荒島日記（新手、後宮甜）（不定期更新）: 尋仇.三

係啦，把開山刀俾四眼妹佢地打磨過，已經唔係之前個把鈍刀。

我紮好個馬，慢慢抬起右手，將把開山刀放在眼前，黑熊見到我姿勢嘅轉變，再次仰天憤怒地咆哮。

機會嚟喇！

我趁黑熊未反應過嚟，立即掉頭狂奔。

三十六計！走為上計！



「跑啊！達叔！四眼妹！」
我一邊跑一邊大嗌。

四眼妹同達叔見到我狂奔後，向著我反方向跑去，跑返去飛機殘骸到。

我回頭望去，見到黑熊憤怒地追住我，而唔係去追達叔同四眼妹，便鬆了口氣。

我不斷觀察周圍環境，尋找方法可以擺脫黑熊嘅追捕。

每跑過一棵樹，便係樹上划過一刀，擺脫完黑熊後，自己都可以係茫茫樹海中尋找返返去嘅路。



隻黑熊身形魁梧皮粗肉厚，雙掌力大無窮，滿嘴嘅牙齒又鋒利無比⋯

同佢正面交鋒就同送死無分別⋯

上次令佢睇唔到嘢都咁難對付，何況依家⋯

身後不斷傳嚟撞擊嘅聲音，我擰轉頭望，見到黑熊因為追我而撞上唔少樹木，啲樹木俾黑熊撞到搖搖欲墜，可見黑熊嘅破壞力十分驚人。

弊啦弊啦⋯



但跑咗成五分鐘，仍然無辦法擺脫隻黑熊，黑熊完全發瘋般死追住我唔放，看著周圍環境無嘢可以阻擋黑熊，我唯有用返老方法。

爬上樹！！

我選擇咗一棵比周圍都長得茂盛嘅樹，黑熊追到過嚟嘅時候，我已經安全咁爬上樹上，望著前方嘅黑熊。

我對著黑熊擺出副鬼臉。
「有種就爬上嚟，我再用刀斬開你十碌八碌！」

黑熊在樹下憤怒地咬牙切齒，口水從嘴角不斷流下。

隻黑熊無走上前嚟爬樹，似乎係驚爬樹嘅途中會俾我斬幾刀。

不過佢無放棄離開此地，睇嚟係想同我嚟個長時間作戰。



眼角突然察覺到樹枝上有啲嘢，我望去一旁嘅樹枝上，樹枝上吊掛著數個黃黃綠綠嘅果實，我靠近望清楚係咩果實。

發達喇！係芒果嚟！依一棵係芒果樹嚟！

我望著離樹下不遠嘅黑熊。
「簡直係天助我也！依家連食物都有埋，你同我鬥長時間？睇吓邊個肚餓先！」

我摘吓其中一個芒果，用開山刀切開後望著裡面嘅黃肉，口水瞬間直流，我大口大口咁咬下。

「我呸！呸！呸⋯」
我把口中嘅芒果肉全部吐出。

頂⋯原來個芒果仲未熟⋯酸到仆街⋯



明明我已經揀咗個最黃嘅芒果喇⋯都仲係未熟⋯

隻黑熊見到我吐芒果嘅樣後，發出喀喀般嘅嘲笑叫聲。

我將剩餘嘅芒果狠狠地掟向黑熊個頭到，原本嘲笑咁我嘅黑熊，立即變返猙獰嘅樣。

「夠薑就上嚟咬我！」
我係樹上又摘下幾個唔熟好硬嘅芒果，向著黑熊狠狠地掟過去。

黑熊用熊掌將迎面而嚟嘅芒果一一拍走，然後慢慢一步一步咁靠近過嚟。

見到黑熊慢慢靠近，我再向樹上更高嘅位置爬去，並且不斷用芒果掟佢，黑熊見我愈爬愈高，便坐了係地上，我亦挨住樹幹，靜悄悄咁等待時間過去。

如果弓箭係到就好啦⋯啱啱執起開山刀跑過嚟嘅時候，唔記得攞埋旁邊嘅弓箭⋯



過咗廿分鐘，黑熊可能感到唔耐煩，開始圍住我身處嘅芒果樹轉圈，我係樹上發呆，未有察覺到。

黑熊感覺係機會，背對住我一口氣爬上嚟，我聽到聲音後立即擰轉頭，見到佢同我屎忽嘅距離已經不足一米。

嚇到我立即彈起，黑熊亦係依個時候對我伸熊爪，我亦緊握住開山刀還擊。

熊掌俾我瞬間斬出幾處傷口，睇嚟把刀再鋒利，仍無辦法將熊掌削去。黑熊痛到咆哮，震耳欲聾到我有啲頭暈，開山刀從手上鬆掉跌落地上。

我頂⋯

我立即從另一邊躍下，然後快速跑去開山刀嘅位置。

boom！！！

我回頭一望，見到黑熊已經從樹上跳落嚟，憤怒地向我衝過嚟，我拼命奔跑，伸手準備去執起把開山刀。



黑熊一嘢將我成個人撲倒，用佢龐大嘅身軀重重咁壓我在地上，我拼命咁用手踭撞佢，直到我可以擰轉身。

黑熊對著我露出令人恐懼嘅牙齒，口水更源源不絕咁流到我面上⋯我雙手用力去推開佢，黑熊再次對住我近距離咆哮，聲音大到我耳膜就嚟破裂⋯

死喇⋯唔通我今次真係要死係黑熊嘅手上⋯

黑熊張大個嘴，向住我頸部位置咬去，我嚇到已經唔敢反抗⋯閉上雙眼迎接死亡⋯




嗯？發生乜嘢事？

我仍然感覺唔到頸部嘅疼痛，於是睜開雙眼，見到黑熊正在咬住條粗竹，而黑熊背後，有個人拼命用條竹，好似舉鐵咁拉住黑熊咁嘴。

「快啲⋯我就快頂唔順⋯唔唔⋯」
光頭拼命用顫抖嘅雙手拉住條竹，一瞬間，光滑嘅頭殼全是汗珠。

然後有人拉住我嘅衣服，將我從黑熊底下拉出嚟，我抬頭望，係達叔同四眼妹嚟。

而稀疏男躲係遠處嘅樹後面，望住光頭佬嘅行為驚恐萬分。



待續