荒島日記（新手、後宮甜）（不定期更新）: 三人

我望住達叔，我真係從來都無諗過依個問題⋯如果真係返到香港，雪兒佢地會唔會離我而去⋯

不過我諗一諗，我同佢地三個相處咗咁耐，點都有啲感情嘅！我地四個人出生入死，經歷過數次差啲生離死別，看著晶瑩剔透嘅眼淚，一定唔會係假嘅！

無錯，佢地三個應該係愛我㗎，點會返到香港就同我分手啊！

達叔見我沈默無講嘢，便繼續講。
「講真啊東哥，你又唔靚仔，又無錢，讀書又唔叻，係香港求其搵個男仔都會好過你。」

你個仆街⋯真係完全唔俾面嘅喎⋯啱啱先搵返啲自信，依家又俾你⋯⋯



達叔完全無望到我黑曬口面，繼續不停咁講。
「東哥，你係香港就算乜都無，都最起碼要有層樓啦⋯起碼解決咗居住問題，但你係深水埗住劏房⋯三位阿嫂點樣同你一齊逼⋯」

夠啦夠啦⋯唔好再講啦⋯再講我就嚟喊嘅啦⋯

達叔嘆了口氣，繼續講。
「就算你無錢無樓都好！有才華，有一技之長，係香港搵食嘅話可能都搵到錢自己創富置業！但係東哥你乜都唔叻，無才華，點樣養三位阿嫂。」

聽完達叔咁講，我真係好想喊出嚟，咁大個仔，點解我又唔做嘢⋯又唔讀書⋯



「你地兩個仲係到？一直靜靜雞係到講咩啊？唔俾得我聽㗎？」
雪兒此刻出現係背後，雙眼碌碌咁望住我同達叔。

達叔俾突然出現係背後嘅雪兒嚇到震一震，害怕啱啱同我講嘅嘢會俾雪兒聽到曬，不過望雪兒個樣，應該係完全無聽到達叔嘅說話。

達叔已經被嚇到講唔到嘢，額頭開始冒冷汗，我見到佢咁嘅樣立即拍一拍佢，示意叫佢走，然後便同雪兒講。
「無，求其吹下水姐。」

「哦～」


雪兒便坐低係我身邊，然後個頭挨係膊頭上，我地就好似老夫老妻咁望向一處靜靜地無講嘢。

有時候兩個人，簡簡單單咁坐係到，吹著涼風，就已經好開心，好滿足。

我地兩個就咁望住忙碌中嘅人。
「係呢雪兒，我地出去打獵個陣，依到有無發生過啲乜嘢事？」

「無咩事發生，不過呢！Lily今日好似有啲奇怪，經常神不守舍咁。」
我地出去打獵嘅時候，留係臨時居住地嘅人全部都聽秘書Lily指揮，包括三女。

因為Lily嘅年齡同埋資歷，所以佢做咗啲女仔嘅大家姐，而且佢份人幾好幾隨和友善，一直都有為啲女仔著想，所以啲女仔都幾鐘意佢，幾聽佢話。

「佢神不守舍？」
因為我好少見Lily咁嘅樣，Lily平時做咩都好專心，對任何事情都唔會馬虎應對。



雪兒點點頭。
「嗯嗯！明明柴火充足，佢仲不斷咁加柴，我提咗佢幾聲，但佢完全無聽到，最後搞到啲火好旺，如果唔係我拉走佢，佢就差啲燒到佢自己。」

「咁你無整親掛？」
我擰轉身係咁檢查雪兒，對住佢摸手摸腳。

「無啊～喂～痕啊～」
雪兒笑著推開我雙手。

「嚟，我地做身體檢查。」
我拉住雪兒，想帶佢入叢林裡面，搵處無人嘅地方，雪兒捉緊我隻手，怕怕醜醜咁同我講。
「你曳曳啊你，但我依幾日嚟⋯遲啲先⋯」

「咁等過幾日先。」
於是我同雪兒再次靜靜咁坐埋一齊。



獅子狗繼續色瞇瞇咁望住Lily，而Lily無幾耐便坐係一邊休息，獅子狗便同高佬佳、肥豬劉吹水，但眼睛不斷打量著Lily。

聽講曾經有女仔因為病咗所以無辦法打獵，然後又餓足一日，無人伸出援手，最後係Lily攞食物去俾個女仔食，同埋求肥佬陳網開一面，俾個女仔食佢幾日罐頭，個女仔先逐漸康復。

所以當初係營地個陣，啲女仔表面係聽肥佬陳指揮，其實暗地係聽Lily嘅說話。

可以講，肥佬陳對於管治係屬於高壓嘅態勢，而秘書Lily係屬於懷柔，兩人係配合便天衣無縫。

原本肥佬陳間企業年年都蝕錢，年年都要肥佬陳個老竇用其他企業嘅錢去資助佢，但自從有Lily嘅幫助下，肥佬陳間企業短短一年內便轉虧為盈，令肥佬陳家族其他成員都感到驚訝。

專心工作嘅Lily依家卻神不守舍，肯定係因為煩惱獅子狗單嘢先咁⋯我都好想幫Lily，但依啲係佢同肥佬陳嘅事⋯我唔係好方便出手⋯

Lily嘅神不守舍、肥佬陳嘅強顏歡笑、獅子狗嘅笑容。



依三個人話俾我知，今晚一定會有啲事情要發生。

唔通Lily真係要獻身俾獅子狗⋯⋯

我望向肥佬陳同獅子狗，佢兩人同一時間望自己手腕上嘅腕錶，獅子狗擺出副興奮嘅表情，而肥佬陳擺出副不安嘅樣⋯⋯



待續