荒島日記（新手、後宮甜）（不定期更新）: 尋仇.二

「我係到！！！」

背後方向傳嚟稀疏男嘅聲音，眾人紛紛回頭望去，見稀疏男正以十分風騷嘅步伐走過嚟。

「你⋯」
我瞪大雙眼望住稀疏男。

「做咩？係唔係俾英俊嘅我嚇親？」
稀疏男見我地三個呆咗，佢依然打著拍子，繼續以風騷嘅步伐走到我地面前。



「細佬～你好靚仔啊～不過我覺得～都係我靚仔啲～哈哈哈～」
光頭佬繼續傻笑。

四眼妹望住稀疏男嘅新造型谷到面紅，然後開始爆笑起嚟。
「哈哈哈！！你個頭想點啊？你件衫又想點啊？笑死我啦！哈哈哈！！」

「吓？你認真啲睇！」
稀疏男挨近四眼妹，好讓四眼妹睇清楚佢嘅中間分界頭。

稀疏男挨近，令四眼妹可以近距離，更清晰咁望住稀疏男用稀少嘅頭髮，強行中間分界，嘲笑嘅聲音變得更大。



在一旁強忍住嘅達叔，最後都係敵不過稀疏男嘅靠近，捧腹大笑。

稀疏男一臉無奈咁望住四眼妹同達叔兩人，然後擰轉頭問我。
「乜我嘅造型咁好笑咩？」

我忍住笑意，指住稀疏男身上嘅帶有波點圖案嘅西裝。
「你套西裝邊到嚟？」

「套西裝？我套溝女戰衣嚟，我去到邊都會帶住佢。」


稀疏男好溫柔咁摸自己套西裝。

「溝女戰衣！哈哈哈！！」
達叔同四眼妹聽完稀疏男嘅說話，兩人嘅笑聲再次放大。

稀疏男搖搖頭。
「所以話你地班後生仔識啲咩啊⋯」




「啊！！！！」
正當達叔同四眼妹仲係到大笑，遠處方向傳嚟尖叫聲。

四眼妹同達叔隨即停止嘲笑，我地三人互相望了一眼。


「弊！！」

我地五人立即衝向臨時居住地⋯




一分鐘後，我地終於跑返到飛機殘骸，此刻卻空無一人⋯

「人呢？啲人去曬邊啊？」
我望住周圍，亂七八糟嘅食具、逐漸熄滅嘅炭火，地上未乾透嘅血跡。

達叔同四眼妹緊張地冒著冷汗，稀疏男害怕到躲在光頭佬背後，而光頭佬收起一直以嚟嘅笑容，無表情咁望住四周。

「雪兒！！秋儀！！辣椒妹！！」


我不斷大嗌著。

「學東哥？」
「大陸仔？大陸仔！我地係裡面啊！！」
機頭傳嚟辣椒妹同秋儀嘅聲音，隱約聽到其他女仔嘅聲音。

「辣椒妹？秋儀？你地係駕駛室啊？」
我一邊嗌一邊靠近機頭位置。

「大陸仔唔好行過嚟啊！！！」
雪兒大嗌無幾耐，我便係外面，望到機身殘骸裡，有個影子係裡面郁動。

佢不斷用手推著駕駛室外嘅門，但佢無觸動到開關，無辦法打開。

我顫抖的退後數步。


「達叔⋯四眼妹⋯走⋯快啲走！！！」

達叔同四眼妹仲未反應過嚟，機身殘骸中傳出物品被推開嘅聲音，爬出個啡黑色嘅龐然大物，見到眼前嘅我後，便企直佢兩米高嘅身軀。

企係佢五米遠距離嘅我，此刻嚇到滿頭大汗，雙腿顫抖得好厲害⋯

「熊⋯熊啊！！」
達叔同四眼妹嚇到把收穫跌在地上，稀疏男嚇到完全講唔到嘢。

望住佢心口燒焦嘅毛髮⋯我好肯定⋯佢就係之前俾我斬傷趕走個隻黑熊嚟⋯

我立即拉起弓箭對準黑熊，由於雙手顫抖，令枝箭只係黑熊嘅膊頭上划過⋯

黑熊聞到膊頭上嘅血味後，佢表情開始變得猙獰，露出密密麻麻嘅尖牙。



點算⋯點去對付佢⋯

四眼妹攞出我把開山刀，原本慢慢靠近我嘅黑熊，望到四眼妹後，立即向住四眼妹方向，發出震耳欲聾嘅咆哮聲，然後趴落地下憤怒地向住四眼妹方向奔去。

四眼妹同達叔眾人見到黑熊衝向佢地，立即掉頭狂奔，黑熊一邊跑一邊憤怒地吼叫，完全無視咗我⋯

隻黑熊本身係靠近我，想先對付我，但見到四眼妹後，就將目標轉成四眼妹。

佢係見到四眼妹攞住把刀先會咆哮，變得咁激動，即係黑熊唔係認得我地，而係認得把刀。

如果四眼妹一直攞住把開山刀，隻黑熊一定唔會放過四眼妹⋯

四眼妹同達叔趁黑熊仲未追到佢地，爬上棵大樹上躲避佢，而稀疏男同光頭佬繼續跑，黑熊跑到樹下，抬頭望著達叔四眼妹兩人。

「救命啊！東哥！」
達叔緊緊攬實樹幹。

我對著黑熊再次拉弓，黑熊察覺到背後方向嘅我，擰轉身望過嚟，我射去一箭，被黑熊好輕易地用手拍打擋下。

睇嚟弓箭係完全無辦法對付你。
「四眼妹！掉把刀俾我！」

「好！！」
四眼妹把開山刀拋到我面前，我執起把刀，黑熊個樣變得更加猙獰。

「嗚啊！！！！」
黑熊憤怒地咆哮，周圍樹上嘅鳥類動物都被嚇到亂飛。

我執起地上嘅沙石，向著黑熊潑去，黑熊知道我嘅目的，立即用熊掌遮擋雙眼。

黑熊經過上次胡椒粉嘅教訓，依家就好清楚要保護雙眼⋯

我緊握著手中嘅開山刀，黑熊得瑟地對著我大字型咆哮。

望著躲在不遠處達叔同四眼妹，兩人目光充滿著恐懼。


我要諗個辦法對付佢，令大家安全離開⋯



待續