荒島日記（新手、後宮甜）（不定期更新）: 驅趕

「開槍啊！陳總！」
「開槍啊⋯」
「射死佢啊⋯」

肥佬陳顫抖的比柏金遜症仲要勁，握在手中嘅手槍遲早會俾佢震到跌落地，汗水不斷從佢圓潤嘅臉滑過。佢慢慢閉上雙眼拉下板機⋯

我期待肥佬陳開槍射殺隻黑熊嘅時候，獅子狗突然伸出隻手放係肥佬陳把槍上，肥佬陳睜開雙眼，好驚訝咁望住獅子狗，獅子狗好有自信咁講。
「我有辦法趕走佢，唔洗浪費子彈。」

「哦⋯」


肥佬陳鬆了口氣，然後快速把手槍放返入褲頭裡面後，便不斷抹走頭上嘅汗水。

獅子狗冷淡咁望住肥佬陳一連串動作後，便再次望返離我地不遠嘅黑熊，然後雙眼一直緊盯著火堆，好似係到計劃咁啲咩。
「你個枝比較長，俾我。」

我仲思考咁嘅時候，獅子狗突然講嘢，我以為佢同肥佬陳講嘢，點知佢伸隻手過嚟，示意我將手上嘅火把俾佢。

「做咩？」

「將你個火把俾我。」


佢唔係求我俾火把佢，而係用命令嘅口語要我交出，真係好討厭，不過為咗大局著想，我都係將火把交俾咗佢。

獅子狗得到我嘅火把後，便係空中揮舞咗數下，揮舞嘅速度快到令火把發出嗖嗖嗖嘅聲音，一點點火苗係空中散去，火把上嘅火好快因此熄滅。

我呆咗咁望住熄滅咗嘅火把。
「喂⋯你做咩整熄佢⋯」

獅子狗無回答我，而係不屑地望咗我幾眼，然後彎下腰，提起已熄滅嘅火把，對準著火堆上某塊燃燒中嘅炭火，然後快速向下揮去，以高爾夫球嘅姿勢將火炭打向黑熊個邊。

燃燒咁嘅炭火係空中如火球般飛過，黑熊未反應過嚟，火炭邊飛到佢身上。



嗚吖吖！！！

黑熊發出慘叫嘅聲意，然後不斷用手掌拍俾炭燒到嘅心口，獅子狗嘴角上揚，繼續向黑熊投射火炭。

連中數次火炭嘅黑熊，終於後退幾步，但並無逃跑離開，黑熊突然靈機一觸，舉起熊掌，將飛過去嘅炭火一一拍走，我同獅子狗俾黑熊嘅行為搞到呆咗陣。

獅子狗望一望火堆裡剩餘嘅炭火後沈默咗一陣，佢放低手上嘅火把，伸手插入褲袋裡面，摸兩摸，便掏出一個銀色嘅物品出嚟，我仔細一望，係睇起身好似幾昂貴嘅火機嚟。

黑熊再次發出憤怒嘅咆哮，然後趴在地上快速咁跑過嚟，獅子狗仍然在仔細咁睇個貴價火機，完全無視隻黑熊嘅衝擊，我一邊望住獅子狗淡定咁研究火機，一邊望望衝咁過嚟嘅黑熊，內心十萬句粗口想衝口而出。

我執起火把，擺出打棒球嘅姿勢對付衝咁過嚟嘅黑熊，黑熊離我地愈嚟愈接近，佢憤怒嘅雙眼發出殺人嘅紅光，我已經感覺到大禍臨頭。

突然獅子狗點著個火機，然後快速拋去黑熊個方向，黑熊見到火機飛咁過嚟，立即起身揮掌拍走，正當我以為就咁俾黑熊拍走火機嘅時候，獅子狗突然露出令人深寒嘅笑容。



Boom！！

黑熊方向發生爆炸嘅聲音，雖然爆炸聲唔係好響亮，但已令周圍樹木上棲息嘅鳥類嚇到飛走，我擰轉頭望去黑熊方向，此刻見到嘅畫面令我畢生難忘。

黑熊不斷揮著自己隻右手，用右手不斷拍打自己嘅胸口，因為此刻佢隻右手同胸口都有火苗在燃燒。

難道依招就係少林失傳多年嘅絕學！火雲掌？？？

「圈圈熊發動燃燒拳⋯」
高佬佳希望講下笑緩和大家嘅情緒，但大家並無因此而笑。

黑熊不斷用著火嘅手掌拍打著火嘅心口，但兩處嘅火苗並無因此而熄滅，反而燒的比剛才更旺盛，我隱約仲聞到一股燒肉嘅香味。

嗚吖吖！！！



黑熊發出一聲怒吼，便調頭跑返入叢林裡面，好快地，佢嘅身影係叢林裡消失的無影無蹤。

「之前都知個火機漏氣，原來開盡大火真係會爆炸。」
原來獅子狗啱啱調整個火機，令火機產生最大嘅熱力後連埋漏氣嘅位置產生爆炸。

肥佬陳見黑熊消失於叢林裡，立刻鬆了一口氣，然後便癱軟地坐係地上，獅子狗蹲下身同肥佬陳咬耳仔，啱啱先鬆了口氣嘅肥佬陳，聽到獅子狗嘅說話後臉色大變。

由於獅子狗係肥佬陳耳邊講，所以我完全聽唔到佢講咁咩。

「真的嗎？」
原本黑口黑面嘅肥佬陳，突然擺出燦爛嘅笑容。

獅子狗並無講嘢，而係默默地點頭，伸手扶起肥佬陳，肥佬陳興奮地快速企起身，但又驚啱先係聽錯，所以重複問多一次獅子狗。
「剛才那個是真的嗎？」



獅子狗點點頭，然後搭住肥佬陳嘅膊頭，用流利嘅普通話講。
「真的，我們去一邊談談。」

「好好好！」
肥佬陳同獅子狗兩人慢慢咁走到一邊。


真係奇怪嘅兩人⋯⋯



待續