荒島日記（新手、後宮甜）（不定期更新）: 禁止

———地點：荒島———


「東哥⋯真係大件事啦⋯」
達叔依家個樣非常驚青。


「營地發生左乜嘢事啊？」
我望住非常緊張既達叔，不過達叔依個人，從來都係大驚小怪。




達叔拉左我去一邊。
「營地⋯營地個邊⋯唉⋯東哥⋯你去睇啦⋯我都唔好意思講啊⋯」

有乜咁唔好意思講啊？


於是我跟達叔走到河邊，營地個方向對出，插左一個好粗糙既木牌，並且旁邊企左兩個弱不禁風既女仔係到，佢地手持著木棍，好似成為左營地既守衛，成為營地既左右門神。




我同達叔走到河對面，個兩個女仔即刻上前走過嚟，並且舉起手中既木棍對住我，面上露出憤怒。


「咪行住！」
雖然佢地兩個骨瘦如柴，但聲音仍然很響亮。


但係⋯我究竟做錯左啲乜嘢事？點解好似要驅趕我咁。




達叔走過嚟擋住。
「喂！我地都無話入去，企係依到得罪你地啊？」


個兩個女仔聽完達叔所講，即刻走返原本既位置，不過目光一直停留係我身上，好似擔心一不留神，我就會衝入營地裡面。


「東哥⋯東哥⋯你過嚟睇下個牌⋯」
達叔企係粗糙木牌前面招手。


我走過去木牌到，木牌上面用石頭刻左九個大字。


［ 大陸仔與狗，不得內進 ］




我頂啊⋯邊個咁無聊寫啲咁既嘢啊？肯定又係文健個粉腸做既啦，我恨不得想一腳踢爛個木牌。


深深吸一口氣。
算！我大人有大量，唔同你地班人計較，無得入嚟就無得入囉，反正我一啲都唔稀罕。


而且我最多日頭入唔到去，我唔信你夜晚都搵人係到守！


突然眼角望到一個身形高大虎背熊腰既影子從營地裡面走左出嚟，然後企係兩個守衛女仔後面，同佢地兩個講。
「好好守住個入口，唔好俾大陸仔入嚟啊，夜啲可以入嚟山洞攞食物。」



