荒島日記（新手、後宮甜）（不定期更新）: 困鬥

我想扭開手中嘅物件時，先發現原來手中嘅物件嘅結構完全黐實，根本無辦法扭開佢⋯

我頂⋯扭唔開個胡椒粉樽⋯咁點樣對付隻黑熊啊⋯

「東哥！小心啊！」
達叔大嗌提醒我，隻黑熊愈嚟愈接近我，既然扭唔開個樽，咁就唯有打爛個樽蓋。

於是我握實胡椒粉樽，用樽頭不斷敲打樹幹，務求可以敲打到樽蓋裂開。

而達叔同四眼妹一直朝住黑熊掟石頭，想挑引黑熊去追佢地，但黑熊個目標仍然係我，所以佢無離開棵樹追達叔佢地。



咔啦！

胡椒粉樽樽蓋終於裂開咗，我望返仍然攀爬中嘅黑熊，佢惡狠狠咁望住，嘴裡發出令我毛骨悚然嘅磨牙聲。

「食屎啦你！」
說罷，我將成樽胡椒粉倒係黑熊塊面到，佢雙眼、鼻哥窿、嘴巴都堆滿曬胡椒粉，黑熊難受到連打幾個乞嗤，成棵樹跟住黑熊打乞嗤造成嘅身體擺動而搖晃。

棵樹咁樣搞一搞好快會倒下，於是我一腳踩係黑熊面上，然後一躍凌空三百六十度翻騰華麗咁落到地面。



達叔同四眼妹見到我嘅一連動作忍唔住拍手鼓掌。

「唔好企係到啊！跑啊！」
達叔同四眼妹聽到我說話後立即掉頭跑，而我周圍望一望，尋找開山刀嘅位置。

月光照耀著荒島，令亮白刀身嘅開山刀閃閃發光，我執起把開山刀，然後轉身對住黑熊，開山刀刀身飄著烤肉嘅香氣，令原本飢餓中嘅我更加肚餓。

屌⋯原來把刀俾佢地攞咗去切食物⋯頂⋯好肚餓⋯

boom！



黑熊從樹上四腳朝天咁跌咗落地，我靜雞雞咁想靠近嘅時候，佢快速起返身，然後不斷用手掌抹自己塊面。

黑熊連續打幾個乞嗤，聲音一次比一次響亮，然後繼續用手抹自己塊面，見到佢好難受嘅樣，就知啲胡椒粉對佢幾有效。

我見黑熊伸手觸摸前方，動作好似盲人探路般，確認佢無辦法睜開雙眼後，我緊握著開山刀，快速咁跑到黑熊背後，諗住係佢背後斬一刀。

點知黑熊突然轉身，舉起手掌向前拍打，我瞬間蹲下避開碌走。

佢扮盲呃我過嚟？

由於我蹲下避開，所以我係坐係地上，黑熊沒有走上嚟追殺我，佢背對住我屬起對耳，個頭不斷左擰右擰，完全發現唔到我係佢背後。

我握緊手中嘅開山刀，慢慢咁走到黑熊背後，然後舉起把刀，月光照係開山刀上，一下雪白鋒芒嘅刀光係黑熊背隻劃過。



嗚吖⋯⋯

黑熊痛叫一聲，然後擰轉身揮拳，但好可惜，我斬完佢一刀，便快速躲係一邊，所以黑熊依家只係對空氣揮拳。

黑熊打唔到我，憤怒地係原地跳幾下，然後繼續用手抹自己塊面，我趁依個時候，快速跑過佢身後，白色嘅刀光再次係佢背隻劃過。

黑熊再次痛苦地叫，用手掌按住自己受傷背隻，佢痛到差啲企不穩。

黑熊皮糙肉厚，雖然我斬咗佢兩刀，但只係對佢造成少少嘅皮外傷，根本傷唔到佢係筋骨⋯

斬佢背隻無辦法令佢重創，唯一就係斬佢頸部以上⋯

好！就斬佢個到！

我緊握著開山刀，再次快速跑向黑熊背後，然後舉起把開山刀，準備係黑熊後頸位置劃下一刀。



啪！

跑過去嘅過程中，我俾地下嘅樹枝跣親，成個人趴咗係地上，當我起身嘅時候，黑熊已經跑向我身邊，由於佢睇唔到嘢，所以佢不斷向前方揮拳，我立刻向右碌走，但一切已經太遲⋯

黑熊嘅左手手背揮向我到，我即刻雙手握實開山刀放在心口去擋，但黑熊臂力實在太勁，啪一聲！直接將我成個人拍飛到數米遠，而開山刀插住咗係佢手背上。

我痛到出曬冷汗⋯個心口嘅痛楚好似被撕裂般⋯⋯

我慢慢想企返起身，但疼痛令我雙腳無力⋯我只能艱難地用手臂撐著，而雙膝跪地，按著心口，一股腥味湧上喉嚨。

嘔！！！

我吐了一大口鮮血⋯達叔同四眼妹見到我咁嘅情況，已經唔理危險，兩人衝咗過嚟拉走我。
「東哥⋯東哥⋯」



「唔好講住⋯快啲拉走佢先⋯」

我視線開始變得模糊，隱約見到黑熊嘅身影在原地不斷揮舞著左手，隨著時間一點點過去，眼中嘅光芒逐漸縮細，逐漸地消失⋯⋯



待續