荒島日記（新手、後宮甜）（不定期更新）: 尋仇.一（4月6號更新）
「細佬，如果係油尖旺有人敢恰你嘅話，響我地兩兄弟嘅朵，包你無事。」
稀疏男係我面前拍曬心口。
「無錯啊～」
光頭佬係旁邊傻笑著和應。
「係嘅係嘅⋯」
其實我唔係好想理佢兩兄弟。
今朝早開會，肥佬陳話大家連日嚟都匆忙咁趕路，無好好咁休息，於是決定大家係飛機嘅殘骸到住多一晚。
然後係我地準備去打獵嘅時候，獅子狗叫停咗我地，將稀疏男兩兄弟加入我地嘅捕獵隊伍，於是就出現咗依家嘅情況。
我走到其中一棵樹下蹲坐，利用棵樹遮擋我嘅身影，稀疏男亦係依個時候走咗過嚟蹲坐。
「細佬，有個問題想問你。」
稀疏男左望右望，然後好細聲咁係我耳邊問到。
「尋晚係你旁邊訓個三條女⋯真係你女朋友嚟？」
「嗯。」
我環顧四週，睇吓周圍嘅草叢有無動靜，有無小動物經過。
「嘩！你就好啦！」
稀疏男對著我一臉羨慕。
「係啊係啊～你就好啦～女朋友比我住個到嘅妹妹仲要靚～」
光頭佬唔知幾時蹲坐係我後面。
稀疏男用鄙視嘅眼神望住光頭佬。
「哎！點可以同個啲妹妹比？個啲妹妹全部都係整容嘅北⋯」
「喂！！！你兩個究竟係嚟做嘢定嚟吹水啊？啲動物都俾你地吓走曬！」
四眼妹嬲霸霸咁望住稀疏男兩兄弟。
稀疏男見四眼妹憤怒嘅樣，立即低頭望向其他地方，等到四眼妹擰轉身離開後，稀疏男先走返嚟，再次問我。
「咁依個女仔呢？」
我無奈咁望了稀疏男一眼。
「佢做得你個女⋯你都啱？」
稀疏男立即解釋。
「無⋯我問吓姐，我都係鐘意啲三十左右嘅女人。」
「三十歲左右⋯」
「你啲𡃁仔識啲咩啊，三十歲左右嘅女人先有女人味，技術先好～」
說著說著，稀疏男擺出個淫賤嘅樣。
「三十歲左右嘅女人，尋晚食嘢個陣，你坐係佢地旁邊喎。」
稀疏男聽到後便垂頭喪氣。
「唉⋯唔好講佢地幾個啦⋯同佢地幾個完全無交流⋯」
「交流⋯」
「無錯，人要有交流，先會互相認識，知道對方嘅好與壞。」
稀疏男講到好似個愛情專家咁。
「係啊係啊～我同藍醫生都係有交流～先會互相認識～」
光頭佬傻笑著和應稀疏男。
「大佬興都唔知行乜嘢狗屎運，咁靚女嘅藍醫生竟然同你有傾有笑。」
稀疏男一臉不解地望住光頭佬。
光頭佬怕醜地摸自己嘅光頭，傻笑著。
「可能係我靚仔～」
突然我想起了某人。
「我諗，你可以介紹一個人俾你。」
原本對著光頭佬投放羨慕嘅目光嘅稀疏男，聽到我話會介紹個女人俾佢識，立即好認真咁望住我。
「三十歲左右？」
「三十歲左右。」
「肯交流？」
「肯交流。」
稀疏男激動地捉住我隻手。
「你係我嘅再生父母啊⋯佢⋯佢依家係邊到？」
見到稀疏男咁嘅反應，可想而知佢係幾想溝到女。
「佢依家應該係臨時營地個到，我今晚就介紹俾你識。」
稀疏男感到開心，開始期待今晚嘅來臨。
「咁我今晚洗唔洗打扮一下，梳返個靚頭去見佢，話曬都要俾個好印象人。」
「唔洗啦嘛⋯隨便見吓佢就得啦⋯」
我望著稀疏男頭上僅餘嘅頭髮，我心諗，你仲有咩髮型可以整到⋯
稀疏男一臉認真咁望我。
「咩話？點可以咁隨便？正所謂男人靠髮型！女人靠化妝！」
說罷，稀疏男從褲袋裡掏出個小鏡和髮梳，然後佢對著小鏡不斷梳頭髮，並且不斷擺出唔同嘅表情。
在旁嘅我看到稀疏男不斷風騷地變換表情，差啲連中午飯都想嘔出嚟。
為免眼冤，我走到另一邊，開始專心咁去打獵，一陣間，就同達叔四眼妹合力捉到兩三隻野兔。
光頭佬份人雖然傻傻地，但佢都識點去打獵，原本我地三個認為佢會無乜收穫，點知佢撲到隻野雞返嚟，而且仲搵到野雞嘅巢穴，攞埋啲野雞蛋。
「嘩！係雞蛋喎！」
四眼妹伸頭過去，雙眼發光咁望住光頭佬手上嘅數隻雞蛋。
「你鐘意啊？我送一隻俾你啊～」
光頭佬將其中一隻雞蛋遞到四眼妹手上。
「多謝！！！你真係好好人！」
四眼妹如獲至寶般，將隻野雞蛋棒在懷裡。
「唔洗客氣～哈哈哈～」
光頭佬大笑數聲。
「四眼妹，你咁樣攬住隻雞蛋，小心孵出雞仔出嚟。」
「係個島住咁耐，千辛萬苦先搵到雞蛋返嚟，我肯定要好好保護佢啦，雞蛋營養價值咁高，等陣肯定有好多人搶。」
聽完四眼妹咁講，光頭佬都開始將啲雞蛋，小心翼翼咁收埋唔俾其他人發現。
過咗一陣，我地又捉咗兩隻野雞，今日嘅收穫已經達標，於是決定提早返去。
達叔高興地在隊伍最前，而達叔身後嘅四眼妹不斷左望右望，好似真係驚有人會搶走佢隻蛋咁。
我就跟係四眼妹後面，我攞住把弓箭，萬一遇到猛獸，都可以第一時間去對付。
而在我背後嘅係光頭佬，佢一邊笑一邊擔住條長竹，長竹嘅兩端吊掛著嘅，都係今日收穫嘅野雞同野兔。
話時話，光頭佬依家嘅行為，有啲似西遊記裡面嘅沙僧。
「估唔到今日我地四個第一次拍檔就咁快搞掂，而且收穫咁多。」
四眼妹幾開心，睇嚟佢已經俾光頭佬嘅一隻雞蛋搞掂咗。
「係啊係啊～我地四個係好拍檔啊～」
光頭佬一如繼往地傻笑著。
「四個？咪住！你細佬⋯啊⋯阿發理兄去咗邊？」
我一講完，大家此刻先察覺到稀疏男唔見咗人好耐⋯⋯
待續