荒島日記（新手、後宮甜）（不定期更新）: 打獵

「好啦，我地係時候將D乾草鋪起黎先。」
我將啱啱執返黎既乾草望一望，睇下會唔會有蟲之類既嘢，無事就堆埋一齊。

（整一張床定係整幾張床好呢？如果整幾張床就要再去搵多D乾草。）

「大陸仔，你係度諗咁咩？」
我仲係度思考既時候，雪兒便出聲問到。

「無啊，我係到諗咁整幾多張床，但D乾草唔係幾夠。」
我望住執返黎既乾草。



「洗乜諗啊！一張床就得啦！」
辣椒妹答道，我轉個身望佢，見到佢係度奸笑。

（依個辣椒妹肯定又係到諗咁D咩壞主意！）

秋儀攬住D食物走入山洞深處時講。
「學東哥，就整一張床啦，好似我地以前住竹棚咁一齊訓。」

「我都好贊成整一張床，聽講依度比較風大，如果凍既話，我地一齊訓都可以暖D。」


雪兒講完便走入去幫秋儀。

（係wor！一齊訓，可以「取暖」啊！）

「喂，做咩諗嘢諗到入曬神啊？我個主意係唔係好好呢？」
辣椒妹係我耳邊說道，我隨即打左個冷震⋯⋯

「無⋯無諗嘢啊⋯」
我繼續堆好D乾草。



整左十幾分鐘，堆乾草整成既床終於搞掂啦，雖然睇起身好唔舒服咁⋯但如果整到塊布擺上去，就唔同講法。

「個山洞得張草床係度，就咩都無啦，好似好家窮四壁咁。」
辣椒妹咁講一講，個山洞又真係除左張草床就乜都無⋯

「唔洗驚，好快就乜都有既啦。」
辣椒妹聽完後就搭住我膊頭。

「真係乜都有？」
辣椒妹唔係好信我。

「係啊，信我啦！好快你想要咩都有既啦，我出去一陣先，你幫我睇住個山洞，唔好俾D狗公入黎。」
說罷，我就走出山洞外。

我地既食物，剩返半邊狼肉同少量既番薯，咁少份量，應該兩三日就俾我地食曬，所以趁依家仲係下午，天仲未黑，走去打獵，令糧食儲備多D先得。



啱啱唔記得問達叔了解下依附近有D咩獵物係度⋯⋯不過無所謂啦，依家自己出黎搵下都好。

於是我沿住河邊行，睇下會唔會見到D咩動物出現。行左幾分鐘後，經過執乾草既地方，便見到有幾條雪白既小腿係河度走黎走去。

噢！係夏天既氣息！
夏天，為大地帶黎美腿！
當然啦，論美腿肯定係雪兒條腿靚好多啦！

幾個少女係河邊嬉戲，唔係！而係抓魚，佢地好專心咁望住河底，深怕一不留神，今晚既晚餐便會游走消失。
「條魚遊到你個度啊！」
其中一個女仔好緊張咁指住一邊既河底。

「擋住佢！唔好俾佢走！」



「小心D啊！唔好俾佢游走啊！」

見到佢地咁落力抓魚，於是我好奇咁望一望河裡面條魚有幾大，雖然咁多人力去捕抓，er⋯條魚得手指咁粗⋯都唔夠佢地既個分⋯

其中一個戴眼鏡既女仔見到我望住佢地抓魚，塊面開始燶燶地，然後好不爽咁對住我講。
「你依個男仔唔會係黎同我地班女仔搶嘢食啊嘛！各個男仔都只識蝦女仔！無鬼用！」

吓？我望下你地做咩都唔得啊？無你咁好氣，四眼妹。

於是我無回答個女仔，繼續沿住河邊行上去，而個幾個女仔繼續好專心咁抓魚。

沿途又見到幾個女仔係度抓魚，佢地見到我後即刻停止捕獵既動作，雙眼一直望住我，個眼神俾我既感覺，好似帶有一絲絲既怨恨，一絲絲既憤怒。

睇黎佢地已經將我歸入左肥佬陳總佢地一幫，所有係荒島既男仔都係仆街。



有咁多女仔係度打獵，我只好再行遠少少，因為依班女仔打獵吵到死，係動物聽到佢地既叫聲都嚇走啦。