荒島日記（新手、後宮甜）（不定期更新）: 尋仇.十

稀疏男有些失望。
「就咁樣趕走佢⋯佢之後會唔會再嚟搵我地報仇⋯」

我無奈咁望稀疏男一眼。
「乜你覺得我地有辦法殺死佢？」

達叔走返嚟後不斷吐口水。
「我呸呸！呸！呸！啲酒好辣！」

我把剩餘嘅酒交返俾稀疏男，稀疏男接過後，好緊張地望玻璃瓶裡剩餘嘅酒。



稀疏男擺出副欲哭無淚嘅樣。
「我嘅酒⋯我好少飲⋯最多係飲一啖仔⋯你竟然用咗我一半⋯」

四眼妹無眼睇稀疏男。
「飲酒咁唔健康，趁係個島上面生活就戒咗佢喇～你無事啊嘛？有無受傷？」

四眼妹好溫柔咁問癱坐係一旁嘅光頭佬，光頭佬立即坐返起身，笑著說。
「哈～我無事啊～」



「大佬興⋯你嚇死我喇⋯以後唔好再做啲咁危險嘅事，知唔知道？」
稀疏男走到光頭佬身邊，好認真仔細咁觀察光頭佬嘅身軀。

四眼妹托一托副眼鏡。
「目前觀察嚟睇，只有少少嘅皮外傷，等陣返去搵藍醫生再仔細咁睇吓。」

光頭佬聽到四眼妹提起藍醫生，成個人立即變得精神煥發。
「哈～藍醫生？好啊～藍醫生～我要藍醫生幫我睇～哈哈～」

「我地過去睇吓獅子狗佢地點。」


於是我地五人走返去搵獅子狗佢地。

獅子狗原地不動，仍然係地上昏迷，而肥豬劉趴在獅子狗身邊，見到我地五個人後，肥豬劉抬起頭伸手呼喚著。
「大陸仔⋯大陸仔⋯」

我地走到佢地身邊，肥豬劉緊緊捉住我嘅手，吃力地問到。
「隻⋯隻熊呢？」

「俾我地趕走咗。」

肥豬劉聽完後更加用力捉實我手，眼神充滿著恐懼。
「點解唔殺死佢⋯隻熊⋯佢等陣會再返嚟搵我地報仇⋯」

「我諗應該唔會掛。」
想起剛才俾達叔噴火嚇到連滾帶爬個黑熊，短時間內應該唔會再返嚟搵我地掛？



四眼妹走上前捉住肥豬劉隻手，肥豬劉立即擺出好痛苦嘅樣，嚇到四眼妹鬆開手。
「做咩⋯你傷得好重？」

肥豬劉咬著牙點點頭，頭上嘅汗水不斷從臉頰滑落，然後顫抖著說。
「你地唔洗理我⋯求下你地⋯快啲帶阿sir返去先⋯」

四眼妹再次上前捉住肥豬劉。
「雖然你一直以黎都好黑人憎！但留你一個係野外，你只會成為野獸嘅食物。」

肥豬劉雙眼通紅說到。
「我無得救嘅喇⋯」

「我地仲有藍醫生係到，走喇，藍醫生實有方法醫你。」
在一旁嘅達叔說到，並且上前想同四眼妹一齊扶起肥豬劉。



肥豬劉個樣顯得有口難言，我看著肥豬劉一直趴住嘅姿勢，我腦海立即想起血腥恐怖嘅畫面。
「肥豬劉⋯你⋯唔會係俾黑熊爪到⋯肚破腸流啊嘛？」

肥豬劉聽完我嘅說話後望住我沈默咗一陣，然後點頭表示。

稀疏男見肥豬劉點頭，便嚇到跳到一邊。
「嘩⋯我最驚啲咁血腥嘅嘢⋯」

「我已經無得救⋯你地走喇⋯」
肥豬劉推開四眼妹同達叔嘅手，苦苦哀求我地快啲帶獅子狗離開。

雖然啱啱覺得佢同獅子狗嘅師生感情係虛假嘅，但睇返營地眾人大難臨頭各自飛，高佬佳見死不救，唯獨你一個堅決留低陪住獅子狗。

再加上此刻你不斷哀求我地帶走獅子狗，依段感情是多麼真實。



獅子狗能夠有你咁嘅學生，總算老懷安慰。

正當大家沈默嘅時候，光頭佬突然走上前，然後佢二話不說就抱起肥豬劉，肥豬劉依個大肥仔竟然俾佢抱得如此輕鬆⋯

肥豬劉突然俾光頭佬抱起，便發呆咁望住光頭佬。

稀疏男見到光頭佬此舉，就想叫光頭佬快啲放返低肥豬劉，雙眼不自覺地望向肥豬劉肚嘅位置。
「嘩⋯⋯咪住！」

稀疏男雙眼緊盯著肥豬劉個肚，而我地幾個亦都望向肥豬劉肚腩嘅位置⋯

「無事嘅？」
除咗件衫破了幾個洞，肥豬劉並無肚破腸流，只有少量位置沾了鼻血。



四眼妹見唔到肥豬劉所講嘅嚴重傷勢，便發怒問到。
「喂！你又話重傷嘅！」

肥豬劉此刻啞口無言，只係好緊張咁望住我地幾個，好似做錯事嘅細路驚俾大人發現咁。

「你究竟發生乜嘢事！好從實招來！」
原本稀疏男想走上前望實肥豬劉，突然佢按住個鼻退後數步。
「嘩咩嘢味⋯咁臭嘅⋯」


一股強烈嘅尿騷味從肥豬劉條褲中飄出⋯



待續