荒島日記（新手、後宮甜）（不定期更新）: 下游

「我好眼訓啊⋯你俾我訓多一陣先啦⋯」
說罷，我訓返落張床，辣椒妹亦失平衡咁壓咗落嚟。

「唔好訓啊，我想食蟹啊～快啲捉返嚟俾我食啊～我要食啊！已經好夜啦！快啲起身啊～我要食啊～」
辣椒妹不停咁搖我個頭。

我一直唔理佢，佢就出盡力咁搖我，搖到我有些少頭暈腦脹，我破口大罵。
「食食食！遲早肥撚死你啊！死肥妹！」

「唔得啊！我今日點都要食蟹啊！你好快啲同我起身啊！大陸仔！！」


辣椒妹對住我咆哮，但我都係繼續唔彩佢，希望佢會無癮而離開。

辣椒妹持續嘈幾分鐘，見我都係無理佢，於是佢便離開山洞，我開心地伸個懶腰繼續去搵周公，點知⋯⋯

突然一桶水兜頭潑過嚟，我成個頭濕曬，張床都濕埋⋯

「辣椒妹！！！」

辣椒妹攞住個桶企係山洞口，然後佢好得戚咁講。
「你再唔起身，我就拆曬成個山洞！拆埋張床！」



我嬲霸霸咁走出山洞，俾辣椒妹個桶水淋到無曬睡意，辣椒妹見我走出嚟後，立刻丟低個桶，然後攬實我既手臂，請我手臂食波餅。

「聽話未好囉～」
辣椒妹講完便錫我塊面一啖。

「死開！」
我想揈甩佢隻手，但辣椒妹攬得更加實。

「唔得啊～我打死都唔離開你既啦～依一世都跟住你既啦～」


辣椒妹講完挨埋個頭落嚟。

我嘆了口氣。
「唉⋯你放開我啦⋯我同你去捉蟹啦⋯」

「真㗎？yeah！！」
辣椒妹即刻鬆手，開心到大跳一下。

我地走到雪兒同秋儀面前。
「我同辣椒妹去下游睇啲嘢，好快就返，有咩事就嚟下游搵我地啦。」

雪兒同秋儀點點頭，然後我同辣椒妹走到河邊，沿住條河走向下游個邊，沿途都唔見有營地既人。

我估佢地應該係走曬去上游方向捕魚，畢竟上游比較多魚棲息，而且樹林到有唔少小動物，而下游方向得鰻魚，而且大條既差唔多俾我同達叔捉曬，細條既更加難捉，所以營地既人肯定去曬上游。



我一路行一路觀察河底既情況，比幾日前，條河已經無咁混濁，但係辣椒妹所講既蟹，真係完全唔見。

望住旁邊辣椒妹個樣，應該仲未到佢見到蟹既地方，所以我無問辣椒妹，繼續靜靜咁同佢行。

行咗成十幾分鐘，唔好話蟹啦，條河魚毛都唔見一條⋯

我開始覺得辣椒妹係玩咁我。
「蟹呢？邊到啊？辣椒妹，你玩我啊？」

「都仲未到，行多一陣！」
辣椒妹講完便扯住我行。

行咗五分鐘，突然辣椒妹扯住我向右邊樹林走去。
「喂喂喂⋯你帶我去邊啊⋯唔係捉蟹咩？做咩入樹林⋯」



「啲蟹就係個邊！我地快啲行過去啦！」
辣椒妹用盡力扯住我行。

我不斷環顧四週，感覺辣椒妹係到玩咁我，穿過五六棵樹後，終於見到辣椒妹所講既地方。

「爛泥地⋯」

估唔到下游既樹林裡面，竟然係隱藏一大片黑蚊蚊既爛泥地⋯

「你睇！啲蟹啊！」
辣椒妹指住泥地上橫行霸道既蟹群，啲蟹數量真係驚人⋯而且隻隻都好大隻，十分肥美⋯

除咗蟹之外，我仲見到唔少貝殼生物係到，如果執啲貝殼返去煲湯，個湯一定好鮮甜美味。

「比我地以前捉個啲仲大隻好多⋯辣椒妹，點解你會發現到依個地方？」



辣椒妹笑笑口咁講。
「今朝洗面個陣捉唔實條毛巾，我追住河到漂流既毛巾跑到下游依邊，突然樹林個邊有嘢走過，咁我好奇睇下係咩啦，就見到有隻蟹我面前行過，然後我就追隻蟹追到嚟依邊啦！唔好講啦，你快啲捉幾隻返去俾我食！」

「你想食，點解唔自己去捉。」

辣椒妹聽完後便扁嘴。
「咁依到污糟啊嘛⋯我唔想搞到自己成身都係泥⋯」

無你好氣⋯我除低對鞋，然後拉高埋條褲腳，慢慢咁走入泥地，啲蟹望住我慢慢靠近，並無因此逃跑。

可能係因為佢地棲息係爛泥地，所以無乜動物會走入嚟獵食佢地。

如果依到唔係離營地距離有成二十分鐘路程，我估依到啲蟹一早俾營地既人捉曬嚟食。



沿途稍微大啲既貝殼生物，我都執起再拋去辣椒妹個邊，好想飲鮮甜既湯啊⋯

嗡！嗡！嗡！

我驚恐咁望聲音既方向⋯唔係⋯係前方周圍都傳嚟聲音⋯依啲聲音⋯係我最討厭既聲音⋯

我抬頭望個天空⋯係密密麻麻既蚊係到飛⋯佢地數量多到只要攞火把求其揮一揮，就會燒死十幾二十隻⋯⋯

大⋯大鑊⋯

突然所有蚊飛向我依邊，我即刻嚇到調頭狂跑，辣椒妹疑惑咁望住我，我即刻大嗌。
「跑⋯跑去河個邊！好多蚊啊！」

辣椒妹聽到我大嗌便即刻調頭跑，我條頸有幾處地方係依個時候感覺到刺痛，猶如俾針拮般，我一邊跑，一邊用手掌不斷拍打，手心全部都係蚊既屍體同血⋯⋯



待續