荒島日記（新手、後宮甜）（不定期更新）: 被困（11月26更新）

隻黑熊飛奔過嚟我個方向，我左望右望，看著身旁嘅大樹，二話不說便爬上棵樹，剛爬到上去，黑熊就已經奔跑到樹下，對著我咬牙切齒。
「你老味！有種上嚟啊！」

黑熊低吼一聲，伸出雙掌捉實棵樹，雙腳開始慢慢提上嚟，捉出個爬樹嘅姿勢。

我屌！唔記得咗熊係識爬樹⋯

隻熊用雙掌不斷摸索，尋找著較好嘅位置俾佢捉緊爬上，我係樹上睇到十分緊張，如果俾隻熊爬到上嚟，我實死咁。

於是我趁佢爬咁嘅時候對佢連踢數腿，由於隻熊專注爬樹，所以硬食咗我幾腳。



「你老味！快啲死落去！死落去！」
我一邊踢一邊吐罵著。

黑熊俾我踢到再次怒吼，然後張嘴咬實我對鞋，我不斷咁fing隻左腳，但對鞋俾佢完全咬實唔放，我只好快速解鞋帶，將對狗也不屌嘅垃圾vans送咗俾隻黑熊。

送咗隻鞋俾黑熊，但黑熊仍然唔肯放過我，繼續係我腳下，我望住無咗隻鞋嘅左腳，只著住一條穿了兩隻腳趾嘅臭襪，突然靈機一觸。

「試下我嘅鹹魚腳啦！」
我左腳踩上黑熊嘅鼻上，然後用腳掌係佢鼻上不斷捽嚟捽去。



無論我隻腳點樣摩擦佢塊面，佢一啲想反胃嘅感覺都無，隻黑熊睇嚟係免疫我腳上嘅鹹魚味。

有無搞錯啊⋯我隻腳臭到自己都想嘔，隻黑熊竟然一啲反胃嘅反應都無⋯仲撐大個鼻孔，不斷咁嗦我隻腳嘅鹹魚味⋯

「係你逼我出絕招㗎！」
我用露出嘅腳趾快速插入黑熊個鼻哥窿，然後係佢鼻哥窿裡面扭動。

扭動咗十幾秒，腳趾開始感覺到有黏液黏住，唔夠一陣，腳趾就沾滿黑熊個鼻流出嚟嘅分泌物，原本面目猙獰嘅黑熊此刻擺出副難受嘅樣。



「啱啦啱啦，挖埋啲空氣出嚟。」
我捉緊棵樹，腳趾繼續用力地扭動，並且再深入黑熊嘅鼻哥窿裡面。

原本緊緊捉實棵樹嘅黑熊，係我連番用腳趾係佢鼻哥窿裡扭動下，終於頂唔順跌咗落樹下。

我成隻左腳濕曬，已經分唔出係黑熊嘅分泌物還是我嘅腳汗。樹下黑熊快速企返起身，用手推開卡在嘴中嘅vans，然後再次發出怒吼聲。

睇嚟隻黑熊唔會放過我⋯我要點先可以安全離開呢⋯

「東哥！我嚟救你！」
達叔舉著火把衝咗過嚟，而四眼妹係後面跟住，佢手中握住我搵咗好耐嘅開山刀。

黑熊聽到聲音後擰轉身，達叔即刻高舉火把，準備棒打黑熊，點知黑熊舉起隻手，一嘢拍飛達叔手中嘅火把，達叔嚇到塊面都青埋。

咦⋯點解黑熊行過嘅路會有腳印⋯



我靠著月光嘅光線，好清楚咁望到地上一個又一個腳印，依啲腳印應該唔係血嚟嘅⋯好似係⋯水！肯定係水跡！

原來隻黑熊啱啱離開，係走返去河邊整濕自己，然後再返嚟搵我地報仇！整濕曬自己，就唔會怕我地個堆火。

「去死啦！！！」
四眼妹大喝一聲，鼓起勇氣舉著開山刀衝過去，黑熊用手掌拍打過去，將四眼妹手中嘅開山刀拍飛，四眼妹驚恐咁捉住達叔掉頭跑。

原本以為黑熊會追住達叔同四眼妹，但黑熊無咁做，佢對住兩人咆哮一聲後，便走到樹下注視著我。

估唔到個黑熊係咁醒目，知道留係樹上嘅我，只要同我繼續鬥拖時間，我就一定會死係佢手上。

我摸著褲袋，瑞士軍刀都唔係我身上，開山刀又跌係一邊，一把可以對抗黑熊嘅武器都無⋯點算好⋯

黑熊係樹下等我等到唔耐煩，再次伸手想爬上嚟，見到佢抬頭惡狠狠咁望住我，並且露出口中嘅利牙，同我嘅距離逐漸接近，額頭上嘅汗水便不斷滴下，滴到黑熊面上。



黑熊雙眼一直發出紅光，佢愈向上爬，面目就變得愈猙獰。

我望去附近躲避嘅達叔同四眼妹，再望去想衝過嚟但俾人阻止嘅三女，隱約見到雪兒眼眶上嘅淚光。

係喎！

「達叔！達叔！」
我大嗌躲係樹後達叔，達叔聽到我嗌佢後，便露出個頭望住。
「東哥！」

「達叔！將你褲袋裡面嘅嘢俾我！」

「褲袋裡面？」
達叔伸手入褲袋裡面，摸兩摸便掏出件小物件，達叔瞬間明白我想做啲咩，佢用力將手中嘅物件拋到我依邊。



我舉高隻手，接住達叔拋過嚟嘅物件，然後握係手中搖晃。
「嚟啦，開始做實驗！」



待續