荒島日記（新手、後宮甜）（不定期更新）: 跪求

「文健！」
我地四個驚訝咁望住打到變豬頭既文健。

「係⋯係我啊⋯大佬⋯」
佢口腫面腫咁望住我，如果唔係佢把聲，我真係唔會認得佢係文健嚟。

文健上半身赤裸，佢不停咁顫抖，身上每一寸都有被打既傷痕，背後俾鷹爪傷既位置原本復原，因俾佢地大打一鑊而再次裂開，血水些少滲出。

不過我完全無理會文健既傷勢嚴唔嚴重，因為我擔心既人只係達叔一個。



偷嘢既人係文健⋯而唔係失蹤左成晚既達叔，咁達叔究竟去左邊到⋯達叔唔會真係打獵既時候遇害啊嘛⋯

文健用手抹走眼角既淚水。
「大佬⋯可以見得返你地⋯真係好啊⋯終於有救啦⋯終於有救啦⋯」

（我見到你真係唔覺得有咩好⋯每次見返條粉腸都係唔會有好事⋯）

「呵呵！真是可喜可賀，情同手足啊，不過你們要記住！你們這兩天要搬過來，好了，幫他解開他手上的繩子。」
肥佬陳指示企係旁邊既女仔去解開文健手上既繩。



我即刻企起身。
「唔好意思，我無做大佬已經好多年！所以我唔會係依條粉腸既大佬，頭先既嘢當我無講過，係咁先！」

雪兒亦都跟住起身，我地準備掉頭走人，突然背後傳來拍打既聲音。

啪！

肥佬陳聽完面紅耳赤，用手好大力咁拍左一下張檯，憤怒咁對住我咬牙切齒，然後用佢肥大既手指指住我。
「臭小子！剛才答應的都不算話嗎！信不信我立刻弄死他！」



我指住跪係地上既文健，然後同肥佬陳講。
「依條粉腸係生係死就你決定啦！反正我地係唔會搬過嚟！更加唔會俾食物你！」

被解開鬆綁既文健，即刻跪爬過嚟我依邊，然後攬住我隻腳，眼淚鼻涕再次不斷湧出嚟，口齒不清咁講。
「大佬啊⋯大佬⋯泥今日一定要救我啊⋯佢尋日打足我成晚⋯陳總真係會殺左我㗎⋯大佬⋯我願意以後做牛做馬⋯你一定要救我啊⋯」

