荒島日記（新手、後宮甜）（不定期更新）: 蜜蜂（1月15號更新）

係我頭頂上，掛係棵樹幹上發出嗡嗡聲嘅物體。

係蜜蜂竇嚟！

係到生活咗咁耐一直都無見過，我仲以為依個島係唔會有蜜蜂出現。

蜜蜂竇係荒島上就係個寶物嚟！裡面嘅蜜糖可以用嚟煮食，我可以講，加過蜜糖嘅燒烤先有真正嘅美味！

好耐無食過蜜糖啦⋯



一想起蜜糖嘅甜蜜，我就忍唔住流口水。


另外蜜糖除咗可以用嚟調味之外，仲有唔錯嘅藥用價值，有清熱解毒嘅功效，而且止痛嘅效果都唔錯。

我立即爬上棵樹到，然後坐係樹幹上慢慢靠近個蜂巢，確認係蜜蜂竇後，便伸手摸過去，好在個蜜蜂竇唔係樹幹最遠嘅位置。

嗡嗡聲比剛才大聲咗，我觀察咗十幾秒，唔見有蜜蜂出現。

只係靠近個蜜蜂竇，我已經隱約聞到蜜糖嘅香氣。




依個蜜蜂竇大過足球小小，我從底部摸一摸感受吓個重量，依個蜜蜂竇裡面應該有好多蜜糖。

真係好想取走儲存係裡面嘅蜜糖，但依家救人要緊，只可以犧牲依個唔容易搵到嘅蜜蜂竇⋯

我伸手入褲袋，從褲袋掏出把瑞士軍刀出嚟，一隻手端著蜜蜂竇嘅底部，另一隻手便用軍刀割嘅蜜蜂竇與樹幹嘅連接位。

幾秒就已經割開咗，我小心翼翼咁端著蜜蜂竇，慢慢咁爬返落樹。



可能割蜜蜂竇嘅動靜太大，已經有數隻蜜蜂飛咗出嚟，見到我攞住佢地嘅屋企，佢地便圍住我飛行。

不過好慶幸嘅係，佢地並無因此而攻擊我。

蜜蜂竇嘅重量果然夠墜手，我舉起個蜜蜂竇向住遠處個二人，一條直線對住佢地兩個，暢通無阻。


Lily，唔好怪我啊，我咁做都係為咗救你。


我兩手捉住個蜜蜂竇，然後右手中三隻手指用力插入蜜蜂竇裡面。

我閉上眼睛，深深咁吸了一口氣，我高舉個蜜蜂竇到眼前，然後彎腰向下，將蜜蜂竇提起到背後位置。

雙眼望向遠處嘅二人，望住獅子狗嘅背隻，我捉住蜜蜂竇個隻手急速向下，以打保齡球嘅動作將蜜蜂竇掉過去。



蜜蜂竇隨即在地上急速翻滾，一路上暢通無阻，以直線咁滾向二人方向，蜜蜂竇滾動嘅速度絲毫沒有減慢。


係啦係啦！就係咁衝過去啦！！


我興奮地握著拳頭，期待蜜蜂竇撞到獅子狗個一剎那。

蜜蜂竇繼續飛快地衝過去，準備撞向正在激烈運動中嘅二人，距離獅子狗仲有三四米。

突然獅子狗轉過身，望到滾動過嚟嘅蜜蜂竇，佢提起右腳，然後一嘢踢飛個蜜蜂竇。

bom！！！



被踢飛嘅蜜蜂竇撞向二人旁邊其中一棵大樹，發出一聲巨響，獅子狗係依個時候望向我嘅方向，我快速撲係地下，利用地下嘅陰影隱藏自己。


差啲就俾佢見到⋯

估唔到獅子狗嘅反應咁快，一聽到蜜蜂竇滾動發出嘅聲音，便知道聲音係由背後傳過嚟，而且仲係一瞬間好準確咁踢飛個蜜蜂竇。

「這是什麼東西⋯」
Lily係依個時候坐起身，望向旁邊地上嘅蜜蜂竇。

蜜蜂竇因俾獅子狗嘅一腳踢後再猛烈咁撞上棵大樹，原本成個足球嘅佢已經爛成四分五裂碎件。


我挨住棵樹，慢慢露出個頭少少，再次望向獅子狗個邊。



獅子狗企定定咁望住一旁碎裂嘅蜜蜂竇，而Lily仍然坐係地上，對住滾過嚟嘅蜜蜂竇感到好奇，睇嚟兩人仲未知係蜜蜂竇嚟。

「這⋯這⋯」
坐係地上嘅Lily開始驚恐咁向後退數步，而獅子狗亦察覺到危險，正在慢慢咁退後，雙眼緊盯著蜜蜂竇碎件。


嗡！嗡！嗡！嗡！嗡！嗡！嗡！

蜜蜂竇碎件慢慢傳出聲音，而且聲音愈嚟愈大，愈嚟愈頻密，無幾耐一隻隻蜜蜂從碎件中爬出。

佢地一隻隻飛到空中，Lily被眼前嘅畫面嚇到面青青，而獅子狗此刻已退到一邊，執起兩人嘅衣服。

望到遠處空中密密麻麻嘅蜜蜂群，令我起曬雞皮。

原本整齊在原地飛舞嘅蜜蜂群，突然好似發曬癲咁衝向獅子狗同Lily兩人，Lily立即嚇到發出尖叫聲。



見到蜜蜂竇成功破壞獅子狗嘅「宵夜」，我便沿住樹上嘅記號，以飛快嘅速度奔跑返臨時居住地。


「吖！！好疼⋯吖⋯」

回頭望去，見到獅子狗此刻拉住Lily，同我一樣沿住樹上嘅記號瘋狂奔跑，我同佢地兩人距離約二十米左右。

我好驚獅子狗見到前面奔跑中嘅我，獅子狗並無抬頭望過嚟，佢忙碌於用手拍打纏繞住佢地兩人嘅蜜蜂群。


見到後面Lily疼痛難受嘅樣，真係好對唔住，但無辦法，我只想到依個方法可以救到你⋯⋯



待續