荒島日記（新手、後宮甜）（不定期更新）: 猛獸

「師兄！依到啊！師兄！」
高佬佳對著叢林大嗌。

「阿佳？阿佳！阿sir！救命啊！！」
幾秒後，有幾個女仔從叢林裡跑出，見到我地眾人後便更落力去跑，而肥豬劉在最後。

肥豬劉以佢肥胖嘅身形拼命喪跑，汗水更濕透衫領，顯得十分吃力。

獅子狗見到返嚟嘅眾人驚慌樣，便快速走到火堆邊，執起其中一把燃燒咁嘅木把，我交低把開山刀俾達叔，亦走到去火堆邊執起火把。



獅子狗冷淡咁望我一眼，然後繼續望住前方嘅叢林。

咔嚓！咔嚓！咔嚓！

叢林裡不斷重複著樹枝樹幹斷裂嘅聲音，肥豬劉同幾個女仔驚恐咁躲係獅子狗背後，高大肥胖嘅肥豬劉更被嚇到瑟瑟發抖，雙腿嘅震動猶如裝了摩打。
「阿sir⋯嚟啦嚟啦⋯」

一個龐大嘅黑色身軀從叢林中跑出，兩旁粗壯嘅樹木係佢襯托下都變得瘦弱。

我雙眼一直緊盯著叢林前嘅黑色身軀，肥豬劉同幾個女仔已經被嚇到調頭跑走，而獅子狗繼續氣定神閑般望住黑色身軀，彷彿不把前方黑色身軀放在眼內。



天上嘅月光被烏雲遮蓋，火把上嘅火光無法照亮到叢林前方嘅黑色身軀，雖然黑色身軀無任何動靜，但佢嘅突然出現，就已經令我滿頭大汗，心跳加速。

「這⋯什麼東西⋯」
肥佬陳走到獅子狗背後，緊張地捉住褲頭上嘅硬物，雙眼一直緊盯著黑色身軀。

呼⋯⋯

呼⋯⋯



黑色身軀慢慢發出響亮嘅呼吸聲，眾多女仔被嚇到尖叫大嗌。黑色身軀亦因眾女發出嘅聲音而震動咗一下。

「佢⋯佢係到郁動⋯」

獅子狗聽到我說話後便皺了眉頭一下，不過數秒後又回復原狀。

呼⋯⋯呼⋯⋯

黑色身軀郁動得十分明顯，原本以為佢只有一米嘅身高，點知佢慢慢咁站立起嚟，身高立即去到接近兩米，終於清楚咁望到黑色身軀嘅曲線，我已經知遇上麻煩⋯⋯

烏雲已散去，月光再次照射到荒島上，慢慢咁照向前方嘅黑色身軀，黑色身軀嘅雙眼在月光下閃閃發光。

我緊緊握住手中嘅火把，握住嘅位置已被我汗水濕透。

黑色軀體突然張開雙手，以大字型嘅姿勢對住我地所有人。



嗚吖！！！！！

黑色身軀對著我地憤怒地咆哮，接著有股強力氣流從叢林中吹向我地，大風吹起沙粒石粒，令到我雙眼都睜唔開，手中嘅火把都差啲因此熄滅。

我正想走動，先發現自己雙腳痲痹，郁都郁唔到⋯

唔通我俾佢嘅震攝到雙腳無力⋯

「熊⋯是熊！是熊！！！」
肥佬陳指住黑色身軀係咁講。

黑色身軀終於展現在眾人面前，唔少人俾佢嚇到驚慌地大嗌。
「屌你老母！引隻熊返嚟⋯」
「完了完了⋯怎麼辦⋯」


「難道我們要死在這裡⋯」
「媽咪啊⋯媽咪⋯」

黑熊見到眾人驚慌逃竄嘅狀況，便想走上前嚟，我同獅子狗立刻不斷揮舞手中嘅火把，想令隻黑熊感到害怕不敢上前。

黑熊見我地依邊有三團火光後終於停低腳步，佢面部慢慢變得猙獰，露出佢一排排尖牙，如果俾佢咁樣咬一咬，應該死咁⋯

嗚吖！！！！

隻黑熊再次對住我地咆哮，今次嘅咆哮聲比上一次仲要大，我又再次感到有股強風吹向我地。

「我之前睇過本書，好似話係森林遇到熊就扮死，隻熊就唔會追殺我地，佢只會對生物有興趣。」
其中一個女仔講。

「無用㗎⋯啱啱我老婆就係扮死，點知俾隻熊咬死咗啊⋯」


肥豬劉緊握著拳頭激動咁講，淚水從眼眶流出。

「陳總！槍呢？開槍啊！陳總！開槍就可以殺死佢啦！」
高佬佳係後方大嗌著。

係喎！唯一殺死隻熊，而且自己唔會受到傷嘅，就係肥佬陳把槍！

我擰轉頭望向肥佬陳，肥佬陳已經掏出把手槍對準住黑熊，但肥佬陳雙手不斷咁顫抖，根本無辦法瞄準隻黑熊。

「快開槍啊⋯陳總⋯開槍啊⋯」
後面嘅眾人不斷咁講。

肥佬陳原本雙手顫抖，依家蔓延到全身都顫抖，一滴滴如豆粒般大嘅汗水從額頭上滴落嚟，呼吸聲亦逐漸變得急促。

肥佬陳發生乜嘢事啊？發羊吊啊？定係心臟病發啊？塊面仲咩突然變得青紫色毫無血氣⋯⋯





待續