荒島日記（新手、後宮甜）（不定期更新）: 組隊

MK傑失禁而擾攘咗一陣，我地就進入咗遠離火山嘅叢林地帶，大家只能望住天上嘅月光照耀，同獅子狗手上唯一嘅火把引領嘅方向前進。

係叢林裡面連續走咗兩個幾鐘，一路上都無遇到猛獸，就連小動物都唔多見，應該如獅子狗所講，啲動物紛紛一早逃亡，唔會係火山附近遇到。

由於眾人都非常疲倦，與火山距離已經較遠，於是行到叢林裡一片無乜樹木嘅空地時，大家就決定留係到休息，等到天光先再出發。

大家係附近收集一堆柴木，然後係空地中間燃點，火光照耀著叢林空地嘅四周，肥佬陳同文健一停低便倒頭大睡，呼嚕呼嚕嘅鼻鼾聲傳達眾人。

我帶住三女，同埋達叔一家、四眼妹一家，係叢林空地嘅其中一個角落休息，眾人疲倦不堪，一坐低便好快感到睡意。



我雖然都感到疲倦，但依家要同獅子狗高佬佳眾人係郊外露營，唔係好放心咁訓教，四眼妹睇得出我嘅擔憂，佢派其中一個女伴嚟幫我地守夜，如果發生乜嘢事就第一時間叫醒我。

我望一望遠處嘅獅子狗，佢背對住我訓，右手嘅動作好似攬住一個人，我估應該係嘉雯嚟。

好快睡意淹沒我嘅意志，合埋雙眼⋯


第二日。

我地起身後，確認方向後，我地繼續馬不停蹄咁係叢林中穿梭，雖然大家都感到飢餓，但清晨嘅空氣中聞到燒焦嘅氣味，大家都唔敢繼續停留。



原本想一邊行一邊捕獵，點知一路上都唔見有其他動物，大家繼續挨肚餓，拖住疲倦嘅身軀繼續前進。

大概五點嘅時候，高佬佳望一望手中嘅腕錶，然後走上最前，對帶頭嘅獅子狗咬耳仔，獅子狗聽完便點點頭，然後轉身同大家講。
「天就嚟黑，我地係前面休息一晚，聽日先再繼續行。」

「得⋯得救了⋯快累死我了⋯」
肥佬陳迅速坐係地上大口大口地喘氣，正當佢想訓低個陣，獅子狗走到佢身邊。
「陳總，唔好訓住，有啲事要做咗先。」



「什麼事？」
肥佬陳疑惑咁抬頭望。

「大家過嚟，我有嘢要講。」
獅子狗呼喚著其他人到佢面前，於是我地紛紛走到獅子狗面前，雖然我唔係好想聽佢講嘢，但依家身處係深山老林，四周遍佈鳥獸嘅叫聲，感覺行每一步都會危險，只有團結，大家先可以繼續生存落去。

獅子狗直接開門見山說到。
「我地依家無曬食物，所以要搵好幾個人組隊去打獵，有無打獵叻嘅人係到？」

獅子狗一講完，所有人嘅目光立刻投向我到⋯⋯

你班仆街⋯

肥佬陳聽到要去打獵，眼神立即顯露疑惑，雙眼隨即望向旁邊嘅人。
「文健，去跟你老師打獵。」



「我⋯我⋯」
文健唔係好想去打獵，但又唔知點拒絕。

見到文健支支吾吾，肥佬陳嬲到對住佢大喝。
「叫你去就去！」

文健無奈咁走上前，而達叔一直望住我，睇我會唔會答應入獅子狗嘅打獵隊伍，我打返個眼色表示無所謂，達叔便點點頭。

於是獅子狗、高佬佳、文健、肥豬劉、MK傑、我、達叔、四眼妹同埋幾個女仔組成咗個打獵隊伍，我地男仔主力捕獵，而女仔係輔助我地。

其實肥豬劉幾個女伴都大隻過達叔同文健，不過肥豬劉可能覺得叫曬佢啲女伴嚟會好洩底，所以只叫咗其中一個跟埋嚟。

決定好係臨時居住地附近打獵。大家係到起咗三個火堆俾留係原地嘅人用作驅趕野獸，同三女講幾句後，便再次走返入密密麻麻嘅叢林裡面。



「記得係沿路嘅樹木留低記號。」
獅子狗指揮著隊伍最尾嘅人做嘢。

「係！」

「細聲啲，唔好嚇走啲動物。」
獅子狗擰轉頭同最尾嘅人講。

「係！」
「都叫你細聲啲囉！」
「係！！！」

高佬佳同肥豬劉成為咗獅子狗嘅左右護法，分別企係獅子狗左右側，舉起手中臨時整出嚟嘅長矛，小心翼翼咁觀察附近嘅草叢情況。

而我同達叔、四眼妹係隊伍嘅中間，一邊留意周圍環境，一邊觀察獅子狗三人，而四眼妹同達叔因為身處叢林，所以緊張到滿頭大汗。



「行咗咁耐都無獵物嘅⋯」
四眼妹一邊喘氣一邊講。

達叔一臉擔憂咁。
「唔會又要挨餓啊嘛⋯」

「陳總無嘢食會發癲㗎⋯」
文健驚恐咁抱住個頭。

「嘩⋯你幾時走到我地隔離⋯」
四眼妹疑惑咁望住文健。

「er⋯啱啱囉⋯唔好咁拘謹啦，自己人嚟自己人。」
文健懶係老友咁同四眼妹講，並且對獅子狗三人背後做鬼臉。



達叔挨近四眼妹耳邊講。
「唔好信佢，佢專出賣自己人，你諗下當初佢一嚟到點唱衰東哥。」



待續