荒島日記（新手、後宮甜）（不定期更新）: 挾持

個營地女仔回頭就走，我即刻捉住佢手臂問佢。
「佢咁緊急搵我，究竟發生左啲乜嘢事？」

「我只係嚟傳話，都唔係好清楚發生乜嘢事，不過聽講好似有人入左佢山洞偷嘢，你依家最好快啲過去，佢語氣唔似係講笑。」
個女仔講完，便走返營地個邊。

肥佬陳唔會係知道左我潛入佢山洞偷嘢啊嘛⋯咁我依家去肯定係鴻門宴⋯實死無生⋯但無理由啊⋯我個晚係個山洞裡面咁耐⋯佢地咁多人都無發現到我⋯無理由各個都係做戲俾我睇⋯⋯

咪住⋯除左我會偷入去之外⋯仲有達叔⋯



我即刻跑去達叔個山洞，然後係對住山洞大嗌。
「達叔！達叔！」

達叔無出現，反而兩位阿嫂走左出嚟，見到我後緊緊捉住我隻手，佢地兩個眼眶泛紅逐漸出現淚光。
「東哥⋯我地正想搵你啊⋯」

「兩位阿嫂，發生乜嘢事？達叔呢？」
我不斷望山洞裡面，但仍然見唔到達叔既身影。

兩位阿嫂聽到我講達叔，眼眶上的淚珠就忍唔住傾瀉。


「阿達⋯阿達⋯阿達佢⋯尋日晚上既時候⋯去樹林個邊打獵⋯點知⋯到左依家⋯佢都未返嚟⋯」

死啦⋯睇嚟係達叔尋晚去肥佬陳山洞偷嘢，俾肥佬陳當場捉左⋯然後困到依家，所以先咁早叫我去肥佬陳山洞，原來係佢地捉左達叔！

兩位阿嫂見我若有所思無講嘢，於是準備下跪。
「東哥⋯我求下你⋯求下你幫我地搵阿達返嚟啊⋯就算佢死左⋯我地都要見到佢條屍⋯我地跪低求你啦⋯」

我即刻扶起兩位阿嫂，唔俾佢地下跪。
「兩位阿嫂起身先，我一定會幫你地搵返達叔返嚟，快啲起身，你地下跪我受唔起。」



「你唔答應我地⋯我地唔會起身既啦⋯」

「就算你地唔求我，我都會去搵佢，達叔係我兄弟，佢出左事，我點都會義不容辭去救佢！所以兩位阿嫂，你地快啲起身。」

兩位阿嫂聽到我咁講，終於停止痛哭。
「真係既？」

「係，所以你地兩個快啲起身先，我依家就去搵佢地，你地兩個返去等我好消息，我會帶達叔返嚟。」
我講完後，兩位阿嫂終於肯起返身，露出微笑。

我跑返去山洞，將開山刀同軍用刀戴上身，開山刀用衣服包住，藏係背後，然後跑去營地個方向。

準備過河既時候，有把聲音叫停我。
「大陸仔！你要去邊！」



我轉頭望去聲音既方向，見到三女企左係河邊，手上攞住佢地濕透既衫褲。

「er⋯我要去營地個到處理啲嘢，好快就返嚟。」
我講完就繼續走，點知雪兒捉住我隻手。

「我都要去！」
雪兒好堅定咁同我講，而辣椒妹同秋儀亦都點頭。

聽到佢地話要跟埋，搞到我好無奈。
「雪兒啊⋯我唔係去玩㗎⋯應承你，好快就返嚟，乖啦。」

今次去肥佬陳山洞救達叔，肯定會同肥佬陳發生爭執，更加會發生暴力事件，所以唔可以帶佢地三個去。

雪兒好認真咁同我講。
「一係同你一齊去營地，一係唔準你去，我地一齊返去山洞，你自己揀。」



咁即係逼我要帶你地三個去啦⋯達叔依家有生命危險⋯再同雪兒佢地糾纏落去，以肥佬陳既性格，我遲啲去，驚到時只可以幫達叔收屍⋯

「好啦⋯我帶你地去，但你地要聽我說話，如果有咩事發生，記得即刻跑，唔洗理我。」

「嗯！」
三女異口同聲。

於是我帶住三女嚟到肥佬陳既山洞外面，今日營地既氣氛發出怪異，啱啱沿途既營地人，都用奇怪既眼光望住我地，以往鄙視既目光不復存在。

我地進入山洞，穿過塊黑布進入大廳，就見到肥佬陳咬住支雪茄，坐左係梳化上，而秘書Lily企左係佢後面。我坐低係肥佬陳對面既梳化，雪兒坐係我旁邊，而辣椒妹同秋儀企係我後面。

