荒島日記（新手、後宮甜）（不定期更新）: 醒來

當我醒返嘅時候已經係早上，我睜開雙眼，便見到雪兒迷人嘅面孔，佢閉著雙眼，面上有兩條好明顯嘅淚痕，尋晚肯定又喊過嚟。

而我訓咗係雪兒嘅大髀上，我左右咁望一望，周圍嘅人都係到忙碌中，秋儀同辣椒妹係一邊唔知做咁咩，無人察覺到我已經醒咗。

我心口感到悶，隱約感到疼痛，睇嚟隻熊個一掌打到我內傷。突然我眼尾察覺到有人靠近，於是我閉上雙眼，繼續扮訓。

「咦？仲未醒？」
藍醫生行咁過嚟，手上提著藥箱。

我件衫突然被扯高，然後有隻手按著我嘅心口，隻手非常冰冷，凍到我差啲忍唔住震，但好神奇嘅係，心口嘅痛楚，卻正在慢慢地減退。



「醫生⋯大陸仔佢點啊⋯」
雪兒醒咗，見到藍醫生後便好緊張咁問。

「大陸仔唔會傷重過頭昏迷啊嘛⋯佢會唔會變成植物人㗎？」
辣椒妹好認真咁問。

你個辣椒妹詛咒我⋯

「唔洗擔心，佢應該好快會醒。」


藍醫生講完，便用手指尾快速撩咗一下我乳頭，我忍唔住痕癢而睜開雙眼彈起，雪兒見到我醒咗後便從後緊緊攬實我。

「依支藥酒，每日搽三次，幾日就會完全好返。」
藍醫生戴住口罩，眼神一如既往地冷淡，佢望咗我數秒後，便執起藥箱走返去。

佢啱啱係唔係知我扮訓，先會用手指撩我粒乳頭？

「望夠未？」
我擰轉頭，見到雪兒此刻用鄙視嘅眼神望住我，我伸手攬佢，佢就快速用手推開。



女人嘅心情真係猶如天氣般話變就變⋯

「醒咗啦？東哥！」
達叔同四眼妹行過嚟，兩人手上都揸住兩串串著烤魚嘅木棍同少量嘅兔肉。

四眼妹同達叔將食物俾我，達叔有啲唔好意思咁講。
「東哥⋯er⋯啲食物只係分得咁多俾你地四個⋯」

「咁少！」
辣椒妹瞪大雙眼望住四眼妹拎住嘅食物。

四眼妹唔好意思地撩一撩頭髮。
「其他人都唔係好多⋯」

我對住佢兩個微笑表示唔介意，四眼妹猶豫咗一陣，便伸手入褲袋，然後拎出一條朱古力出嚟俾我。


「大陸仔，俾你。」

朱古力！係荒島上面，簡直就係寶物！但望住條因為天氣熱到變軟嘅朱古力，就知道四眼妹當佢寶物一直都唔捨得食。我耍手唔要，四眼妹立刻講。
「食啦，我從來唔食朱古力。」

我睇到四眼妹對住朱古力依依不捨。
「你留俾自己食啦，我都唔食朱古力。」

「係啦！東哥尋晚就勁啦！見到隻熊完全驚都無驚過，攞住把開山刀衝向隻熊到，一陣刀光劍影，隻熊就俾東哥斬到慘叫！東哥，你個套係咩刀法？簡直刀法如神人刀合一！」
達叔邊講邊扮我揮刀。

「咩刀法啊⋯求其亂咁斬㗎⋯」

「唔係喎東哥！如果俾多把刀你，你就應該好似桐人咁，完全發揮二刀流技術！」
達叔好似中二病發作般，雙手係空中擺出二刀流嘅姿勢。



「係喎！隻熊呢？」

「隻熊俾你斬咗咁多刀，痛到佢掉頭逃跑咗啦，係啦，你把刀。」
四眼妹向後揮手，佢其中一個女伴便跑過嚟，然後向我遞上開山刀。

我攞起把開山刀，然後係空中揮舞數下，然後再望刀刃。
「我把開山刀點解仲係到？明明插咗係隻熊手掌到㗎⋯而且好似⋯⋯」

四眼妹笑咗一下，然後佢用手托一下副眼鏡。
「好似鋒利咗呢？我地見把刀咁鈍，所以係附近較平滑嘅石頭幫你磨利佢囉！隻熊逃跑嘅時候不斷咁擺動隻手，所以把刀就俾佢fing甩咗。」

「多謝！」
我繼續專注咁望刀刃位置，如果再遇到隻熊嘅話，依家嘅開山刀一定可以斬到佢皮開肉綻！



原本歡樂嘅達叔突然愁容滿面。
「係啦⋯東哥⋯有個壞消息⋯」

「咩壞消息？」

達叔左望右望，確認無其他人係附近後，便伸個頭過嚟細聲講。
「啱啱你仲訓咁嘅時候⋯我地開咗個會⋯肥佬陳總話依到太危險⋯隻熊一定會繼續返嚟報仇⋯所以我地食完嘢就要繼續上路⋯」

「肥佬陳主持大局？咁獅子狗呢？」

達叔再次左望右望，然後繼續細聲講。
「獅子狗無反對肥佬陳總嘅決定⋯話全力支持佢⋯」

四眼妹接住講。
「我地有講你受傷⋯唔可以咁急住上路，要等你休息夠先可以繼續行，但佢地全部人投票，決定要儘快離開依到⋯如果我地要堅決留係到，佢地就會留低我地⋯」



「仆街嚟嘅！東哥係因為保護佢地先會受傷！依家見到東哥咁⋯就拋棄我地⋯」
達叔憤怒地打咗一拳旁邊棵樹，但佢個一拳打得太大力，痛到佢fing曬手。

我起身郁動身體。
「我無事啊，可以繼續上路，留係依到真係太危險。」



待續