荒島日記（新手、後宮甜）（不定期更新）: 尋仇.九（5月9更新）

「認真呢？」
四眼妹仍然唔相信我嘅計劃。

「唔唔⋯」
達叔獨自一個走到最前，而我地三個係佢後面跟住。

達叔愈嚟愈接近隻黑熊，佢回頭望返過嚟，用楚楚可憐嘅眼神望住我，我立即伸出個大拇指俾佢。
「加油！達叔！你得㗎！」

達叔硬著頭皮繼續上前，黑熊此刻仲同咁光頭佬搏鬥，光頭佬嘅防禦技術真係無得頂，係得佢一個先可以同隻黑熊糾纏咁耐，俾著其他人就一早歸西。



「大佬興⋯」
稀疏男見到同黑熊搏鬥咁嘅光頭佬，聲音開始變得哭腔。

「唔好大佬前大佬後，快啲進行計劃！」
我講完，稀疏男拎起塊大石頭，向著黑熊方向砸去。

舊石頭跌係黑熊附近不遠，黑熊隨即擰頭望過嚟。

「掂！達叔！到你喇！」


見到黑熊俾石頭嘅聲音引開注意，於是我大嗌達叔準備開始跳舞。

達叔見到黑熊回頭望住佢，嚇到雙腿開始顫抖起嚟。

我一直係後面幫達叔打氣。
「達叔！唔洗驚佢㗎！跳喇！盡情咁跳舞喇！好似係學校個陣咁跳喇！」

達叔鼓起勇氣，雙腳分開紮好個馬，慢慢咁舉起手上燃燒中嘅火把，右手上嘅火把向左揮兩下，然後到左手上嘅火把向右揮兩下，再各自旋轉兩圈。

「記得唔好飲落肚！」


我提醒達叔。

原本黑熊見到火把就已經感到些少害怕，依家火光仲不斷在空中跳動，嚇到佢立即退後了數步。

四眼妹同稀疏男望住達叔只需要扭動上半身嘅舞蹈，兩人目瞪口呆講唔出半句說話。

「無錯！就係咁喇！fire！！！」
見到達叔完全無生疏嘅舞姿，我有些少感動，佢並無忘記個舞蹈。

達叔雙手轉變成一致向右揮去，然後再一致向左揮去，動作重複數次，令火光係空中形成U字。

重複數次揮左揮右形成U字嘅動作後，達叔雙手合併，用火把在空中不斷重複畫圓圈後，握實火把，向著兩邊做了射箭嘅動作。

四眼妹開始忍唔住笑出聲。
「佢跳咁乜⋯嘢舞⋯同佢嘅娃娃愛天下有得揮，哈。」



「依個舞你無睇過？係應援舞嚟，我將火把代替跳舞嘅螢光棒。」

四眼妹聽到後感到好奇。
「應援舞？哈？點解達叔會識跳依啲咁奇怪嘅舞。」

「好似係達叔有年暑假飛咗去佢日本嘅表哥屋企玩，佢個居住日本表哥係個宅男嚟，達叔就成個暑假跟住表哥去睇偶像表演，然後就學識咗依隻舞。」
想返起個時達叔係音樂堂跳咗依隻舞，俾班上嘅其他同學笑足成個學期⋯

達叔以為依隻舞會吸引到大家，點知會成為大家嘅笑柄⋯從此之後達叔無再係我地面前跳舞。

依家望返達叔，達叔佢好似開始進入狀態，跳得愈嚟愈勁，愈嚟愈快！頭部亦開始跟住擺手嘅幅度而扭動，條腰都開始左右扭動。

「就係咁喇達叔！！megu megu fire！megu megu fire！！megu megu fire！摩多摩多！！！」



四眼妹一開始俾我突然嘅大嗌嚇咗一跳，但聽我嗌咗一陣便笑咗出嚟。
「大陸仔你唱乜嘢？咩菇咩菇廢呀？」

「依首係當時應援舞最興嘅歌嚟，喂！你兩個唔好齋望住我，快啲跟住我一齊唱，達叔聽到我地唱，去嘅情緒先會高漲！先會跳得更加好！」
我拉住四眼妹上前一齊唱。

「megu megu fire！megu megu fire！！megu megu fire！摩多摩多！！！」
於是我地三個係後面大嗌著。

稀疏男起初好唔情願地跟住我地唱，但見到達叔氣勢愈嚟愈勁，無懼眼前嘅黑熊，一步步咁靠近過去，將黑熊逼退到一邊救咗光頭佬後，便盡情咁唱依首歌。

黑熊已經離光頭佬甚遠，此刻係正達叔嘅前方不遠，於是我大嗌。
「達叔！機會嚟喇！」

達叔聽到我嘅大嗌，佢對準著黑熊，把雙手嘅火把火頭搭埋一齊，形成三角形嘅形狀。



達叔回想起我一開始同佢講嘅說話。
...達叔，你用跳舞去逼退隻黑熊，逼到佢去角落頭。

記得！唔好飲落肚。

達叔，你要記住，一定要對準黑熊，機會只係得一次...

「達叔！！！」
我們三個大嗌著。

達叔瞄準黑熊，向著火頭，噴出口中嘅白酒，酒精含量高嘅白酒接觸到火頭後，形成一條巨大嘅火舌衝向黑熊方向。

「有無睇過火影忍者？依招就係豪火球之術！」



黑熊見到噴出熊熊烈火嘅達叔，嚇到連滾帶爬慌亂逃跑，一眨眼就係叢林裡不見蹤影⋯




待續