文健把眼淚鼻涕抹係我條褲上，我用力抽返走隻腳。
「文健，你好同我放手。」

文健攬住我大腿痛哭流涕。
「大佬⋯泥真係要救我⋯陳總唔係講笑㗎⋯泥要救我啊大佬⋯雪兒⋯求下泥叫大佬救我啊⋯我唔想死啊⋯雪兒⋯」

我望住雪兒，雪兒眼神好似有些少可憐文健既遭遇，唔得㗎雪兒⋯你唔可以可憐文健㗎⋯佢依條友只會製造更多麻煩俾我地⋯

我一腳踢開文健，雪兒都用力扯住我隻手走，並且同地上既文健講。


「文健，當初你走個陣，我地就已經講得好清楚，你發生左乜嘢事都唔好搵我地麻煩。」

好彩⋯雪兒無可憐文健⋯

我惡狠狠咁望住文健。
「文健，你唔好唔好記得當初你係營地點唱衰我，依家仲想我救你？你係唔係傻㗎？」

「雪兒⋯大佬⋯我知錯啦大佬⋯求下泥⋯泥要救我啊⋯我真係會俾陳總打死㗎⋯」
文健想捉住我同雪兒，我同雪兒即刻避開佢走遠遠，肥佬陳驚文健逃走，即刻叫啲女仔綁住文健。

「大佬⋯大佬啊⋯我知錯啦⋯大佬⋯泥要救我啊⋯大佬⋯我唔想死啊⋯大佬⋯」
文健俾三個女仔按在地上，雙手俾佢地再次綁緊。

我地無視文健既痛哭求救聲，離開肥佬陳既山洞，走出山洞後，雪兒同秋儀就搖搖頭嘆了一口氣。



辣椒妹拍一拍手。
「洗乜嘆氣喎，文健咁樣係佢自己攞嚟既，依啲代價肯定要佢自己受返啦，要我地每日俾一半收穫去救個粉腸，咁我地就真係無啖好食啦。」

我左擁右抱攬住雪兒同秋儀。
「係囉，你地唔好咁啦，肥佬陳應該唔會殺文健既，可能文健係肥佬陳到食得好住得好呢。」

雪兒望住我。
「肥佬陳唔會殺文健？」

「嗯，我覺得肥佬陳就算有幾大既膽，佢都係無膽量去殺人，所以我地唔洗擔心害死文健，我地返去先啦。」

「嗯。」
雪兒攬實我既手臂，請我既手臂食波餅。

我地向返山洞個邊行，我一路係到諗咁達叔究竟去左邊，過返河對面，見到兩位阿嫂，佢地見到我身後並無達叔係到，兩個攬住痛哭起嚟。



「你地兩個做咩啊？」
雪兒走過去關心兩位阿嫂。

兩位阿嫂跪求我。
「東哥⋯東哥⋯求下你幫我地搵阿達返嚟⋯東哥⋯」

見到兩位阿掃成淚人，雪兒都開始眼濕濕。
「大陸仔⋯你幫下佢地啊⋯佢地無左達叔好慘⋯」

我走過去扶起佢兩個。
「兩位阿嫂，你地起身先啦，我應承過你地，而且達叔係我兄弟，我一定會去搵返佢。」

我跑返去山洞，將弓箭同開山刀擺入旅行袋裡面，然後背起旅行袋出發，雪兒企左洗山洞口，講出熟悉既說話。
「我都要去！」



「唉⋯雪兒啊⋯我唔係去玩㗎⋯我係去搵人㗎⋯」

「我唔會俾你自己一個去，我都唔係去玩，我會聽曬你話，帶我去啦⋯」
雪兒再次攬住我手臂，請我手臂食波餅。

「雪兒，今次真係好危險，達叔消失左咁耐，肯定遇到啲咩猛獸，我驚唔可以下下保護到你，萬一啲猛獸抓到你點算，你都唔想俾佢食落肚掛？」
我形容得咁恐怖，雪兒應該會俾我嚇到唔敢跟埋嚟掛？

雪兒沈默不語，望左我旅行袋幾秒後，快速拉開旅行袋既拉鍊，攞出收埋係裡面既弓箭，然後對住出面拉弓，瞄準樹林方向某個位置。
「雪兒⋯做咩⋯」

熟！熟！熟！
雪兒連射三發，枝箭完全準確咁射中樹林其中一棵樹，我驚訝咁望住雪兒，雪兒好驕傲咁抬頭。

「你⋯你幾時咁識射箭㗎⋯」

雪兒好驕傲咁講。
「哼！讀書個陣，我都有玩過一年多元學習射擊，阿sir仲讚過我，話我好有天份𠻹！」

係喎⋯相當年我揀射擊都係因為有好多女揀佢，雪兒都係其中一個，所以我先報射擊嚟玩。

雪兒攬住我手臂，用嗲聲同我講。
「所以我唔洗你保護，你就帶埋我去啦～多一個人好照應啊嘛～」

「咁好啦⋯」
食軟唔食硬（好柔軟⋯）

「好啦，雪兒，我地出發啦，趁早去搵達叔，森林愈夜就愈危險。」
於是我同雪兒出發前往去上游既森林搵達叔，留低秋儀同辣椒妹係山洞（雖然佢地都好想去，但我堅決要佢地留低。）一嚟要佢地兩個睇住山洞既糧食財產，二嚟佢地兩個打得，可以保護到自己。

「學東哥⋯你要快啲返嚟啊⋯」
秋儀依依不捨咁望住我講。

「學～東～哥～你要～嗯～快啲～返嚟嗯～」
而辣椒妹，卻用一種發姣既聲音同我講，並且不斷對我抛媚飛吻，搞到我毛管棟⋯

我地走向上游方向，兩位阿嫂話佢地親眼望住達叔走向上游個邊。

沿途都有好多營地既人係到打獵捕魚，但從佢地既神情可以睇到，今日既收穫並唔理想。

河水變得混濁，根本睇唔到河裡面既魚，令捕捉困難度大大增加，大雨過後，啲小動物好似失曬蹤影。

望住上游個方向，個森林有好多地方我都未行過，要係裡面搵達叔，同大海撈針無乜分別⋯⋯

達叔！你要撐住啊！

唔好就咁死啊！



待續