「Yes！喬～姐！」
兩個女仔大嗌回應返。

嗌咁大聲，唔講仲以為係軍訓。

我認得依個虎背熊腰既女仔，佢係肥豬劉既女伴，如果唔係佢留長頭髮，個日著左條裙，我都唔會知佢係女人嚟。


個虎背熊腰用好不屑既眼神望住我，嘴角不停咁郁，應該係吐罵咁我。


達叔走到後面，細細聲係我耳邊講。
「佢係師兄肥豬劉既女朋友，佢個名叫嚴小喬。」




小喬？我無聽錯啊嘛，佢邊忽小啊？佢仲大過港豬愛大橋啊！


既然係肥豬劉既女伴走出嚟，咁即係唔俾我入營地係佢既主意，此處不留人，自有留人處。


我掉頭走返去自己山洞個邊，達叔亦都跟住我返去。
「達叔，營地班人唔洗理既啦，我地唔同佢地來往又唔會死既。」

「咁又係。」
達叔面上既不安已經消去，露出喜悅既笑容。

「仲笑，返啲返去分左啲鰻魚佢啦。」

「係既係既！」


達叔興奮咁跑返去。


食完個早餐，就同達叔開始趕工，由於三女同達叔既女伴都頂唔順河鰻既腥味，所以加工程序就得我同達叔兩個做。我依家係河邊等咁達叔過嚟。


「東哥！我嚟啦！」
我抬頭一望達叔，俾佢個造型嚇左下。


達叔用塊布綁係頭上，當口罩咁遮住自己個嘴鼻，個造型似足古裝片既倒夜香同驗屍官。

「達叔，倒完夜香嚟？」

「夜香？乜嘢夜香？」

「嚟啦，嗱嗱臨做曬佢，用把刀仔斬頭開肚啦。」


我遞上把軍用刀俾達叔，但達叔攞住把刀無動手，少爺仔果然係少爺仔。
「東哥⋯咁即係⋯」


我攞返把刀。
「學嘢啦，達叔，入得廚房既男人，先係最有魅力。」


我攞起條鰻魚然後按起地上，條鰻魚不停咁掙扎，我即刻用把刀割河鰻條頸放血，鰻魚蠕動左一陣便死去，就然後就一刀切開鰻魚個肚，攞曬啲內臟出嚟，掉入河裡面。

「明未啊？達叔。」

「明啦明啦！東哥乜都識，連鰻魚都識得劏！掂啊！」

「你唔記得我以前成日去街市買送啦？去得多當然知道點整啦。」


話時話，我都好掛住老母，唔知老母依家係香港點呢。


以前好討厭佢係我耳邊囉囉唆唆，依家想聽都無得聽⋯


「係既係既。」
達叔蹲下身照住我頭先既做法。


我同達叔處理河鰻既期間，有唔少營地既人見到我地，都走左過嚟睇，唔夠幾分鐘，營地一半既人走左過嚟圍觀。


佢地又開始係旁邊嘰嘰喳喳。
「喂，你睇下，佢地係到殺蛇啊。」

「乜嘢蛇啊？佢地個啲係鰻魚嚟㗎。」

「劉日生佢地個隊人一條都捉唔到，佢地竟然捉左咁多條⋯」

「睇嚟大陸仔佢地比劉日生更加識打獵。」

「你睇下佢地兩個個樣，就知佢地捉鰻魚有幾輕鬆啦。」

「唓！啲魚好臭囉，俾我我唔會食。」
個女仔把口就咁講，但眼睛發出羨慕既目光。


半個鐘後，除左我留左三條鰻魚養住之外，我同達叔處理好另外個十六條河鰻，洗河邊清洗走佢地既血跡，就可以攞返去曬成鰻魚乾。


鰻魚乾仲有醫藥功效，佢醫夜盲症同貧血症好顯著，不過如果患上感冒、紅斑狼瘡既人就建議唔好食，會加重個病情。


肥豬劉同佢既女伴出現係河對面，佢嬲到面紅耳赤，不斷咁磨牙，應該係嬲我既出現，影響左佢係營地女仔心目中既地位。


「我地走！」
肥豬劉帶住佢既女伴離開人群。


肥豬劉依條友非常小氣，有仇必報，以前有個中一師弟串佢幾句，就俾肥豬劉佢帶既籃球隊玩左佢一年，最後搞到要退隊避佢。


總之依一排真係要謹慎小心啲佢。


我係山洞口用粗樹枝同樹藤整左個架，然後將十幾條鰻魚擺上佢曬，皮向下肉朝天，而達叔攞返去自己曬。

辣椒妹望住一條條鰻魚。
「依啲係唔係鰻魚？」

「係！」

「wow！但點解咁臭⋯」

「無磷既魚多數都臭，但鰻魚真係好好食wor，而且又有營業。」

雪兒走過嚟講。
「有鰻魚但係無鰻魚汁⋯。」

我走入山洞裡面，然後摷支鰻魚汁出嚟。
「嗱！鰻魚汁！」


鰻魚汁係肥佬陳個山洞裡面攞既，佢既山洞裡面既調味料真係多到數唔曬，得閒要再潛入去偷多幾支。


不過想起營地撞鬼依單嘢⋯唉⋯夜晚都係唔好入營地好⋯

突然聽到河個方向有噼哩啪啦既聲音，我望過去，有幾個人行咁過嚟。


帶頭既人係四眼妹，佢拖住一堆嘢嚟我地個依邊，跟住佢後面係同佢一齊住個四位女仔，都一樣托住啲嘢過嚟。


我仔細望佢地身後既嘢，佢地拖咁既嘢係佢山洞裡面既雜物⋯


我走到四眼妹面前。
「喂！四眼妹，你地搞咩啊？」

四眼妹奸笑咁望住我。
「仲洗問？咁係搬屋啦。」



待續