荒島日記（新手、後宮甜）（不定期更新）: 火山

「雪兒，唔好走嚟走去啊，我地依家要行森林最裡面既地方。」
我一邊講一邊用軍刀，係沿途既樹上割下一刀做記號。

「知啦～」
雪兒一啲緊張感都無，個樣好似好欣賞周圍既景色。

係森林走左半個鐘，突然見到前面山腰邊有舊白色既物體，我同雪兒快速咁跑過去睇一睇。

係一隻左腳運動鞋，我認得出係達叔對鞋嚟！成個營地得佢一個著依個牌子。



我即刻執起對鞋，前後上下左右好仔細咁睇過一遍，無發現到有血既痕跡，咁即係達叔無死係猛獸既手上。

雪兒見我好仔細咁望對鞋。
「對鞋係達叔既？」

「嗯，我記得佢係著依對純白波鞋。」

但係留低左一隻無穿無爛既波鞋，咁達叔好可能係逃亡既時候甩左既，所以佢先無再執返對鞋嚟著。

雪兒拍一拍我膊頭。


「唔好諗咁多啦，我地繼續行啦，達叔仲係到等咁我地㗎。」

係既，我地唔可以再係到停留太耐，達叔可能處於危險之中，我地要儘快搵到佢。

於是我將白色波鞋放入旅行袋裡面，然後繼續拖住雪兒隻手行。

既然對鞋係山腰邊出現，咁即係達叔好大機會走左上山。

同雪兒走上山既時候，我攞出把開山刀，然後不斷咁左望右望，生怕突然出現猛獸襲擊我地。



手上既開山刀俾我握得緊緊，把刀柄已俾我手汗濕透。

沿途一隻小動物都見唔到，連鳥叫既聲音都無，實在係太過安靜，安靜到令人感到恐懼。

雪兒都可能俾依股安靜搞到些少緊張，佢更加用力咁握住我隻手，汗水係佢額頭上慢慢流落嚟。

普通人出汗可能會散發出臭汗味，但雪兒出汗，卻散發出微微既香味。

我用力咁嗦依陣雪兒既體香，雪兒見到我企定定係到，於是推一推我。
「大陸仔，做咩企左係到唔行啊，又話趕住搵達叔？」

「哦⋯係⋯行啦行啦。」

走左個幾鐘後，我地終於上到山頂，但仍然見唔到達叔既蹤影⋯



前面方向一棵樹都無，地面呈現死一樣的灰黑色，於是我走上前去望一望。

出現係我面前既⋯係一個相等於足球場咁大既窿⋯個窿裡面見唔到有任何生命既跡象，無小動物棲息，亦無花草樹木。

睇個窿唔似係隕石撞成，依個唔會係火山啊嘛⋯如果真係火山⋯咁係依個島生存未好危險⋯

雪兒走到我旁邊後驚嘆咁講。
「嘩！依個好似係死火山口」

「你又知？」

雪兒拍一拍心口。
「我以前有睇過好多關於旅行既書，裡面介紹左好多全世界大大小小既火山，所以就認得出依個都係死火山嚟，而且你睇下，個到有幾個窿仔噴氣啊。」

雪兒指住裡面某處，有幾個小孔間歇噴出一股股氣體出嚟。



死火山都好啲⋯起碼唔會無啦啦爆發，因為依個死火山離我地住既山洞同營地係非常近⋯只要爆發流出熔岩既話⋯就一定會流到我地個到⋯

達叔唔會係跌係個窿裡面掛⋯於是我靠近觀察個窿裡面，除左灰黑色既泥土之外，就係動物既骸骨。

達叔⋯你究竟走左去邊⋯

雪兒搖一搖我，然後指住對面。
「大陸仔，唔好發呆啦，我地沿住個火山口邊行去對面先啦。」

「嗯⋯好啊。」
於是我同雪兒沿住火山口邊行去對面，然後慢慢咁落山。

同雪兒準備落山，開始感覺到周圍非常潮濕，而且溫度比火山口高啲。



「點解咁熱㗎⋯頭先係死火山口邊行都無依家咁熱⋯」
我件衫早已俾背隻啲汗水濕透。

「我都唔係好清楚⋯除非⋯⋯」
雪兒一邊抹去額頭上既汗珠一邊講。

「除非啲咩？」

「除非係佢啦！」
雪兒個樣十分興奮，然後佢捉緊我隻手，加快速度落山。

我俾雪兒一直拖住走。
「喂⋯雪兒⋯小心啲啊⋯咁樣跑落山好危險㗎⋯萬一跣腳就碌落山㗎⋯」

雪兒高興咁講。


「好快到既啦！好快到既啦！」

「乜嘢好快到啊？」
雪兒無回答我，仍然好興奮咁帶路。

跑左兩分鐘，雪兒終於停低無再跑，佢轉身對住我，面上露出喜悅笑容，然後指向佢後面一處。
「登登登登！你睇下係乜嘢嚟！」

我望向佢手指指住個方向，個到有數棵樹木，數棵樹之間，隱約飄嚟一絲絲白煙，唔係，係蒸氣嚟⋯

「乜嘢嚟？點解會有煙？」

雪兒見到我仲睇唔出係咩，眼神有啲鄙視我，然後講。
「點解你咁蠢㗎你⋯咁明顯都睇唔出⋯」

雪兒鼓起塊面，然後拉住我行去個幾棵樹個方向，愈靠近個邊，氣溫就愈熱，愈嚟愈多蒸氣迎面而來。

雪兒快速帶我穿過幾棵樹後，突然有道強光照射我塊面，令雙眼刺痛到睜唔開。而雪兒好興奮咁瘋狂拉扯我隻手。
「到左啦！到左啦！」

我用手遮擋光線，勉強睜開雙眼。
「乜嘢到左啊⋯」

「係溫泉啊！溫泉啊！」
雪兒指向前方，有數個大大小小溫泉，最細一兩米，最大既接近有十米。頭先既強光係陽光照射溫泉造成既反射。溫泉既蒸氣四處飄散，令我感覺如見到仙境一樣。

我望住溫泉驚嘆不已。
「估唔到依到會有溫泉！」

雪兒已經走到溫泉個邊，然後蹲下身伸手到溫泉到。
「好暖啊～」

我走去雪兒身邊，雪兒便潑溫泉水到我身上，此刻佢面上既笑容如細路般。

「喂，潑濕我啲衫褲啦。」
雪兒無理我，仍然不停咁向我潑水，於是我不停咁用手去擋，結果我地兩個成身都濕曬⋯

「我地浸下溫泉先啊，而且衫褲都濕曬，等我地晾乾啲衫褲，聽日再出發啦。」
雪兒慢慢除去身上濕透既衣物。

我無奈咁望住雪兒。
「我地出嚟係為左搵達叔既喎⋯」

「我好耐無沖過熱水涼啦，而且就嚟天黑啦，就係到住一晚先啦，乖啦～」
雪兒指住天空，我依家先發現，原來已經接近黃昏。

夜晚係森林裡面走嚟走去實在太危險，只好留係到住一晚，我放低個旅行袋，然後係附近執啲枯枝乾柴返嚟。

我執夠一堆夠我燒成晚既乾柴枯枝，然後就行返去溫泉個邊，見到旅行袋旁邊有雪兒既衫褲係到，而雪兒就唔知去左邊。

咁多個溫泉，雪兒應該係其中一個溫泉裡面，於是我逐個逐個溫泉望，唔知睇到第幾個溫泉個陣，雪兒從溫泉裡面彈出嚟，然後用攬住我，將我扯入溫泉裡面⋯⋯




待續