荒島日記（新手、後宮甜）（不定期更新）: 挑戰
四眼妹係營地住得好好地地，做咩咁突然搬過嚟。
「搬屋？做乜無啦啦搬屋啊？」
「我見你禁止入營地啊嘛，以後同你做生意都難，所以索性搬過嚟你地依邊，點啊？係唔係唔歡迎先？」
四眼妹挨近過嚟望住我。
「唔係⋯」
你挨咁近搞到我面都紅曬。
「唔係就得啦，姐妹們！快手啲啊，仲有好多嘢未攞㗎。」
四眼妹邊講邊拍手鼓勵士氣。
其中一個四眼妹山洞既女走過嚟，然後好細聲咁講。
「其實得你一個先會幫襯佢，其他人都買唔起佢啲嘢。」
四眼妹對住走過嚟個女仔講。
「喂！你同大陸仔講咁啲咩？」
「無嘢啊！彤姐！」
個女仔做左個鬼臉後即刻跑去四眼妹身邊。
就係咁，我望住四眼妹佢地不斷咁搬嘢過嚟，由於我依家唔可以入營地，所以無辦法幫佢地手搬嘢。
我轉頭一望，雪兒好無奈咁樣望我同四眼妹幾眼，然後就慢慢行返入山洞裡面。
雪兒做乜咁既樣？
「咦！粗重功夫等我嚟！」
達叔路過見到四眼妹佢地，即刻好熱情咁走去幫佢地，凡係重嘢都搶曬嚟搬，佢仲同四眼妹有傾有笑。
達叔突然走過嚟同我講。
「東哥東哥，你真係要幫下佢地啊。」
「乜嘢幫佢地？」
「四眼妹佢地啊，其實佢地狩獵麻麻，收穫一向都少，再加埋肥佬陳攞佢地既糧，所以一直都係食唔飽，一直都打算咁離開營地，直到你出現，佢地先決定搬離營地，東哥，我地兩個以後好好保護依邊啲人啦。」
達叔講完個樣愁眉苦臉咁。
喂⋯達叔⋯係你答應保護佢地，我無答應過wor⋯做咩拉埋我落水⋯
「達叔，我無應承過保護佢地。」
達叔估唔到我會咁講。
「東哥⋯點可以咁㗎⋯」
「咪住先！達叔⋯你唔會係對四眼妹有意思啊嘛⋯」
「吓⋯邊有呢邊有呢⋯」
達叔傻笑咁搖手。
明眼人都睇得出你對佢有意思啦⋯
但係我記得⋯住四眼妹既女仔⋯好似都係同性戀嚟⋯
「東哥，總之我地兩個以後要好好保護依邊既人！唔講住啦，我繼續幫佢地搬嘢。」
達叔講完，便跟住四眼妹走去營地個方向。
最後四眼妹搬到黃昏，先將佢山洞既嘢搬曬過嚟依邊，而佢住既山洞，就選擇左係達叔隔離，聽講話想係想做埋達叔既生意，佢仲講左句：「女人錢最好搵！」
達叔兩個女伴如果知道達叔對你有意思，仲點會幫襯你啊。
食飯個陣，紫霜可能同我地熟左，開始會主動咁講嘢，會講下自己既睇法，同埋就係，佢開始會笑，我有幾次見佢笑左一下，雖然好輕微好短暫，但對比啱開始識佢個陣沈默寡言，依家已經好好多。
佢笑起嚟個樣都幾靚。
辣椒妹、秋儀、紫霜，三個係一邊有傾有笑，有幾次辣椒妹開心到拍曬手掌，果然係大笑姑婆。
反而雪兒黑曬口面，悶悶不樂咁自己坐係一邊，全程無出過一聲，辣椒妹同佢講幾句，佢都好冷淡咁回應佢，所有笑點都引唔到佢笑。
雪兒唔會係因為四眼妹同我啱先咁親暱，所以就嬲到唔出聲啊嘛⋯⋯
我望向雪兒個陣，雪兒即刻避開我既目光，愁眉苦臉咁食海鷗肉。
大佬啊⋯我唔係又做錯左啲咩啊嘛⋯
到左夜晚，我地四個返山洞裡面訓教，秋儀繼續攬住我手臂訓教，而雪兒就背對住我訓，但佢不時向後望一望我，望到佢既目光，佢就好似有嘢好想同我講。
見到雪兒依家奇奇怪怪咁，搞到自己都訓唔著，大概過左十幾分鐘，雪兒終於轉身對住我，佢見到我仲未訓，就挨過嚟同我講。
「大陸仔⋯我地出外面啊⋯」
我跟住雪兒走出山洞外面，佢抬頭望向月亮，月光照耀係佢身上，令雪兒變得更加靚，雪兒就好似嚟自月亮既仙女。
今晚個月亮特別圓，今晚係農曆十五？雪兒叫我出嚟係為左欣賞月色？
雪兒開口。
「大陸仔⋯」
「嗯？」
「你⋯你依排要小心啲啊⋯」
雪兒用好可憐既眼神望住我。
「點解突然咁講⋯」
「因為⋯因為⋯」
雪兒突然攬住我，身體不斷咁顫抖，我感覺到膊頭有少少濕濕地。
我撫摸雪兒既秀髮。
「傻豬，做乜係到喊啊⋯」
「我感覺到你依排會有危險⋯」
「唔洗擔心，感覺嚟姐。」
雪兒好用力咁攬實我，同我講。
「唔係㗎⋯你依家係到做既所有嘢⋯都會吸引到營地既人矚目⋯而且你將達叔同四眼妹拉左過嚟依邊⋯陳總既收入自然會少⋯我覺得佢實會搵你麻煩⋯」
「應該唔會既⋯」
其實聽完雪兒咁講，我都覺得我依家係營地既所有嘢，完全係挑戰咁肥佬陳係營地既地位，以肥佬陳係社會打滾咁多年，佢一定會搵我算帳。
「大陸仔⋯我既感覺一向都準㗎⋯⋯不如我地離開依到啊⋯我地去其他地方重新嚟過⋯我唔想你有事⋯⋯」
雪兒講完便開始哭泣起嚟。
我地好難得先搵到咁好既地方安置，而且又搵到我既朋友，搵到一大班人一齊生活，俾我感覺返好似好返現實社會生活，點可以話走就走⋯⋯
不過雪兒既第六感不嬲都準⋯都唔難怪佢依家會咁擔心我⋯
我緊緊攬實雪兒。
「雪兒，放心啦，我唔會俾自己有事。」
「但係⋯」
雪兒抬頭望我，淚珠不斷係佢面上滑過，形成兩條淚痕，代表著佢既擔憂。
我笑住咁講。
「我邊到捨得離開你地，我仲要保護你地，你見我咁多次無事，就知我幾大命啦。」
「大陸仔⋯」
雪兒個樣仲係好擔憂。
「信我啦，雪兒。」
我誠懇咁望住雪兒。
雪兒思考左一陣。
「嗯⋯我信你」
雪兒講完便吻上嚟，唔知點解，我覺得依一吻有少少既苦澀味⋯接吻理所當然應該係甜蜜啲，但依一吻，卻係甜蜜的嚟有些苦澀，會唔會係因為雪兒擔憂先會咁？
返入去山洞，雪兒攬住我訓，佢好快就咁訓著，而我聽完雪兒既憂慮後，開始不停咁思考。
如果肥佬陳攞槍對住我⋯我可以點⋯
其實佢枝槍係邊？
不如⋯
不如我去偷走佢枝槍？
待續