荒島日記（新手、後宮甜）（不定期更新）: 重要

最後，我地行咗大概四個鐘後，便停係一片附近有河道嘅空地，休息一晚後先再次出發。

我同達叔四眼妹再次組成捕獵隊伍，係附近嘅河道捉魚，而獅子狗佢地個隊，因為太驚靠近河道會遇到黑熊，所以決定係附近嘅樹林打獵。

一開始雪兒唔想俾我去，藍醫生亦唔建議我進行激烈嘅捕獵活動，我不斷解釋係以顧問嘅身分去教達叔同四眼妹捕獵，先肯放過我。

「東哥，唔洗落水啦，有我地係到。」
達叔拉起兩邊褲腳便跑過嚟。

「你反應慢半拍，我驚啲魚走曬。」


我繼續專心咁望河底嘅情況。

「仲有我係到！」
四眼妹小心翼翼咁從河邊行過嚟。

有條魚快速經過，不過我手中嘅長矛已準備多時，計算好佢必經嘅位置快速插下去，然後攞起枝長矛，條魚被長矛穿刺，擺出最後的掙扎。

「掂啊！東哥！」
達叔興奮地走過嚟，然後接住我手中嘅長矛交俾四眼妹，四眼妹便快速走上岸。



「再接再厲！」
四眼妹用軍刀清出魚嘅內臟。

捉咗第五條魚後，我身體已經極度疲倦，睇嚟黑熊造成嘅內傷令我無辦法進行長時間嘅活動，我走上岸後，坐係一邊挨住棵樹喘氣，達叔同四眼妹知道我到咗極限，走過嚟關心我一兩句便繼續捕獵。

額頭開始有汗珠，我無力地癱係樹邊，望住天上嘅雲朵。

王學東，你真係好廢⋯咁容易就攰⋯

咔！



乜嘢聲？

咔嚓！咔嚓！！咔嚓！！！

我背後，一直傳嚟好似係枯木樹葉被踩爛嘅聲音，而且個聲音愈嚟愈接近我，我抽出把開山刀，用盡我僅餘嘅力氣握實個刀柄。

我背後發出嘅聲音，唔通係隻黑熊嚟？佢雖然俾我斬的唔係好傷，但無理由咁快返嚟報仇⋯難道佢仇恨心完全戰勝痛苦？點都要返嚟報仇？

我想大嗌達叔同四眼妹叫佢地小心啲，但打開個嘴，先知自己已經連大嗌嘅力氣都無⋯只能遠遠咁望住達叔同四眼妹係河道中捉魚。

今次我大鑊啦⋯難道今日我要死係到⋯我唔想咁快死住⋯我仲有好多嘢未做⋯

咔嚓！咔嚓！咔嚓⋯咔嚓⋯



背後嘅聲音突然開始變細，而且每次聲音都相隔好耐，大腦同我講，我背後嘅好肯定唔係動物，而係人嚟！而且依個人知道我係依附近，所以佢放慢腳步小心翼翼咁行。

雖然係人嚟，但我完全無鬆懈，繼續緊握把開山刀，刀柄上此刻已經沾滿我嘅手汗。

跟過嚟嘅人⋯會唔會係獅子狗？係香港個陣我已經得罪咗佢，佢嚟到營地嘅時候雙眼已經充滿殺機，佢個人咁仆街，難道要趁我病嘅時候攞我命⋯

如果佢衝過嚟嘅話，咁我就用盡全力向佢劈一刀！

「大陸仔？大陸仔？」
一把聲音從後傳嚟，嚇到我顫抖咗一下。

咪住！依把聲⋯⋯好熟⋯但我完全唔記得係邊個嚟⋯

「大陸仔⋯係唔係到啊？大陸仔⋯」
背後繼續傳嚟人聲，佢唔敢叫得太大聲，應該係害怕吵到附近嘅動物。



「大陸仔⋯大陸仔⋯」

依把女人聲究竟係邊個？我唔記得依把女人聲係邊個嚟⋯

我從右邊嘅地面，見到一個影子慢慢靠近過嚟。

「噢！終於搵到你！」
把女人聲係我頭上方傳嚟，我抬頭望去，一副原本惡狠嘅面孔此刻強行擺出副慈祥嘅笑容，十分彆扭，差啲令我中午食嘅食物嘔出。

相由心生，依句說話無講錯。

以前都唔覺得佢恐怖，依家仰望咁望佢，尖下巴高隆鼻，加埋佢個雙充滿血絲帶有猙獰嘅眼睛，佢個樣真係似足巫婆，究竟紫霜佢老竇係點頂得順佢⋯

不過佢冒住野外未知嘅危險嚟搵我，我覺得好奇怪，可能啱啱被嚇到講唔到嘢，當確認係人嘅時候，終於可以講得出聲。



「你搵⋯我有事？」
因為唔係好夠氣，所以開頭講嘢會斷斷續續。

後母美思用手背擋一擋嘴巴，然後發出巫婆般嘅笑聲。
「我搵你，梗係有嘢同你傾。」

「有乜嘢⋯要咁急⋯同我講。」

後母美思抬頭望去河道方向，確定達叔同四眼妹無走過嚟。
「單嘢係發生係你尋晚昏迷不醒嘅時候，對你嚟講可能好重要，你想唔想知？」



待續