荒島日記（新手、後宮甜）（不定期更新）: 尋仇.十二（5月25號更新）

我環顧四週，四眼妹知道我係到搵咩，於是答我。
「唔洗望喇，我已經查清楚曬，得高佬佳同MK傑唔見人，其他人都返曬嚟。」

「文健呢？」
我印象中，文健係第一個跑嘅人。

「佢第一個返到嚟。」
四眼妹指向秘書Lily旁嘅文健。

「佢地兩個唔見咗仲好，唔洗日日都同我地作對，耳根都清靜曬～」


我對於達叔嘅心情係非常理解，我未嚟之前，達叔就成日俾佢地幾個蝦蝦霸霸，依家佢地唔見咗，達叔唔開心就奇。

「喂！文健！」
肥豬劉突然大嗌著文健，然後一步步咁行過去。

文健見到肥豬劉嘅眼神後，認為肥豬劉因為佢嘅逃跑而搵佢出氣，所以嚇到立即躲係秘書Lily背後。

「怎麼了怎麼了？」
見文健好驚慌咁躲係佢背後，秘書Lily就擰轉頭問。



「文健！！」
肥豬劉瞪大雙眼走到上前叉著腰。

「劉日生，你想怎麼樣？都把文健嚇成這樣了。」
秘書Lily張開雙手擋住肥豬劉。

秘書Lily個人就係特別善良，無論對象係邊個，佢都會好願意咁伸出援手。

肥豬劉見秘書Lily咁保護文健，於是把原本憤怒嘅表情收起，露出微笑對著眾人。
「誤會喇誤會喇，我只係搵文健傾幾句姐，絕對唔係搵佢麻煩。」



依啲虛假、皮笑肉不笑嘅表情，身經職場多年嘅秘書Lily一眼就已經完全看穿，絕對唔會相信肥豬劉講嘅嘢。

肥豬劉見秘書Lily仍然無動於衷，面上嘅笑容變得更誇張，實足小丑一樣。
「我真係只係嚟搵文健傾幾句。」

秘書Lily依然擋在兩人中間。
「那就直接在這問吧。」

見秘書Lily態度依然強硬，肥豬劉只好在眾人前直接問。
「喂，你有無見過阿佳同阿傑？」

文健躲係秘書Lily身厚回答。
「無⋯無啊！我第一返到嚟！一直都無見過佢地！」



肥豬劉繼續問。
「咁你知唔知佢地去咗邊？」

「唔知。」

「怎麼了？」
原本在飛機駕駛室內嘅肥佬陳，聽到外面討論嘅聲音後便走出嚟。

而緊隨肥佬陳，一同步出駕駛室嘅人，係佢嘅女人凌兒。

凌兒一邊行過嚟一邊扣返衣服上嘅鈕扣，可以估到剛才佢地兩個係駕駛室裡面做咁啲咩。

係喇，唔記得同大家講，原本駕駛室係屬於稀疏男光頭佬兩兄弟，佢兩兄弟為咗同大家打好關係，所以將駕駛室送咗俾肥佬陳做寢室。

見肥佬陳走過嚟問，肥豬劉便講。


「哦，陳總，其實係咁嘅，阿佳同阿傑本來比我地幾個早返嚟，但依家仍然唔見佢地兩個。」

「陳總，他們兩個不見，我們要派人去找他們嗎？」
秘書Lily見高佬佳兩人失蹤而變得有些緊張。

「別，他們在森林裡面走失是他們的事，已經弄了標記還是不會回來，就怪他們自己吧。」
肥佬陳一如既往不在乎其他人生命，高佬佳同MK傑也不例外。

肥豬劉突然拍曬手。
「陳總講得好！其實我都無打算去搵佢地兩個。」

秘書Lily疑惑咁望向肥豬劉，肥豬劉見到後便立即解釋。
「依家已經天黑，而且阿sir受咗傷，個隻熊可能仲係附近，我地就咁摸黑入叢林搵佢地實在太危險。」

聽完肥豬劉依番說話，再加上佢面上嘅笑容，睇嚟佢同高佬佳已經決裂。



「報⋯報告！陳⋯陳總⋯我有話要說⋯」
有個女人走咗過嚟。

我地全部人擰轉頭望個女人，原本個女人有些緊張，見到眾人目光投向佢，佢雙腿就緊張地顫抖起嚟，然後支支吾吾咁講。
「陳⋯陳總⋯我們的⋯我們的⋯」

睇住佢講嘢吞吞吐吐，肥佬陳顯得不耐煩。
「我們的什麼快說。」

我想起依個女人，佢係留係到負責煮食嘅其中一人。
「我們的⋯食物⋯不夠⋯」

「什麼？」
肥佬陳聽完高佬佳同MK傑失蹤無感到震驚，反而對唔夠食物感到震驚。



肥佬陳激動地捉住一旁嘅文健。
「你們的食物呢？食物呢？難道全部都拿去喂熊去了？」

「我⋯我唔係負責攞食物⋯係阿佳⋯無錯！係阿佳同傑少負責攞食物㗎！」
文健講完，眾人先想起大部分嘅食物都係高佬佳同MK傑嘅竹籃裡⋯



「睇嚟佢地兩個係俾叢林裡面嘅靈體捉咗去做交替。」
蓬鬆頭髮嘅女仔突然在一旁好認真地說到，眾人聽完紛紛反白眼。



待續