荒島日記（新手、後宮甜）（不定期更新）: 生存

「咁我地四十幾個人一直係度住，後黎郵輪上既食物已經食得七七八八，大家就開始到處打獵，點知過左一排⋯」
達叔面色有D凝重

「係唔係肥佬陳搞規矩收食物？」

「無錯！後黎肥佬陳總搞埋D規矩，要每個人每日打獵分四分一俾佢，就開始有三男七女唔服佢。」
達叔閉上眼回想返。

「個死肥佬唔係攞左好多食物既咩？咁快食曬啊？」
辣椒妹問到。



「聽講佢未食曬㗎，佢只不過係想囤積糧食，D奸商不嬲係咁既啦！」
達叔對於肥佬陳總既做法好不滿。

「佢以保護我地為理由，收我地打獵返黎既食物，佢又唔鐘意做嘢，成日無所事事係營地度走黎走去。」
達叔其中一個女伴講。

「咁個反對個三男七女係邊啊？」
我有D好奇佢地依家點。



「其中兩女就係住依邊個兩母女。」
達叔指住紫霜住既山洞。

「咁另外個三男五女呢？」

「死⋯死曬⋯⋯」
達叔得低頭講。

「吓⋯點解會死㗎？」
我地四個異口同聲。



「唔會係個死肥佬殺死佢地啊嘛⋯」
辣椒妹講完望向營地個方向。

「竟然殺人⋯」
秋儀緊握住拳頭。

「唔係肥佬陳總殺㗎，佢地話依個島咁大，而且又好不滿肥佬佢地，唔想繼續留係度，想搵辦法出返去，返去香港，所以就走左去個邊既森林。」
達叔邊搖頭邊講。

「一個星期後，得返一個女仔返黎⋯佢成身都係血，我地問佢咩事，佢就一直話⋯襲擊⋯襲擊⋯之後幾日一直發高燒⋯無幾耐都走埋⋯」
達叔講完，大家都靜左數十秒⋯





「大陸仔⋯我好驚⋯」
雪兒挨係我心口度，達叔見到後又對住我淫笑。

「所以依家D人寧願俾食物都想留係營地，就係因為見到返黎個女仔咁？」
辣椒妹問達叔。

「無錯，所以寧願食少D都想留係營地，前個排有隻野豬衝入黎，撞死左兩個女人，如果無佢開槍，都唔知點先殺得死隻野豬。」
達叔講完便嘆左一口氣。

「就算生存落黎又點啊⋯有D人雖然仲有命，但就過住唔係人既生活⋯」
達叔另一女伴說。

「你講既人係邊個啊？」
秋儀有D聽唔明。



「佢講既人就係紫霜。」
達叔指住紫霜住既山洞。

「紫霜！」
三女驚訝咁講。

「紫霜佢好慘，當初我地黎到依個島既時候，佢就已經成個工人咁服侍惡毒女人美思，亦即係佢後母。」
達叔一直望住紫霜個山洞。

「個後母叫趙美思啊？好似係邊度聽過依個名⋯」
我在腦海尋找依個名。

「係啊，佢後母叫趙美思，佢家族幾有錢既，不過就係做埋D偏門生意，趙美思個老竇係放高額大耳窿起家既，香港出左名既中介人教父！佢放出既利息仲勁過九出十三歸，破壞左唔少人既家庭。」

「歌仔都有得唱啦，利疊利，利疊利，三千變六皮！」


辣椒妹解釋俾秋儀聽。

「紫霜佢阿媽係佢好細個陣就走左佬，然後佢老竇識左依家個後母美思，經過金融海嘯後，紫霜個爸爸好需要錢週轉，於是同美思結婚，但美思由細到大都嬌生慣養，份人毫無人性，所以一直虐待紫霜，紫霜個爸爸唯有叫紫霜忍耐。」

「點做人老竇㗎！要自己個女俾人虐待！」
辣椒妹恨不得將紫霜個老竇同後母煎皮拆骨！