開兩邊，讓出一條路俾獅子狗通行。

「阿sir⋯阿sir⋯」
肥豬劉無辦法接受獅子狗癡咗線，而一旁嘅嘉雯，對於獅子狗傻咗，似乎感到些許開心。

獅子狗一邊狂笑一邊跑，佢舉起手中大塊鐵，狠狠砸向黑熊，黑熊伸臂去擋，但仍被大塊鐵砸倒地。



what？

黑熊大字型咁趴係地上一動不動，大塊鐵壓住黑熊嘅頭部。

想起獅子狗剛才一直在飛機殘骸裡面。
「佢啱啱唔會係去拆舊鐵啊嘛⋯」

見黑熊毫無動靜，肥豬劉便拍爛手掌。
「阿sir！掂啊！」

獅子狗執起一個火把，慢慢靠近前面趴係地上完全無動靜嘅黑熊。

由於舊鐵完全遮擋黑熊嘅頭部，所以我地無辦法確認黑熊究竟係暈倒定係死去。

獅子狗愈嚟愈接近，突然停低腳步，從褲袋裡掏出個玻璃樽，把玻璃樽狠狠砸向黑熊嘅身軀。



玻璃樽砸向黑熊身軀後碎開，黑熊立即推開舊鐵彈返起身。

稀疏男望了一眼砸向黑熊而碎開嘅玻璃樽，便立即撫摸自己身體。

「我嘅酒呢⋯我嘅酒呢⋯」
稀疏男不斷尋找自己收埋起嚟嘅燒酒。

我望住此刻前方面紅耳赤嘅獅子狗。
「睇嚟你嘅酒俾佢偷飲曬。」

達叔唔明白獅子狗飲舊嘅目的。
「佢飲曬枝酒，諗住打醉拳啊？」

獅子狗對著黑熊再次發出瘋癲般嘅笑聲，佢嘅笑聲無嚇親面前嘅黑熊，反而嚇親佢背後嘅眾人。



「佢好似唔係幾正常⋯」

「笑成咁⋯真係癡咗線嘅人先會咁樣笑⋯」

獅子狗笑著笑著，便脱去上衣，露出佢魁梧壯碩嘅身材，雙臂嘅青筋突起。

「你睇吓⋯佢傻到除衫啊⋯」
啲女仔驚到縮埋一堆。

原本身上已經癒合嘅傷口，因為獅子狗激烈嘅郁動而裂開，開始流出少量嘅血水。

黑熊見獅子狗除衫是在挑釁佢，便對著獅子狗怒吼咆哮，獅子狗沒有退後半步，學著黑熊發出咆哮聲。

「阿sir真係癡咗線啊⋯」

獅子狗唔係癲咗，枝酒似乎係用嚟壯膽，用嚟戰勝佢今日嘅恐懼。

黑熊突然憤怒地衝向獅子狗，而獅子狗沒有退後，而係展開雙手，好似相撲手咁準備迎接隻黑熊。


怒火沖天嘅黑熊張開血盆大口，露出佢滿口嘅尖牙利齒。

巨大嘅熊掌伸到半空，尖銳嘅指甲已對準獅子狗，獅子狗可以贏黑熊嘅機會近乎零。

唔少人驚會見血腥嘅場面而緊閉著雙眼。

稀疏男捉緊光頭佬手臂。
「用長矛都打唔過佢，赤手空拳點打得贏隻黑熊⋯大佬⋯我地不如趁⋯⋯」

數人聽到稀疏男嘅說話後，亦想趁依個機會逃跑。

「你地一個二個都唔準走啊！阿sir咁樣去保護你地！你地一個二個都唔準離開！」
肥豬劉大喝一聲，佢幾個女伴立即站出人群外包圍大家。

「你想點啊！」
幾個女仔手拉手想推開肥豬劉眾人，肥豬劉攞出自己收藏嘅刀仔，令幾個女仔唔敢輕易妄動。

「快讓我們離開！你想死在這裡，我們可不想！快讓我出去！」
有個中年婦人衝出圈外同肥豬劉嘅女伴拉扯頭髮。

「停手！停手！你地唔好逼我啊！快啲同我停手！」
肥豬劉想叫停拉扯頭髮衣服嘅人。

對於身後嘅事情，我地已經見怪不怪。

獅子狗同黑熊愈來愈靠近，突然獅子狗嘴角上揚，近距離向著黑熊雙眼潑了手中嘅嘢。

「咩嚟？」

黑熊停下腳步，用手掌不斷抹自己嘅雙眼，而躲係黑熊身後嘅獅子狗冷笑數聲。
「睇唔到嘢呢！」

說罷，獅子狗舉起右拳，準備凌空跳躍打黑熊背後嘅頸部。

睇唔到嘢嘅黑熊察覺到危險，立即抬頭仰天，對著天空發出震耳欲聾嘅怒吼，係佢背後嘅獅子狗感到痛苦而掩耳。

較遠處嘅我地，聽到黑熊嘅咆哮聲後紛紛掩耳，而身後糾纏嘅眾人，亦因黑熊嘅咆哮而停下手腳。

「耳仔好痛⋯」
我地依個距離都如此痛苦，更何況同黑熊只有幾步之差嘅獅子狗。

咆哮音量過於強大，獅子狗頭昏腦脹，已經痛苦到面容扭曲，半跪在地上。

黑熊聽到身後嘅動靜，立即轉身向獅子狗嘅方向衝撞，獅子狗無及時避開，被撞倒到一邊。

停止了咆哮，唔少人跪倒在地上，再無力氣去爭吵。

睇唔到嘢嘅黑熊只能靠聽覺同嗅覺尋找獵物，佢好細心咁聆聽周圍嘅動靜，亦用鼻不斷咁聞。

光頭佬用手掌拍一拍自己塊面，好讓自己清醒啲。

見獅子狗被撞倒後，佢就有啲想衝上去救佢，但稀疏男張開雙手擋在前方，唔俾光頭佬衝上去。

倒在地上嘅獅子狗吐了一口血，黑熊聽到聲音後立即撲向獅子狗，哪知獅子狗立即起身躲避，並且快速向黑熊嘅頭部揮了一下重拳。

「發生乜嘢事？」
達叔剛睜開雙眼，只見到獅子狗已站立，而黑熊無緣無故退後了一步。

我驚訝咁望住獅子狗，因為獅子狗依一拳實在太快⋯如果唔係聽到啪一下嘅聲音，我都唔知獅子狗向黑熊揮拳⋯

四眼妹托一托副眼鏡，雙眼緊盯著遠處對付嘅獅子狗。

黑熊呆了數秒才反應過嚟，憤怒地對著前方準備咆哮，哪知獅子狗又一拳揮來。

又一拳⋯

好快⋯

快到一眨眼就會錯過⋯

「大陸仔，你睇吓，隻熊塊面！」
雪兒捉緊我指向黑熊。

此刻黑熊嘅面上沾滿鮮血，但啲血並唔似係嘴裡吐出⋯

黑熊俾獅子狗徹底惹怒，對著周圍瘋狂亂爪，獅子狗立即退後數步，但仍俾黑熊爪中，手臂上流出不少鮮血。

「佢手上戴住武器。」
辣椒妹好淡定咁講，目前注視著獅子狗雙手上。

我望去獅子狗雙手，獅子狗握起雙拳，拳頭上有舊銀黑色嘅物體，係指虎嚟！

竟然有指虎⋯

黑熊繼續瘋狂亂爪，獅子狗便不斷退後，如拳擊手般把雙拳放在鼻前，目光緊盯著黑熊一舉一動，尋找揮拳嘅好時機。



待續