荒島日記（新手、後宮甜）（不定期更新）: 分開

「有⋯有獵物！！！」
文健大嗌一聲，便向其中一棵大樹邊飛奔撲去，噗！撲到地上產生巨響。

「捉⋯捉到！！！」
文健望一望隻手，然後便興奮咁講，大家紛紛走到文健旁邊，睇文健嘅收穫。

文健企起身，然後好威風咁微微打開雙手，有隻好滴式嘅樹蛙係佢手掌中，大家一臉無奈咁望住文健，獅子狗亦沈默不語地望住文健。

我都估到唔係啲咩好嘢⋯



於是我地繼續係叢林走咗半個鐘，一隻稍微大些少嘅動物都見唔到，望住頭頂上嘅太陽逐漸西去，大家都著急起嚟。

「死啦⋯唔通要學文健捉青蛙⋯」
「啲青蛙咁細隻⋯邊夠食啊⋯」
「都唔知有無毒⋯」
「咁落去唔係辦法⋯」
「我地係唔係應該分散啲去打獵？」

係喎！點解我無諗過分散打獵？真係一言驚醒李克勤！



同咁多人一齊打獵，只會嚇走曬啲動物，特別係文健依啲手腳唔協調嘅粉腸，隨時好似以前咁俾佢玩死。

於是我走上前講。
「咁樣落去唔係辦法，我帶達叔同四眼妹去其他地方打獵。」

「大佬大佬！我都跟⋯⋯」
文健聽到我地要分開捕獵，所以佢走埋嚟想跟我，我即刻舉手拒絕。

高佬佳面紅耳赤咁指住我。
「大陸仔！你想搞乜嘢啊！邊個答應你可以拆夥去打獵㗎！阿sir都無應承你！」



「咪就係！你以為自己真係大佬啊？」
肥豬劉亦都跟住講。

我正想還擊嘅時候，獅子狗咳咗幾聲，然後推開高佬佳肥豬劉兩人走到我面前，佢高我半個頭，以冷漠嘅眼神望住我，我又再開始緊張到飆汗⋯

「你真係要離開大隊帶住佢地兩個去打獵？」
獅子狗再次用冷淡嘅語氣同我講嘢，依種語氣真係令我感到恐懼。

「係⋯」

獅子狗翹起雙手，以居高臨下嘅姿勢繼續同我講。
「我可以俾你地三個自己去打獵，但係你地打獵返嚟嘅食物要俾我地平均分配。」

四眼妹聽到後瞪大雙眼，想上前大罵獅子狗，我快速用手擋一擋。


「ok，我本身都無打算獨食。」

「咁就好，夜晚之前記得返嚟。」
說罷，獅子狗便帶住其餘嘅人繼續前進，而我同達叔、四眼妹行去另一邊⋯⋯





「你估佢地搵唔搵到食物？」
四眼妹跟係後面，係沿途嘅樹上劃上一條條記號。

「有獅子狗係到，應該搵到食物嘅。」
達叔觀察著周圍嘅草叢，留意周圍環境嘅一舉一動。



「我地顧掂自己先啦⋯」

「有大陸仔係到，唔怕捉唔到動物啦。」
四眼妹奸笑咁講。

「係！有東哥，無甩拖～」
達叔亦跟住附和。

「你兩個⋯⋯」

「東哥！三點鐘方向草叢！」
達叔指住三點鐘方向，有隻灰兔從草叢中跳出嚟，我向佢快速瞄準後鬆手，手上嘅雞毛箭快速飛過去⋯⋯






一個鐘後，我地三個帶住獵物返到臨時居住地，趕住天黑之前返到嚟，因為夜晚嘅森林，真係好容易迷路，如果天上有烏雲遮埋北斗七星，咁你就註定今晚係森林渡過一晚。

見到三女平安無事，我便鬆了一口氣，其實我好擔心佢地嘅安全，因為我出發前見過獅子狗嘅眼神，佢一直望住雪兒佢地，然後就嘴角輕微上揚，好似係到諗咁啲咩壞事。

雪兒走上前嚟不斷望我地手上嘅獵物。
「有啲乜嘢收穫？」

「大陸仔勁啦！兩三下手勢，就捉咗三隻兔仔同兩隻野雞！所有動物都逃⋯⋯」
四眼妹係眾人面前，將啱啱打獵嘅情形講得繪聲繪色，令眾人發出一陣陣嘩嘩嘅聲音，有幾個甚至拍手歡呼。

我環顧四周，見唔到獅子狗佢地，於是問企係我旁邊嘅雪兒。
「其他人呢？」

雪兒正想開口，我背後就傳嚟急促嘅腳步聲，我擰轉頭望去，見到獅子狗手上提著兩隻野雞行返嚟，而佢背後跟住嘅高佬佳、MK傑同埋幾個女仔，都攬住一堆野果返嚟。



高佬佳一抬頭，便望到我地幾個返咗嚟。
「大陸仔！咁早返嚟？睇嚟你無咩收⋯」

原本想恥笑我一輪嘅高佬佳，見到我腳下嘅收穫後，便黑曬口面無再講嘢，而獅子狗擰頭示意我攞食物到火堆邊。

「原本我地遇到隻羊，可惜佢跑得太快，俾佢走甩咗，之後我地係⋯⋯」
MK傑對住眾人講返啱啱打獵嘅情形。

我掃視返咗嚟嘅眾人，唔見肥豬劉、文健同埋幾個女仔，秘書Lily走咗過嚟，佢左望右望。
「那個⋯老師，文健去哪了？」

獅子狗望向秘書Lily，雙眼瞬間發出飢餓野獸嘅目光，雙眼慢慢聚焦到Lily嘅心口。
「我們分開打獵了，他和劉日生他們去另一邊打獵，我想他們應該差不多回來。」

「原來是這樣。」
Lily轉身走返去肥佬陳個邊，準備同肥佬陳匯報文健嘅情況，而獅子狗目光投向Lily驕人嘅翹臀⋯⋯



待續