肥佬陳見到我地坐低後，就噴了一下煙，眉毛皺埋一齊，嬲霸霸咁望住我。
「你知道我今天找你有什麼事嗎？」



我聽完便扮傻扮懵。
「搵我，係唔係傾同你一齊管理營地既事？我⋯⋯」

肥佬陳舉起隻手令我停低無再講落去，然後佢就講。
「合作那件事甭談了，今天找你是有另外一件事。」

「另外一件事？乜嘢事？重要到一早叫我過嚟。」

肥佬陳嬲霸霸咁講。
「昨晚有個混蛋半夜闖進我家，他一來到就偷我的食物，要不是我那時想出來撒泡尿，也不會捉到他，他奶奶的，竟然這麼大的膽子偷我的東西。」

「佢偷嘢咁關我乜嘢事啊？」

「他一直說他是你的好兄弟，給我捉到的時候，他不斷喊你的名字，而且還警告我，今天不放他走，你一定會找我報仇。」



尋晚達叔就已經唔見左人，而肥佬陳尋晚就俾人偷食物，達叔之前又帶過我係半夜時間入嚟偷嘢，時間、動機完全一致⋯⋯

仆街啦⋯達叔真係俾肥佬陳捉住左⋯⋯

「咁你依家想點先？」

肥佬陳笑左一下，轉向後同Lily講。
「把他帶出來。」

「好！」
Lily轉身便走入裡面。

肥佬陳隨後嘴角上揚，大廳既氣氛變得異常緊張，雪兒突然捉住我隻手，我望住佢，佢眼神同我講，叫我唔好咁緊張。

然後有三個女仔拖左個大麻包袋出嚟，擺到肥佬陳張梳化旁邊，個麻包袋既大細同裡面物件既形狀，就睇得出有個人屈曲咁收埋係裡面，仲隱約聽到麻包袋裡面既呼吸聲。

一想到達叔藏係麻包袋裡面，我就忍唔住怒火企係身，然後對住肥佬陳大喝。
「你依家算係點！好快啲放開佢！」

肥佬陳見到我反應後奸笑，佢企起身走出梳化到麻包袋旁邊，然後提起腳一嘢重重踢落個麻包袋，麻包袋裡面即刻發出慘痛既聲音。
「唔⋯⋯唔⋯」

我從背後抽出把開山刀對住肥佬陳。
「你好快啲同我放左佢！唔係就唔好怪我對你唔客氣！」

「哎唷！還帶刀來驚嚇我，大家都是文明人，怎麼可以突然動粗呢。」
肥佬陳無視我既威脅，肆無忌憚咁坐返係梳化上，Lily走返到肥佬陳背後。

「王學東，如果你肯答應以下的條件，陳總今天就會放過他。」

「乜嘢條件？」

「第一，你們河邊的人要全部搬回來營地這邊住，第二，你山洞每天有一半的收穫都要給陳總。」

嘩⋯獅子開大口⋯一半收穫⋯咁我地山洞以後食咩⋯

雪兒開口講。
「你咁即係強人所難，你叫我地點答應你！」

Lily望住個麻包袋講。
「如果你不答應，那他是生是死，就由陳總決定，你們不要後悔。」

肥佬陳露出收係佢腹中既硬物，我隱約見到黑色手槍柄，達叔係我好兄弟⋯我唔可以見死不救⋯
「好！我應承你！咁得未？放左佢！」

肥佬陳見到我答應，開心到拍曬手掌。
「好！好！放了他！」

三個女仔即刻解開麻包袋綁係上面既繩，我地四個驚恐咁望住，達叔成身都係又青又紫既打鬥傷痕，當佢慢慢抬起頭個陣，雙眼已經被打腫，鼻涕不停咁流，個嘴仲俾對襪塞住。

雪兒俾佢既情況嚇到攬實我，而我一直望住達叔，因為識左達叔咁耐⋯你就算俾人打到成個豬頭，都唔會完全變曬第二個人掛⋯

我挨近問到。
「喂⋯阿生⋯你邊位？」

其中一個女仔扯走佢嘴裡既襪，佢吐了幾啖口水，然後喊曬口咁同我講。
「大佬⋯大佬⋯係我啊⋯我係文健啊⋯」




待續