荒島日記（新手、後宮甜）（不定期更新）: 滑稽

第二日


我地醒咗之後，食咗個好簡單快捷嘅早餐便繼續上路。


「噗！」
有個女仔忍唔住笑出聲。

其他女仔見到個女仔忍唔住笑，亦都發出笑聲，但佢地唔敢笑得太大聲。



點解各個都會忍唔住笑？因為依家前面帶咁隊嘅獅子狗囉。

尋晚我用蜜蜂竇破壞咗佢同Lily嘅密會，我跑返到臨時居住地後，等咗十分鐘佢地先返到嚟。

兩人返到嚟臨時居住地時係成身濕曬，我估佢地應該係為咗避開蜜蜂群嘅攻擊而跳入河到。

獅子狗俾蜜蜂叮到成個頭都腫曬，眼皮都腫到成個乒乓波咁大，如果唔係佢高大魁梧壯碩嘅身形，真係好難認得出佢係獅子狗。




獅子狗突然轉個身嚟，所有人驚到忍住唔笑，雙眼緊盯著獅子狗。

獅子狗用腫到成條潤腸嘅嘴巴講嘢。
「痕都一真，甘猛係各都休hea。」


噗⋯噗⋯哈哈哈哈哈！！

眾人忍唔住爆笑，就連肥豬劉同高佬佳兩人都擰轉面係咁笑。



獅子狗望住大家，無因大家嘅笑而發火，不過我見到佢握緊嘅拳頭，手臂上已暴脹了一條條青筋。

依啲扮沈默嘅人係最為恐怖。


「好了好了，我們繼續上路。」
企係最後嘅肥佬陳講完，繼續黑口黑面咁行，所有人聽到後唔敢再笑。

話說今日一訓醒就見到肥佬陳處於依個狀態，應該係尋晚獅子狗同Lily嘅事令佢唔高興，咁又係嘅，自己攞頂綠帽俾自己戴，有邊個真係會開心。

「是。」
Lily應了一聲，緊隨在肥佬陳嘅背後。

Lily尋晚應該都被蜜蜂叮得好犀利，佢用一塊黑色嘅布，好似穆斯林嘅女性咁，將個頭包到密密實實，只露出雙眼嘅位置，而衣著一改以往嘅制服誘惑，著咗一套鬆身嘅運動套裝，將自己雙䊹手和長腿全部遮掩。



所有人都對Lily依身裝束感到奇怪，但並無人敢過問。

Lily為咗躲避眾人嘅目光，企咗係隊伍最後面，以往肥佬陳會係隊伍嘅最前，今日見到Lily嘅情況後，便決定陪Lily係隊伍嘅最後面行。

兩雙眼睛在隊伍後望住，眾人嘅步伐都顯得戰戰慄慄。


達叔飛快咁走到我旁邊，然後細聲問到。
「東哥，你知唔知獅子狗發生乜嘢事？」

「唔清楚。」
我當然唔講得俾佢知啦，依件事絕對唔可以講俾任何人知。

「睇個腫脹嘅程度，應該唔係俾蚊叮，我好肯定係俾蜜蜂叮。」
我同達叔一齊擰轉頭望去我左肩方向，見到四眼妹用神探伽利略嘅手勢托眼鏡講。



「嘩⋯四眼妹⋯幾時係我隔離㗎⋯成日神出鬼沒，想嚇死人咩⋯」
睇嚟四眼妹嘅頭腦除咗買賣之外，都有唔錯嘅分析能力。

「我一直都係隔離，係唔係啊？雪兒。」
四眼妹講完便用手搭上雪兒膊頭。

背後嘅雪兒無講嘢，只係微笑地點點頭。


「四眼妹，你又咁肯定係蜜蜂叮。」
達叔疑惑咁望住四眼妹。

四眼妹邪惡咁笑咗一下。
「因為依樣嘢。」



四眼妹立即拍一拍手，佢其中一個女伴便加快腳步走上嚟，然後伸手到我地面前，小心翼翼咁打開個手掌。

我同達叔挨近一望，個女伴嘅手掌掌心躺著一隻蜜蜂。

達叔用手指篤一篤女伴掌心中嘅蜜蜂，隻蜜蜂完全無反應，似乎係死咗。
「咦⋯蜜蜂⋯你係邊到捉㗎？」

「唔係捉㗎，我地朝早訓醒個陣，彤姐係附近嘅草地上見，發現個陣佢就已經死咗嘅啦，你地睇下佢嘅尾部，無咗針㗎，叮到施老師咁傷嘅仲唔係佢？」
個女伴幫四眼妹詳細解答，四眼妹好得瑟地托一托副眼鏡。


估唔到咁細嘅蜜蜂都會俾四眼妹發現到，四眼妹仲觀察到蜜蜂無咗尾針，從而推斷獅子狗嘅傷係由蜜蜂造成。

四眼妹，睇嚟以後我要對你改觀吓。




達叔個樣突然好興奮。
「東哥東哥，有蜜蜂出現，咁即係附近會有蜜蜂竇啦，咁蜜蜂竇裡面肯定有蜜⋯」

我用手哼了一吓達叔個頭。
「你唔會係想我取蜜糖嘛？個啲蜜蜂嚟，你想我死啊？」

達叔摸著俾我打左一下嘅位置。
「我都係講下姐⋯」



待續